Read Sangtam Naga Isa 27 Bible Online

Isa 27 - Sangtam Naga bible

Isa 27

¹Hütsü nyümong ABÜDONGBAnü akhürah kijang ko arahmütsa dragon ko kihkangdi Abi mürelung zehba nohnü kyüsehnung.

²Hütsü nyümong ABÜDONGBAnü Abi alongnyüpnung shükusiluh nengdang yonung,

³“Ihnü hütsü dhengyehre ko mütozah kih tihre. Hütsü sünüsü müthsangnyangsohnung Ihnü ama atsingse nyahre.

⁴Adelü Ihnü shükusiluh te zii müchürore. Hütsüla zeng suropü du Ihnü arüh riri trüp-pehnung.

⁵Ta I nyitsarü rorütinü atsungtiba khyünyükhang, arühnü I te yangtsa külüpm. Ho, I te yangtsa külüpsohng.”

⁶Aronung nyümong la, Jakob chahnü trahchocho Israelrü singdong kyo ara ranung, ko arüh chahnü anu chüro api pinung. Arüh chahnü sihcho singsihnü limih jengnung.

⁷Israelrü tsü ABÜDONGBAnü arüh rorüh kyolü mükhingchi mahkhang arüh nyitsarü deelü müsü.

⁸ABÜDONGBAnü apu nyitsarü yangtsi lang mütheh arüh khingchicho. Abinü nyüchürolangnü nyübong amütsa rosoh arüh notsicho.

⁹Ta Israel münyi tsü müyudsirü bholu lung tsü asongsong mükangde, müchiji bholu, mahkhang Ashera tsingranglatpü kyothri tsü müpehde arüh mülang müpehjünung.

¹⁰Atbüticho yangdi tsü trümtsu thsangnyang lile. Hütsü akungaselih adeng kyo pehko. Hütsü kanglungrü lamungchah kangko.

¹¹Singdong jengzati müku sotsire, ko khingkurünü atahnung yure. Nyitsarütinü tu münyichehchonü, Akülüprü Tsingrangbanü arüh müchomangnung.

¹²Hütsü nyümong, Eufrates lanü Ijiprü lurü chii, mawicho kyo, ABÜDONGBAnü Abi nyitsarü khüdu khüdunü throchehnung.

¹³Hütsüba nyümong rode, Assyria ko Ijip la Israelrü yangtsi lang lirü apüm dsilinung rühti khüdu mehnung. Arühnü ronung ko Amüsa khang chah, Jerusalem la ABÜDONGBA mübünung.