Read Sangtam Naga THSINGYURÜ 7 Bible Online

THSINGYURÜ 7 - Sangtam Naga bible

THSINGYURÜ 7

¹Aneng atsa tsü thsidi axümlichi tenü atsau; ko asü nyümong tsü suro nyümong tenü atsau.

²Thsüti liba kuh lang wünung tenü metra pümba kuh lang wücho atsau, tunüo asübanü Ihsa atümung yingrepü akang lirünü lümkehbae.

³Alongri tsü münyücho tenü atsau; hütsünü nü romih mükhümsohnung kohle, ta hütsünü nü lasih künyangsohre.

⁴Lümzehrü lasiking tsü metraba kuhla lile; ta amüsithsarü lasiking tsü künyangküshi kuhla lile.

⁵Adohrünü nü neng sesohnung tenü amüdherünü nüh yübüsohcho atsau.

⁶Adohrü münyüba tsü michang la zeng tahde tsohcho kyole. Hütsü tu adüzü müle.

⁷Sehchiba nguchinü amüdherü amüsithsa kangsohre. Nühnü pohsa khyükhang, hütsünü nü saying thsangnyangjüre.

⁸Lüpcho achangka tsü adikeh tenü atsau. Arangcho tsü amüthseh tenü atsau.

⁹Thsüthsa zii tüchüro; tunüo zichüroba tsü amüsithsarü dreng chah kehle.

¹⁰“Akhulang kohro tuepü khüdupinü atsau-o?” pü khodesü tütsingdheng. Hi athsehthsa atsingdhengba mah.

¹¹Akang lirü atümung asithsa thsabae; hi thsiking khyücho te sako du,

¹²ko thsinü atsikeh jücho kyo hütsünü jüre. Lümlongnü nüh khümcho yohpüre amüdhe amüwa tsü hi lile.

¹³Tsingrangba nguchi tsü lümdheng. Tsingrangbanü kurengsohcho sünü müchongsohnung?

¹⁴Nüh rii jode, künyang ko chongcha rode, lümdheng: akünyang ko chongcha anyüding Tsingrangbanü jüre; müchikeh tu tikehnungnang nühnü tu mümüdhe.

¹⁵Amükhyu I kang la Ihnü lüpcho nguko. Nyitsarü atsa süre; ta nyitsarü amütsa kutsüp lire.

¹⁶Hütsüeko, khura tsa mahkhang sithsara tüthsa, tuepü abürü jangjang mapsehnung?

¹⁷Ta khura mütsara mahkhang dohra tüthsa; tuepü müsükyange sünung?

¹⁸Anyüding khuranung lanü ranglieng. Nühnü Tsingrangba müdhekhang kohnung.

¹⁹Yangdi khüdu la yangthsarü dhüre tenü lümlongnü asithsarü khüdu alaa sithsasohre.

²⁰Limih la athsalang du nguchirü ko khodesü müthsamehrü süsü müle.

²¹Nyitsarünü yocho yu apümlü tünyi, tunüo nüpu kulirünü nüh müthsamünyücho yuchinung;

²²ko nühnüsü adrongpi bürü müthsamünyüko pü nüpunü müdhele.

²³Hiri apüm thsatsünung Ihnü I lümlong bichicho. “Ihnü asithsa kangnung lümcho”; ta hütsüsü müchihcho.

²⁴Akang tsü tunang sünü yangchichehnung? Hi sohrale, hi nyichehnung Ihsa nengdang thsahrale.

²⁵Ta Ipu jangjang Ihnü amüdhe ko yangchiba la khakhuchüjücho; Ihnü lümlong nguchehnung ko I atsingdhengba la alalingba ngunung, ko amükhyu amüsithsa tsü tunang müdhenung lümcho.

²⁶Ihnü khingkurü tsü asüba tenü amütsauepü müdhecho. Abükyünü jüba amüi tsünü nüh zeng la kyo xohnung; abükyü pükyang nü chah khyahriba tsü tpolunü kyo nüh xohnung. Tsingrangba künyangsohrü dunü tsiphunung, ta münyirülü abükyünü rangnung.

²⁷Athsingyuba tsünü yocho, ho, alalingba yangchide khai khai Ihnü hütsü rangchehko.

²⁸Ihnü alalingba apa khüdu yangchicho ta tusü müngu. Ihnü jengreng jünung hajar yola adhrerü khüdulü ngure, ta khingkurülü khüdusü müngu.

²⁹Ihnü nyichocho apümnü hi: Tsingrangbanü Ihsa müchongkhüti thricho, ta Ihsa jangjang thsangnyangcho.