Read Sangtam Naga THSINGYURÜ 8 Bible Online

THSINGYURÜ 8 - Sangtam Naga bible

THSINGYURÜ 8

¹Amüdherü dunü kohro khüdu tsü tunang hütsü müdhere. Lümlongnü romih müyasohre ko romih mükhümba tsü changsohre.

²Yangthsabanü yocho nyieng, ko Tsingrangba te dhsüthsara anyengchoba tükülüp.

³Yangthsabanü apu khyünyücho masü nguchinung kohle, hütsüeko abi tenü zang; hütsütari dhsürü müdüm la tüli.

⁴Yangthsabanü tase keh nguchire, ko abi te sünüsü mükhyangchicheh.

⁵Nühnü abi yochonyi tashi, nüh khümcho lile, ko hütsü khüta ko khode nguchinung asithsarünü müdhele.

⁶Lüpcho nguchinung akyang ko athsalang lile, ta Ihsanü zara müdhere!

⁷Tu tikehnungnang sünüsü mümüdhe, ko Ihsa te yonung süsü müle.

⁸Sünüsü asünung lanü za mülicheh mahkhang asü nyümong müphungkhucheh. Hi Ihsanü mütsiphuba khata; Ihsanü hi mürahmütsacheh.

⁹Ning pohki khode khürü tase keh ko khürü arüh pohki chongchaba nguchichoti lümdhengde, Ihnü hiri apüm nguko.

¹⁰Ho, amütsarü arüh kong la dhrürangcho Ihnü ngucho, ta kongyo langnü thalide arühnü amütsa nguchiba yangdi tsatsa la tsünü arühnü arüh sere. Hi amükang.

¹¹Tuepü nyitsarünü hidoi müla yuzeng thsangnyangro? Tunüo athsamehrü tsü athsadenü mükhingchichonü.

¹²Münyirü khüdunü thsihpili yuzeng thsangnyangpü adesü lidure. Ho yuje, arühnü yoba tsü Ihnü müdhele: “Nühnü Tsingrangba yocho nyikhang, lüpcho tsapehnung,

¹³ta amütsarü nengdanglü mütsanung. Arüh akang tsü nbükhüm khüdu kyole ko arüh azadenü sünung, tunüo arühnü Tsingrangba yocho münyi.”

¹⁴Ta hi amükang. Limih la tu tikehrünang dhingdheng: Khüpi amütsarü nengdang amüsarü khingchire, ko amüsarü jiyü amütsarünü ngure. Ihnü yore, hi amükang.

¹⁵Hütsünü nyitsarü khüdu tsü künyangchi libaepü Ihnü lümre, tunüo akang la akünyang tsü tsunung, yongnung ko künyangchi linung hidue. Tsingrangbanü hiba limih la akang yohpüjo abinü nguchi lide, abinü hidusü nguchinung kohle.

¹⁶Khodederü Ihnü hiba limih la liba asithsa ko amüdherü kangnyünang, ama atsingse müyüpseh.

¹⁷Tsingrangbanü tu nguchirünang münyichehre. Nühnü khütoh-i müküp nye, nühnü khodesü müyangchichehnung. Asithsarünü müdhelepü yonung kohle, ta arühnü mümüdhe.