Read Sangtam Naga Isa 14 Bible Online

Isa 14 - Sangtam Naga bible

Isa 14

¹ABÜDONGBAnü thali Abi müyurü Israelrü te yanglilümnung ko apu yo kang throchehnung. Abinü arühbürü lih la tsü thali lisohnung, ko shuparüsü ro hütsüla arüh yola linung.

²ABÜDONGBAnü arüh khyang jüba lih lang thalisohnung yuchoti adrongnü arüh tronung, ko hütsüla yuchotinü ayurü kang Israelrü dikehnung. Sürünü amüngu Israelrü mahcho ade Israelrünü mahnung, ko khüdupi arüh sehchirü michah tsü Israelrünü yangthsanung.

³ABÜDONGBAnü Israelrü khyang arüh adhsa ko chongcha ko arüh khing nguchisohcho lanü akyahshang jünung.

⁴Abinü hi nguchide, arühnü Babylon yangthsaba münyüjo yonung: “Atsüroh Yangthsaba khüluko! Adelü abinü süsü müsehchichehnung!

⁵Rihlong chüro müyurü khingchiba ko arühnü amahchehcho yuchoti münyehli dhsümthseba amütsa yangthsarü tase ABÜDONGBAnü changsohko.

⁷Adelü liküprü tbachi kyahshangre, ko atümungnü akünyangnü khi thsare.

⁸cypres sing ko Lebanon la Cedar singnü Yangthsaba khülucho nengdang künyangre, tunüo adelü abi mülirü tsü, arüh repehnung süsü müle!

⁹“Asü lihnü Babylon Yangthsaba khyüchonung rungnüm yale. Limih la mülahchirü anbüti mühachimüsure. Yangthsarü nbüti arüh yangthsaba pümji lanü shemüsure.

¹⁰Arüh atümungnü abi te yocho, ‘Adelü nüsü ihrü kyo suh müzeh! Nüh ihrü kyo lile!

¹¹Tbenglah bi khi thsa nüh dhichicho, ta ade asü lih la nüh lile. Apihnü nü chongnong jeng, ko axahnü nüh tsüti yüpre.’ ”

¹²Babylon Yangthsaba, anyangnyü avisa püti, nüh ning chahnü shohjoko! Atsicho la nühnü yuchoti kohcho, ta ade nüh alih la khülusohko.

¹³Nühnü ninglanglih chii küdupü chenghi amungthriuba chah nü pümji külüpnung dhrongchehcho. Nühnü tsingrangti shimükhong chah kihku lahpi azong chah tsü yangthsaba kyo pümnung lümcho.

¹⁴Nyükhi michah küdupü Akohba kyo linungepü nühnü yocho.

¹⁵Ta, chünyelü nüh apohkiba asü lih la nücho lile.

¹⁶“Asünü nü chah dhenglah dheng lümdheng. Arühnü tsingdhengnung, ‘Alih dhi shühchijüba ko yanglihti dhridhrisohbasü hivi mah-o?

¹⁷Yangditi changjo ko limih asongsong kangsohba tsü hivi mah-o? Arangyohrü khodesü mümüthehba ko arüh kuh lang müwüsohba tsü hivi mah-o?’

¹⁸Limih la yangthsarü apüm arüh ahechi kong la yüpjole,

¹⁹ta nülü nü kong müle, ko nü me mii sütpah lile. Khata la kyüsehcho rothsarüti menü bhümti lile, lungrah la dhiyohchüpeh ko dhrümchi lile.

²⁰Nühnü nüpu limih changsoh ko nüpu nyitsarü süsohchonü, nülü aparü Yangthsarü kyo müdhrürangnung. Nü kukhi lanü süsü münyingnung.

²¹Kyüsehnung dikehng! Arüh jümürü münyi ngang hiba yangthsaba tsurüti sünung. Arüh sü khyangsü hiba lih la yangthsa müthsasohnung mahkhang arüh yanglih mükülüpsohnung.”

²²Akohba ABÜDONGBAnü yore, “Ihnü Babylon mahnung ko hütsü changjünung. Ihnü azarü ko amütrüh süsü nying müpehjünung. Ih, ABÜDONGBAnü choko.

²³Ihnü Babylon tsü changtphü kangsohnung, ko hütsüla phohphu kehsohnung. Ihnü kuwohsing bi Babylon wohpehnung. Ih, Akohbong ABÜDONGBAnü choko.”

²⁴Akohbong ABÜDONGBAnü yuchümko: “Ihnü tu chungko hütsü tikehnung. Ihnü tu nguchinung dhrongcho hütsü nguchinung.

²⁵Ihnü I lih Israel lanü Assyriarü changsohnung ko I azong chahnü arüh dhrümchinung. Ko I müyurü Assyriarü kheh lanü ko arüh bhamüling hicho lanü lehchehjünung.

²⁶Liküp nengdang hi I lümchung, ko yuchoti khingchinung I kheh dhimüsuko.”

²⁷Akohba ABÜDONGBAnü hi nguchinung dhrongchehko; khingchinung Abinü akheh dhimüsuko, ko sünüsü Abi müyaticheh.

²⁸Yangthsaba Ahaz süba kang la yusi hi sobhocho.

²⁹Filistinrü, nührü xüpji idong tsü khyahsahko, ta nührü tu künyangnung müle. Mürü khüdu süde, hütsü mülih amütsauba khüdu rore. Mürü kyü lanü lakung mürü khuchehre.

³⁰ABÜDONGBA tsü Abi müyurü Israelrü san-nyahrü thsanung ko Abinü arüh khümcho nünung. Ta Abinü nührü Filistinrü michah yangkong arangcheh müthehnung, ko hütsünü nührü süsü akang müpehjünung.

³¹Nührü Filistin yangditi, tranü arüku ching! Drümüyang, nührü apüm! Kihku lahpinü asongsong nyükhi khüdu tsehle; hütsü tusü müdrüba rothsarü.

³²Filistia lanü rorüh yuhirü te topü lalingnung? ABÜDONGBAnü Zion külüp-pehko ko chongcha liba Abi müyurüti hütsüla tsikehrepü arüh te yonung.