Read Sangtam Naga Isa 16 Bible Online

Isa 16 - Sangtam Naga bible

Isa 16

¹Lipilih lang Sela yangdi lanü Moabrünü Jerusalem la Yangthsaba khyang sanza khüdu jiyü müthehre.

²Arühnü Arnon Yongkhi bekhüm la yingre ko uza asüp lanü müthehde kyo, arühnü tu nahdhengkeh mülipü wüli-roli rachire.

³Arühnü Judarü te yorü, “Ihrü te tu nguchinung young. Nyüthung la singdong khüdunü akhümki jücho kyo, ihrü tsungtieng ko nü khümki ihrü kyahshangsohng. Ihrü atsichi rümchirüe; sünüsü müngunung la ihrü rangsohng.

⁴Nührü lih la ihrü lisohng. Ihrü changsohrü chahnü ihrü khümchoung.” (Sehchiba ko thsangnyangjüba changkanung, ko limih thsangnyangjürüti kingkanung.

⁵Hütsüpü David chahnü trahchocho nyüh khüdu Yangthsaba kangnung, ko abinü müyurü michah yuje cho ko amüi la yangthsanung. Abinü tu athsalang hütsü dhsüthsa nguchinung, ko yuje du tsü abinü nguchisohnung.)

⁶Judarünü yore, “Moabrü müthsehcho ihrünü yuchiko. Arüh hongzicho ko kükhingcho ihrünü müdhele, ta arüh tüzümükhümba tsü adeng.”

⁷Moabrünü chongcha mürang tranung. Arühnü Kir Heres yangdi la tsuba tsuyongnung atsa tsü lümchehde, arüh apümnü tranung. Arüh longri iipehnung.

⁸Heshbon shündhün yoza ko Sibmarü shükusiluh changsohko, hütsü shükusiluh lanü yongkha külüp yangthsarüti müchasohcho. Bekhyah khüdu la shükusiluh tsü Jazer yangdi chii, nyüchürolang lipilih, ko nyüzüdulang Asü Kihdi chii licho.

⁹Ade Ihnü Jazer nengdang tracho kyo, Sibma shükusih nengdang trare. Heshbon ko Elealeh nengdang I nahshükih threhre, tunüo müyurü künyangnü maxasohnung müle.

¹⁰Adelü lihsu luh la tsü süsü künyang müle. Shüsiluh la tsü sünüsü müzüdere mahkhang khi müthsare. Sünüsü yongkha külüpnung shükusih müdhrümre; akünyang yuva changkako.

¹¹Ihnü Moab nengdang rühchire ko Kir Heres nengdang longrire.

¹²Moabrünü azonglang amübükuh lang dangkhidangnangnung wüchonü müthohre, ta hütsünü arüh tu müjingchonung.

¹³Yusi hi ABÜDONGBAnü akhudinü Moabrü khyang müdhesoh licho.

¹⁴Ko ade ABÜDONGBAnü yore, “Kang asang la Moab kuthsi hidoi hi changpehnung. Nyitsarü hidoi lanü, aza du nyingnung, ko arüh tsüsü re müzehrü du thsanung.”