Read Sangtam Naga Isa 21 Bible Online

Isa 21 - Sangtam Naga bible

Isa 21

¹Hiba hi Babylon nengdang Yusi. Lipilih lahkhu tsingrangrü chita nyübong fücho kyo, adrünung limih khüdu lanü achangka ronung.

²Ihnü kihyochüba, ko achangba amütsa müngucheh khüdu nguko. Elam rothsarüti, mahng! Media rothsarüti, yangdi tsü betieng. Babylonrünü jüba chongcha tsü Tsingrangbanü changkasohnung.

³Ihnü müngucheh la nguba ko yuchiba tsünü Ih drüsohcho, ko khingkurü mikhung thsade kyo thsacho.

⁴I thah ngure, ko adrüchonü dhridhrire. Manung nahkohthsa licho, ta adrü du hirojücho.

⁵Müngucheh la tsü thsüti khüdu küdangcho; ko shirü pümsohnung phah khyangpüjo ngucho. Arüh tsuyong licho. Dhrongyengnü anüchibanü mehcho: “Adirüti, nührü tsung rungnüm!”

⁶Hütsüpü ABÜDONGBAnü I te yocho, “Wüng ko roshengrü yasohng, ko abinü tu ngunang yusi jüsohng.

⁷Abinü kuri chah nyüh anyüh-anyüh pümpü, ko gadu ko ut chah pümpü ro ngukhang, abinü hütsüri longi dhengsohng.”

⁸Roshengba tsünü züdecho, “Adirü, Ih ama atsingse mükhyang I yaji la nyah yare.”

⁹Dhrongyengnü, arüh role! Kuri chah nyüh anyüh-nyüh pümpü. Roshengba tsünü yusi jücho, “Babylon khüluko! Arühnü mübüba kyothri apüm alih la mapnah jole.”

¹⁰I müyurü Israel, nührü litoh kyo nyehko, ta ade Ihnü Israel Tsingrang, Akohba chahnü yuchicho yusi nührü te müdhesohko.

¹¹Hiba hi Edom nengdang yusi. Khürünü Edom lanü Ih dsicho, “Roshengba, khode ama hi khukhangnung? Hütsü khode changkanung I te young.”

¹²Ihnü lalingcho, “Tsingsele, ta ama thali ronung. Thali tsingdhengnyükhang, thali ro tsingdheng.”

¹³Hiba hi Arabia nengdang yusi. Akungase Arabia lih la shitsehrü müdong liba, nührü Dedanrü,

¹⁴nührü yang rorüh axosehrü khyang kih tieng. Nührü Tema lih la lirüti, atsichirümchirü khyang tsuyongnung jüng.

¹⁵Arüh kyüsehnung mii liba nohsheng, kyanung tbengkeh liba singthsalu ko khata dhsürü apüm lanü müyurütinü rang tsire.

¹⁶Hütsüpü ABÜDONGBAnü I te yocho, “Kang khüdu la Kedar yucho mülahba tsü changkapehnung.

¹⁷Kedar la singthsalu birü tsü akurahrüti lile, ta arüh aza du nyingnung. Ih, Israel Tsingrang ABÜDONGBAnü choko.”