Read Sangtam Naga Isa 1 Bible Online

Isa 1 - Sangtam Naga bible

Isa 1

¹Juda yangthsarü Uzia, Jotham, Ahaz ko Hezekiarü chichah, Amoz tsurü Isayanü Juda ko Jerusalem nengdang ngucho müngucheh.

²ABÜDONGBAnü yocho, “Ning ko Alih, I yu nyieng! Ihnü nümüsuba tsuzarünü Ih nyüm yare.

³Misüpungnü palu abüdongrü müdhere ko gadunü palu abüdongrü tsüpre. Ta Israelrünülü mümüdhe. Arühnü seh münyicheh.”

⁴Aya! amünyi yucho, nührü athsangnyang ko amütsarü! Nührü münyinü nührü tphahtsuko! Nührünü Israel Amüsa Tsingrang ABÜDONGBA mükhyücho ko Abi tenü ximülako.

⁵Tuepü nührünü mütozah nyümro? Nührü alaa khingchisohnyürü mah-o? Israel, nührü thah mathsanü jengko ko nührü lasih ko thoh thsangnangle.

⁶Nührü fü la mungthri lanü jing chii dsi-osü atsa müle. Axüpnacho mathsa ko aihanü nührü fü jengko. Nührü mathsa tsü müthsüthoh, mahkhang mürümti ko moi tusü mümünoh.

⁷Nührü limih changpehjüko, ko nührü yangditi alih la rongkeh trüpko. Nührü betenü, shuparünü nührü lih khyünung ko lüpcho thsangnyangjünung.

⁸Jerusalem du nyingnung, mükangtipü shükusih yola mahkhang nushah luh la anyahrü ko atsungti müliba mütpahvi kyo.

⁹Akohbong ABÜDONGBA apunü nyitsarü khürü münyingsohrelang, Jerusalem tsü Sodom ko Gomora kyo changpehpü liba thsako.

¹⁰Jerusalem, nührü yangthsarü ko müyurüti Sodom ko Gomora kyole. ABÜDONGBAnü nührü te yoba tsü nyieng.

¹¹Abinü yore, “Kangmübü hidoi Ih mübo jüba Ihnü khyünyürepü nührünü lümrü mah-o? Nührünü kangmübü trüpba san ko nührü kanglungrü akangpü chahnü asu tenü Ihnü alaa nguko. Misüpung, san ko miza shühnü Ih müthohko.

¹²Ih mübünung rode sünü nührü te hiri hironung yocho? I amübükuh la hidoi drümdrümnung sünü yocho?

¹³Amübü hironung tu thsütah müle. Nührünü trüpba müchiji xümchonü Ih müthohko. Nührü Chonu Asi Thsüti, Sabath nyümong, ko nührü amübü shimükhongba Ihnü mükohdheng; nührü münyinü hütsüri apüm thsangnyangko.

¹⁴Ihnü nührü Chonu Asi Thsüti ko chühmüti thrünyire; hütsüri I nengdang bhamüling ko hütsürinü Ih müthohre.

¹⁵“Nührü kheh dhimüsu dangkhidangnangde, Ihnü nührü chah müdhengkehnung. Nührünü khüdoi dangkhidangnang nye, Ihnü münyinung, tunüo nührü kheh ashühnü jeng lile.

¹⁶Nührü jangjang müsa thsüthohng. Ihnü ngu nührünü amünyi nguchiba hi apüm nyehlieng.

¹⁷Amünyi nguchi zahng ko athsalang tsü nguchinung nyichoung. Yujeba tsü nguching, sehchirü troung, mürürü arüh athsalang ngusohng, ko chomirü khüm.”

¹⁸ABÜDONGBAnü yore, “Ade, Ihsanü müjang lümdhengnung. Nührü münyinü ashüh kyo moh nye, Ihnü nührü mürang kyo thru thsüthohjünung. Nührü nyahthrüm linye, nührü shunbüh kyo thru kangnung.

¹⁹Nührünü I yu nyikhang, alih lanü chürocho atsa tsü nührünü tsunung.

²⁰Ta nührünü I tenü zakhang, nührü sünung. Ih, ABÜDONGBAnü choko.”

²¹Khüdupi longlang liba yangdisü nahtrahnaxenglarü kyo kangko! Khüdupi hütsü amüsarü dunü jeng licho, ta ade nyitsarü mapsehrü dunü jengko.

²²Jerusalem, nüh khüdupi taripi kyo licho, ta ade nüh akhyüchah müle; khüdupi nüh phüpkih kyo licho, ta ade nüh kih du.

²³Nührü langnürüti anyümrü ko aführü shangrüti du; arühnü lede jiyü ko pohsa khyüre. Arühnü khodesü yukhachah mürürü mükhümre mahkhang chomilarü khiyu münyidhengre.

²⁴Hütsüeko ade, Akohbong ABÜDONGBA, Israel Tsingrangnü yoba yu hi nyieng: “Ihnü nü chah rühyangnung, I rorüh, ko adelü nühnü I khyang tu chongcha müjüchehnung.

²⁵Ihnü nüh nyüm nguchinung. Idhse müluchehcho kyo, Ihnü nüh müsachehjünung ko amümüsa apüm pehjünung.

²⁶Nührü papade licho kyo, Ihnü nührü khyang yangthsarü ko lümlong jürü yohpüjünung. Hütsüde, Jerusalem te Amüsaba, longlangba yangdi pü dsinung.”

²⁷ABÜDONGBA tsü Amüsaba thsachonü, Jerusalem ko hütsüla lirü sürünü lasih thsamülaro arüh khümchonung.

²⁸Ta amünyi shitpahrü ko anyümrü atümung Abinü changsohnung; Abi pehjürü atümung Abinü kyüsehnung.

²⁹Nührünü singdong mübüba ko amüsa tbü tbücho nengdang wah lümnung.

³⁰Nührü tohkung tsiba langsing ko kih müxahba tbü kyo mükupehnung.

³¹Mitsoh michangnü manying trüpcho kyo, athrungrüti palu amünyi nguchinü changnung, ko athsangnyang tsü sünüsü müyatichehnung.