Read Sangtam Naga THSINGYURÜ 6 Bible Online

THSINGYURÜ 6 - Sangtam Naga bible

THSINGYURÜ 6

¹Hiba limih la yuje mücho arangcheh nguchicho Ihnü rangchehko.

²Tsingrangbanü khürü khyang kuthsi, khürü khyang adhichi ko khürü khyang kohro jünung, ho, abinü khyünyücho lüpcho jünung, ta abi künyangchi mülisohnung. Ko shirü khürü uthring longnyüp linung. Hi amükang ko hi apüm arahkheh.

³Nyüh khüdu atsurü thsih linung kohle ko kutsüp linung kohle, ta abi akünyang müngukhang, khüdoi kutsüp linye ko adhrürangnung akyühde müngukhang, Ihnü yore, akhunga asücho surocho tsü atsau.

⁴Hütsüba akhunga tsü suronung müdhsüdah; hütsü amarürah la changpehre ko nbüchopehre.

⁵Hütsünü anyümong avisa khodesü müngudheng mahkhang akang tsü tu kyorünang mümüdhe;

⁶ta kang hajar anyüh linye akang longnyüp müliba nyitsarü tenü hütsülü akyahshang ngure. Tunüo anyüding müdüm khüdu lang du würe.

⁷Nyitsarü khüdunü nguchiba apüm tsü atsunung lango ngunung shulüm du nguchire, ta khodesü kükyo müngure.

⁸Khütapü amüdherü khüdu amüsithsarü khüdu tenü atsau o? Ailümrü khüdunü akang khüta linung müdhecho tsünü tu jingchoro?

⁹Hi amükang; hi nyübong iichicho kyole. Apa lango mükhyah du linung tenü nüh tu liro hütsünü longkyangcho atsau.

¹⁰Atikehba lüpcho tsü papadenü dhrongchehpehcho lile, ko abi tenü rezeh nyüh khüdu te mürehtachehrepü Ihsanü müdhele.

¹¹Alaa rehtade alaa amükhyu du kangre ko nüh atsau mükangre.

¹²Hiba amükhyu akang akhikyah, ko nbükhüm kyo lahkhu tsiba akang hi nengdang sünü atsauba tsü khütapü müdhenung? Abi süpü limih la tu tikehnungnang sünü khüta müdhenung?