Read Sangtam Naga Isa 11 Bible Online

Isa 11 - Sangtam Naga bible

Isa 11

¹Ko Jesse yahnbüh lanü anu khüdu chinung, ko abi ara lanü ajengza khüdu chüronung.

²Ko ABÜDONGBA nbü abi chah linung, lümlong ko anyichehba anbü, tbachijüba ko tase anbü, amüdhe ko ABÜDONGBA drüba anbü.

³Ko ABÜDONGBA drücho la abi akünyang ngunung. Abinü anguchonü ko ayuchichonü yu mükhanung;

⁴abinü ailümrü yu tsa khanung ko atrorü mülirü athsalang khümnung. Abi yuzeng la müyurü khingchinung, ko amütsarü sünung.

⁵Abinü abi müyurü michah thsingpü yuje la yangthsanung.

⁶Rangfü e Sanrü khüdu la linung, ko khünyingnü mizaza yola yüpnung. Misüza e kihkhünyingza müjang tsuyongnung, ko azarü khüdunü arüh xükümnung.

⁷Misü e shühmü nyüh tsurütanung, ko misüza e shühmüza khüdu la yüpnung. Kihkhünyingnü misü kyo manying tsunung.

⁸Akhungarünü müyüh kehba mürü te shaja nye tu müthsanung.

⁹Tsingrangba Amüsa zong Zion la, lerohpehnung mahkhang tu amütsa mülinung. Kihdi tsü kihnü jengmülümcho kyo, limih tsü ABÜDONGBA müdhebanü jeng linung.

¹⁰Jesse ra lanü yuchoti te amüdhethsa yangthsarü asi khüdu chüronung nyümong tsehle. Arühnü abi yangthsaba yangdi la shibülungnung ko abi khyang adhichi jünung.

¹¹Hütsüba nyümong rode, ABÜDONGBAnü thali Abi tase bichinung ko Assyria ko Ijip la, Pathros Ethiopia, Elam, Babylon ko Hamath lih lanü ko kihbekhüm ko mütro la pehjo liba Abi müyurüti arüh kuh lang thali noronung.

¹²Shupishuza liba Israelrü ko Judarü limih jongnah müyü langnü nübülungcho yuchoti khyang ngusohnung, Abinü amüdhethsa nisan dhimüsunung.

¹³Adelü Israel yanglihnü Juda nah mümohnung, ko Juda tsü Israel rorüh müthsanung.

¹⁴Arüh yohrütapü nyüzüdulang Filistinrü mahnung ko nyüchürolang liba müyurü mahchehnung. Arühnü Edomrü ko Moabrü kohnung, ko Amonrünü arüh yocho nyinung.

¹⁵ABÜDONGBAnü Suez kihkong kungchehsohnung ko masünü lahkhu tsichehsohnung yongza dhünyeh chah khu Eufrates kungchehsohnung Abinü nyübong adhsa müthehnung.

¹⁶Amütrüh Israelrü nengdang, arüh jümürünü Ijip pehjüde tikehcho kyo Assyria lih khu lang tungte khüdu linung.