Read Sangtam Naga SOLOMON KHI 5 Bible Online

SOLOMON KHI 5 - Sangtam Naga bible

SOLOMON KHI 5

¹I tbü la Ih züroko, I müitpü, I nitpü. Ih axümlichi ko müchiji khyübülungre; Ih thsakukih müthsüpre; Ih yongkha ko nyikih yongre. Amüinü mümüchade, I müibong, tsung, yong!

²Ih yüp nye I lümkang licho. I müibongnü kukhang chah hamchi melangcho. Ih zürosohng, I müilatpü, I nitpü. Yingkihnü I thah kyangle, ko müdhrangnü I kuva yüyüple.

³Ih jengki mükhyü, tuthsanung thali khyünung? I jing thsüthohko; tuthsanung thali münyisohnung?

⁴I müibongnü akheh kukhang la tohyohchücho, ko abi amünyethsa rochonü Ih dhridhricho.

⁵Ihnü abi zürosohnyücho. Ihnü kukhang kheh ramehji chah ramehde, I kheh ko I müyungza müchiji kihnü jengcho.

⁶Ihnü I müibong khyang khangthrujücho, ta abi tsipehpü licho. Ihnü abi yuva khüta nyinyücho! Ihnü abi yangchicho, ta müngu; Ihnü abi dsicho ta tu müyuchi.

⁷Yangdi thsehyarütinü Ih ngucho; arühnü I chah xüp thsakehjücho; yangdi tbükhüm nyahrünü I kuthri rehnahjücho.

⁸Jerusalemlarü, nührünü I müibong shirükhang, I lümtohchonü tase müzeh licho yonungepü nyengchoung.

⁹Khingkurüti yola atsah tsalatpü, aparü atümung tenü nü müibong pathsa mah-o? Nü te abi nengdang nyengchonungthsa abi tu pathsa licho?

¹⁰I müibong tsü pümtrung atsa ko re azeh; hajar dhüre la abi khüdu.

¹¹Aromih imüyeng ko anana; abi kuva khüyahla kyo anyah ko ji-ile.

¹²Anahtse tsü yongkhi shündhün mümüdhrü kyo atsah atsa, mümüdhrü yongkhi shündhün nyikih la mütsahpü pümcho kyo.

¹³Amüchüp tsü singvarova ko axümlichi chiba tbü kyo amüinung kehle. Abeküp tsü lurü yungpi kyo müchijinü kyang lile.

¹⁴Akheh tsü khütang müjangle, ko imüshi thsidi lung zehpü. Afü tsü safire thsidi lung yoh thsüro-hanü külüpcho kyo anana.

¹⁵Aphüm tsü hon yohnü külüpcho alabaster dongdi kyole. Abi adhengnung tsü cedar singnü khüpticho Lebanon zong kyole.

¹⁶Abe tsü amüthsüpnung anyiyah; abi nengdang lüpchonü Ih müshülire. I müibong tsü hi kyole. Jerusalemlarüti.