Read Sangtam Naga Isa 28 Bible Online

Isa 28 - Sangtam Naga bible

Isa 28

¹Israel yanglih ahohah! Müchamülohrü arüh langnürü thah chah yungpi kuthri mükutpahcho kyo, Israel ahechi changkako. Arüh tüzümükhüm thah chah axümlichi thohkehcho, ta arüh hütsü pohki müchatpahpü jole.

²Arüh mahnung shurü roh-i sühnung, tsingxinyübong kyo ronung, thotho kihmülüm kyo, ko alih mülümphanung ABÜDONGBA yo rezeh, ko amüküprü khürü lile.

³Hütsüri amücharü langnürü amüthseh tsü jing pohki dhrümchinung.

⁴Ahechi chang tsiba hütsüri amüthseh langnürüti tsü, akhu nyicho ngurüsih akhu laatsucho kyo changpehnung.

⁵Amütrüh ko müyurü nengdang ABÜDONGBA tsü ahechi yungpi kuthri kyonung nyümong khüdu tsehle.

⁶Sürünü yukharo arüh khyang yujeba ko tbükhüm nyahrü khyang müsi mülah lümlong Abinü jünung.

⁷Azikehrü ko bebürüti mii khura yongchonü khüluchicho. Arühnü phüpkih yongkha tsü dira yongchonü lümdhama khüluchicho. Tsingrangbanü jücho müngucheh münyichehnungthsa azikehrü tsü dira müchacho, ko arüh yang hirocho khiyu mükhachehnungthsa bebürü tsü khura müchacho.

⁸Arüh pümba tsingthsang tsü dsi-o mii akung müli mülüzicho.

⁹Arühnü Ih nyüm yacho. Arühnü yocho, “Hütsüvi tsünü süte torepü lümro? Abinü docho sünü nyinung? Hütsü ade suro akhungarü nengdang du lile.

¹⁰Abinü Ihsa te yutse khüdu-khüdu, arü khüdu-khüdu azikyükyahnü donung müküpre.”

¹¹Nührünü I yu münyikhang, Tsingrangbanü nührü te shuparü münyichehba yunü dosohnung khürü bichinung.

¹²Abinü nührü atümung khyang akyahshang ko atbachi jüre, ta nührünü Abi yu münyire.

¹³Hütsü khu ABÜDONGBAnü nührü te yutse müipi, arü- arü ko akhikyükyahnü dore. Hütsüde, nührü mütrah müipi müthikehnung. Nührü lerohpehnung, xohnung ko rangyohnung.

¹⁴Ade Jerusalem la müyurüti michah yangthsarü nührü ahongzirü, ABÜDONGBAnü tu yoro nyieng.

¹⁵Asürü te yangtsa külüp ko asürü limih te azengtacho külüpko pü nührünü müthsehre. Achangba rode hütsünü nührülü müchinungepü lümre, tunüo nührünü arahkheh ko akihyochüba dümpire.

¹⁶Ade, Akohba ABÜDONGBAnü hita yore: “Ihnü Zion la adrengdreng ko akhümkhüm akhengdi müdongre. Hütsü apümpü lung chah tsü hiroh-i thrah lile, ‘Adrengdreng yudsi tsü arangchosü zehle.’

¹⁷Akhengdi akihsing tsü yujeba ko müchiji amüsa.” Nührünü dümpiba arahkheh apüm tsü shurünü woh tsinung, ko kihmülümnü nührü alongdi tsü thsangnyangjünung.

¹⁸Asüba te nührünü yangtsa külüpba tsü yatinung, ko asü lih te anyengchota külüpba tsü drilinung. Achangba woh jürode, nührünü mükohnung.

¹⁹Hütsünü nührü loli loli, ko nyangnyü müdhe khingchinung. Nührünü hütsü ama atsingse rangchobae. Tsingrangba chahnü yusi asi mükhu adrüba asi hironung!

²⁰Nührü tsü choyoh yula, nyüh khüdu amüyungchü mütsa chongnong akhikyah ko amüpi mütsa shü azikyah müpipü yüpnung müküpcho kyonung.

²¹ABÜDONGBAnü Perazim zong chah ko Gibeon ngah la, Abinü lümcho nguchinung nguchi asi khüdu nguchicho kyo, Abinü khatanung. Abinü Abi nguchi, nguchi asi tsü thüm nguchinung.

²²Ihnü nü khyang amüzahnung jücho tümünyodheng! Nührünü münyodhengkhang, nührü nengdang atsiphünung alaa athsahba thsanung. Akohba ABÜDONGBAnü limih apüm changjünung dhrongchehcho Ihnü yuchiko.

²³I yu nyieng, Ihnü tu yoro hütsü müsijo nyieng.

²⁴Luthsarü sünüsü abi luh mütozah xü akhyümnung rungnüm müyohpüre.

²⁵Abinü khode alih tsü rungnümnang, Jira ko Tonia majüh shure. Abinü mükyuh-mükyuh la litoh ko lüdi shure, ko abinü anang ananglang fürü shure.

²⁶Abinü khüta nguchinung müdhele, tunüo Tsingrangbanü abi te doko.

²⁷Abinü Jira ko Tonia tse lahnung singking amüling mübichire; ta singking ayingya bichire.

²⁸Abinü litoh thsangnyangnungthsa münyehre, ta khütapü atse müchürosohpü nyehchehnung abinü müdhele.

²⁹Lümlong hi apüm Akohba ABÜDONGBA chahnü rore. Tsingrangbanü chungba lümchung tsü atsa ko akoh ngure.