Read Sangtam Naga Isa 26 Bible Online

Isa 26 - Sangtam Naga bible

Isa 26

¹Juda lih la müyurünü khi hi thsanung nyümong khüdu tsehle: Ihsa yangdi re azeh! Tsingrangba apunü tbü tsü tsungtinung!

²Yangdi tbükhüm khangthrung ko longlangba yucho zürosohng, athsalang nguchiba yucho müyurü.

³Nüh, ABÜDONGBA, nahdhengkeh drengdreng yohpürü ko Nü chah longlangrü khyang adekheng yangtsa jüng.

⁴ABÜDONGBA chah achangka müli longlang; Abinü lede Ihsa tsungtinung.

⁵Abinü amüthsehrü lüsohre; Abinü arüh yangdi akhümkhüm thsangnyangjüre, ko yangdi tbü asongsong kangsohre.

⁶Sehti lirünü ade hütsü michah tsehchire; ko arüh jing pohki dhrümchire.

⁷ABÜDONGBA, nyitsarü atsa nengdang Nühnü lang atsa külüpjüre; arüh tsehba lang tsü angah.

⁸Ihrünü Nü lümcho la tsehre ko ihrü alongdi Nü chah lile; ihrünü mükhyahba apümnü Nüh du.

⁹Aromang I lasih apümnü Nüh mükhyahre; Nühnü limih ko müyurü yukhade, yujeba tsü arühnü müdhenung.

¹⁰Nühnü amütsarü te amüi ngusoh nye, arühnü atsa nguchinung münyichore. Hila Amüsarü lih la mii, arühnü amütsa du nguchire; arühnü Nü dicho müdhengchehre.

¹¹Nühnü arüh khingchinungepü Nü rorütinü mümüdhe. ABÜDONGBA, arüh ashah khyüsohng ko arüh chongchasohng; Nühnü arüh nengdang yohpüjüba akhingchi tsünü arüh chongchasohng. Nühnü Nü müyurü müicho arüh khyang ngusohng.

¹²Nühnü ihrü pungrohirosohnung, ABÜDONGBA; Ihrünü nguchichehba lüpcho hi Nü nguchi khu lile.

¹³ABÜDONGBA, ihrü Tsingrang, ihrü michah bürünü yangthsacho, ta Nüh du ihrü ABÜDONGBA.

¹⁴Adelü arüh sopehko, thali müronung; arüh anbü thali mükangnung, tunüo Nühnü arüh khingchiko ko changjüko. Sünüsü adelü arüh mülümchehre.

¹⁵ABÜDONGBA, Nühnü ihrü yucho zisohcho, apümlang lurü zikehjücho; ko hinü Nü nengse hiroko.

¹⁶ABÜDONGBA, Nühnü Nü müyurü khingchiko, ko arühnü longri Nü te kihchicho.

¹⁷Nüh, ABÜDONGBAnü, ihrü trasohko, khingkurü mikhungde athsachonü tracho kyo.

¹⁸Ihrü thsacho ko khingchi licho, ta ihrünü tu münümüsu. Ihrü lih nengdang tu akoh müngu; Ihrünü tusü münguchicheh.

¹⁹Ihrü nyitsarü sürü sücho arüh thali kanglinung! Arüh fü kangli ronung. Kong la yüpjorü apüm jesunung ko akünyangnü khi thsanung. Yingkihnü alih tbachijücho kyo, süpü anyahli lirüti, ABÜDONGBAnü kanglisohnung.

²⁰I müyurüti, nührü kuh lang züdung, ko kukhang khangtieng. Tsingrangba rihlong mümülüde nührünü azachah rang püm.

²¹Limih nyitsarü arüh münyi ngang khingchinung, ABÜDONGBA Abi liji ninglanglih lanü rore. Limih la rangnü mapsehchoti mishanung, ko alihnü amapsehcho mürangpünung.