Read Sangtam Naga Isa 19 Bible Online

Isa 19 - Sangtam Naga bible

Isa 19

¹Hiba hi Ijip nengdang yusi. ABÜDONGBA Ijip lang, nyükhi la pümpü tsaya rore. Ijiprü kyothritinü Abi jingte dhridhrire, ko Ijiprünü müsi sümpehre.

²ABÜDONGBAnü yore, “Ihnü Ijip la müyurü kahla khata chürosohnung ko jünirüe jünirürü kahla ko kurümrüe kurümrürü kahla nyümtasohnung. Mükehta liba yangditi kahla khatanung, ko nyümta liba yangthsarüti tase nengdang rutanung.

³Ihnü Ijiprü lümchung thsangnyangjünung ko arüh lümlong kyüchosohnung. Arühnü arüh kyothri te atroba chingnung, ko amongrü ko asürü anbü te müchehnung.

⁴Ihnü Ijiprü amütsa ko akhürah yangthsarü khehla jünung, ko abinü arüh michah yangthsanung. Ih, Akohba ABÜDONGBAnü choko.”

⁵Nile yongkhi la kih nyehnung, ko khainü yongkhi tsü kungpehnung.

⁶Yongkhi kihrü nyeh tside asüh xümnung. Thoh ko za mükunung,

⁷ko Nile kihbekhüm ayung la tsahma yohba tsü kungpehnung ko fotsinung.

⁸Nile yongkhi la ngu xoh akang lirü apüm rühchinung ko tranung; arüh nguxohsing ko yojeh akhyüchah mülinung.

⁹Shü anana kyahrü wahnung;

¹⁰shükyahrü ko thsangyangrü apüm nguchi mülinung ko wahnung.

¹¹Zoan yangdi langnürüti dohko! Ijiprü amüdherünü amüthsalang thülako! Arühnü khüta Yangthsaba te arüh tsü papade amüdherü ko Yangthsarü mülihrüepü yochehcho?

¹²Ijip Yangthsaba, nü khyang lümlong jürü asithsarü hütsüdoisü khülo? Kümüdeo Ijip nengdang Akohba ABÜDONGBA lümchung tunang nü te yonung.

¹³Zoan ko Memfisrü langnürüti dohko. Yucho tsü arühnü nünung mülih, arühnü nümülako.

¹⁴ABÜDONGBAnü arüh khyang lümdhama lümlong jücho. Hütsü khu, Ijiprünü lüpcho thsameh nguchire ko amücharü kyo apu mülühcho la ngahsehre.

¹⁵Ijip la alirü, mahkhang ailümrü, atungte mahkhang ashusha, sünüsü mütrochehnung.

¹⁶Ijiprü tsü khingkurü kyo alü kangnung becho chihle. ABÜDONGBA kheh arüh khingchinung dhimüsude, arüh adrüchonü dhridhrinung.

¹⁷ABÜDONGBAnü arüh nengdang nguchicho arüh suro lümcheh müipi Ijiprünü Judarü drünung.

¹⁸Hütsüba nyümong rode, Ijiprü yangdi münga la Ibri yu chonung. Hütsüla lirütinü Akohba ABÜDONGBA nengla yuchümnung. Yangdi khüdu te, “Nyü Yangdi,” pü dsinung.

¹⁹Hütsüba nyümong rode, Ijip lih la ABÜDONGBA bholu khüdu ko Ijip lurü la abi khyang müsacheh jücho dongdi khüdu linung.

²⁰Arüh tsü Ijip la ABÜDONGBA licho amüdhethsa linung. Hütsüla nyitsarüti sehchide, arühnü ABÜDONGBA te arüku chingnung, ko Abinü akhümchorü khürü müthehnung.

²¹ABÜDONGBA apunü Ijiprü te mishanung, ko arühnü Abi müdhenung, ko Abi mübünung, ko Abi yang kangmübü ko amübü hironung. Arühnü Abi te yuchüm nyengchonung ko arühnü hütsü nguchinung.

²²ABÜDONGBAnü Ijiprü khingchinung, ta Abinü arüh kyangjünung. Arühnü Abi yang ximülanung, ko Abinü arüh akihchiba yuchi arüh kyangjünung.

²³Hütsüba nyümong rode, Ijip e Assyria nyüh kahla langtungte khüdu linung. Hütsüba yanglih anyüh la lirü müyurüti wüliwüronung, ko yucho anyüding müjang mübünung.

²⁴Hütsüba nyümong rode, Israel tsü Ijip ko Assyria jingdrang la küronung, ko lihküp nengdang arüh asang tsü amüwanung thsanung.

²⁵Akohba ABÜDONGBAnü arüh müwajo yonung, “Ihnü nüh müwajünung, Ijip, I müyurü; nüh Assyria, Ihnü nüh thricho; ko nüh, Israel, I throchehcho müyurü.”