Read Sangtam Naga SOLOMON KHI 2 Bible Online

SOLOMON KHI 2 - Sangtam Naga bible

SOLOMON KHI 2

¹Ih sharon la rangmü yungpi, ko azong ngah la lurü yungpi khüdu du.

²Zeng yola lurü yungpi kyo khingkurü yola I müitpü lile.

³Mürong sing yola müthoh dong khüdu kyo, Adhrerü yola I müibong lile. Abi khümki Ih pümnyüre, ko abi singsih tsü anyiyah lile.

⁴Abinü Ih abi thsüti kuhla norocho ko amüi nisan I chah dhimüsucho.

⁵Shükusih pinü I re zehsohng ko müthohnü I longtbasohng. Nahmürahchonü Ih suh müzeh.

⁶Afühlilang kheh I thah pohki, ko akheh tsalangnü Ih khyahrire.

⁷Jerusalemlarü, atsaya Shümüshü ko shuhu nengla nührünü Ihjü amüi mülongmüzinungepü nyengchoung.

⁸Ihnü I müibong yuva yuchire. Abi azong tung ko akhang lahsah Ih yang shangre.

⁹I müibong tsü shuhu ko shümüshü apung kyole. Abi tbü jüp hütsüla yale. Abinü nyübongkhi khu dhengre ko ariticho khu ridhengre.

¹⁰Imüibongnü I te chotare. Rung, hütsüeko I müitpü; I müitpü I yola rung.

¹¹Tsingkang khuko; tsing zahko;

¹²Rangmü la yungpiti pile. Hi khithsanung shikhe; Luh la mümüdhrü yuva yuchire.

¹³Ngurüsi nyire; shükusih pinü axümlichi jüre. Rung hütsüeko I müitpü; I müitpü I yola rung.

¹⁴Nüh lungdhong la rang pümba mümüdhrü kyole. Adhengnyünung nü romih I khyang ngusohng ko nü yuva yuchisohng.

¹⁵Api pithoh liba shükusiluh müthsangnyangdenü, shirungti ko azati tsü rang.

¹⁶I müibong tsü I yo, ko Ih abi yo. Mütsingsede, ko anyangnyü nyübongza müfüde,

¹⁷abinü lurü yungpi yola abi santi kangre. I müibong thali rung, Bether zong chah shuhu ko shümüshü apung kyo.