Read Sangtam Naga SOLOMON KHI 3 Bible Online

SOLOMON KHI 3 - Sangtam Naga bible

SOLOMON KHI 3

¹I yüpji chah yüpjopü, romang mükhu Ihnü müipong melangcho; Ihnü abi yangchicho, ta müngucho.

²Ihnü yangdi tungte la ko langtpahti la rümchicho. Ihnü müibong yangchicho. Ihnü yangchicho, ta abi müngucho.

³Yangdi nyahrünü Ih ngucho. Ihnü arüh te, “I müibong münguo?” pü tsingdhengcho.

⁴Ihnü arüh pehjüyeng, Ihnü abi shirücho. Ihnü abi chah ramehcho ko Itparü kuh lang, I nümüsuba chongsahchi Ihnü abi münowüde mümüthehcho.

⁵Jerusalemlarü, atsaya shümüshü ko shuhu neng lanü nührünü ihrü amüi mülongmüzinungepü nyengchoung.

⁶Ramgmü langnü shithsabhülehrünü iba müchiji ko axümlichi, mikhu kyo loh roba hi tuo?

⁷Solomon, Yangthsaba pümji lanü dhipü; Israel la rothsarü nyüh rohrenü müyangpü role.

⁸Arüh atümung nohzikehrü du; arüh athrungrü rothsarüti du, Arüh nyitsarü müipi amala bede khyang nohsheng khüdu-khüdu bile.

⁹Yangthsaba Solomon tsü sing atsaubanü külüpcho Yangthsaba pümji la dhi tsehle.

¹⁰Adong tsü taripinü müshüko; ko hütsü hon-nü riiyohcho shünü müshüko. Apümji tsü Jerusalemlarünü kyahcho ameyü shünü müshüko.

¹¹Zionlarü, ro Yangthsaba Solomon dhingdheng. Abi kukang akünyangu nyümong atpanü athah la thrijüba kuthrisü thrile.