Read Sangtam Naga Isa 30 Bible Online

Isa 30 - Sangtam Naga bible

Isa 30

¹ABÜDONGBAnü choko: “Juda la yangthsarü ahohah, tunüo arühnü Ih nyüm yacho. Ihnü mülümcho lümchung la arühnü tsehcho, ko I lümcho nyüm arühnü yangtsa thrahtacho, ko hütsü khu arüh münyi bhümkehcho.

²I yu müzehpü arühnü Ijip lang arüku chingnung wücho. Arühnü Ijiprü khyang arüh khümsohnyüchonü Ijip Yangthsaba chah longdicho.

³Ta arüh tronungthsa Yangthsaba chah tase mülinung, ko Ijiprünü khümba tsü achangba du mütohnung.

⁴Arüh langbürünü Ijiprü yangditi Zoan ko Hares chihpü linye,

⁵Judarünü arüh mütrochehba yucho khüdu chah longdicho nengdang arühnü suhsünung.”

⁶Kihjing lahpi lipilih la liba kanglungrüti nengdang Tsingrangba yusi tsü hi: “Langbürü tsünü kihkhünying, müyüh kehba mürü ko lakung mürü liba dhsürü lih khu tsehcho. Arüh khyang mütrochehba yucho khüdu khyang arühnü thsidi jiyü arüh gadu ko ut chah zang mühehre.

⁷Ijipnü jüba arüku tsü akhyüchah müle. Hütsünü Ijip te Ihnü, ‘Alü Dragon’” pü dsicho.

⁸Nyitsarüti tsü khüta mütsacho, hütsü lede nengdang amüdhethsa lisohnung Tsingrangbanü I te vakha khüdu la thrahnung yocho.

⁹Arühnü lede Tsingrangba nyümcho, lede arahkheh chocho ko lede ABÜDONGBA adoba münyicho.

¹⁰Arühnü azikehrü yuva müchürosohcho. Arühnü yorü, “Ihrü te yuje nengdang tüdangchi. Ihrünü nyinyüba du ihrü te young. Ihrü te arahkheh choyohng.

¹¹Ihrü lang lanü shehkhung ko ihrü lang tüyati. Nührü Amüsa Israel Tsingrang nengdang ihrünü münyinyüre.”

¹²Ta Amüsa Israel Tsingrangnü hita yore: “Ihnü yocho nührünü layo pehjüre ko shühkhatoh ko kihyochüba chah dümpire.

¹³Nührü mülangko. Nührü ayungshünü adro kehba tbü athseng kyole; dhrongyengnü nührü jamtsunung.

¹⁴Nührü alih füh mapnahcho kyonung, michüh bichinung mahkhang kih khachinung mii atsa dsi-o dusü münyingnung.”

¹⁵Amichahba ABÜDONGBA, Israel Amüsa Tsingrangnü müyurü te yore, “Thali rung ko longlüm khüti I chah longlang. Khang nührü rezeh khümcho linung.” Ta nührünü hütsüta münguchire.

¹⁶Ta nührü rorüh bete kuri chahnü dro tsinung müküpre. Ko tsichehnung lümba tsü athsalang. Nührü kuri tsü tsayalepü nührünü lümre, ta nührü rorüh kuri atsayauba.

¹⁷Nührü rorüh khüdu ngu nührü hajar dro tsinung, ko nührü atümung dro tsisohnung rothsarü münga du athsütah. Akhang chah nisan dong chah khu nührü rothsarüti yo tusü münyingnung.

¹⁸Ta ABÜDONGBAnü nührü te yanglilümnung yingre. Abinü nührü müinung du yingre, tunüo Abinü lede atsa du nguchire. Sürünü ABÜDONGBA chah longlangro, arüh amüwanung.

¹⁹Nührü Jerusalem la lirütinü adelü mütranung. ABÜDONGBAnü thsa lümre, ko nührünü Abi te kihchide, Abinü lalingnung.

²⁰ABÜDONGBAnü nührü thsangthsisohnung, ta nührü te donung apu hütsüla linung, ko nührünü adelü Abi müyangchinung.

²¹Nührü lang thrümeh tside, Abi yuvanü nührü khanglangnü yo yuchinung, “Lang hilang lile, hi iiwüng.”

²²Nührünü hon ko taripinü münohcho kyothri hironung, ko athrünyi kohro khüdu kyo “I nah tenü tsieng!” pü züde dhipehnung.

²³Khodederü nührünü majüh shunang, ABÜDONGBAnü tsing rosoh arüh zinung ko pungro maxanung, ko nührü kanglungrü lamungchah thangchi linung.

²⁴Nührü luh xüba misüpung ko gaduti atsauba manying tsunung.

²⁵Nührü rorüh roshengvi mahcheh arüh nyitsarü kyüseh nyümong, akhang azong mükhu lanü yongkhi pohnung.

²⁶Chonu tsü nyü kyo vinung, ko nyü tsü nyümong dhünyeh thsacho doi dhünyehpinü alaa thsanung. ABÜDONGBAnü Abi müyurü mathsa rümjo kyangjü nyümong hiri apüm tikehnung.

²⁷Ashu lanü ABÜDONGBA zii ko ahechi ngunung. Abinü chode, Abi yu tsü michang kyo trüpre.

²⁸Lüpcho wohtsiba kihmülüm kyo Abinü abe te nyübong müthehre. Hütsünü yuchoti achangnung lang wohtsire ko arüh lümchung amütsa changjüre.

²⁹Ta nührü, Tsingrangba müyurülü Amüsa thsüti romang kyo khithsa künyangtanung. Nührülü Israel tsungtiba ABÜDONGBA Amübükuh lang honglilah bi khi thsa rorüh kyo künyangtanung.

³⁰ABÜDONGBAnü atümung khyang Abi jengrengkeh yuva ko Abi rihlong müdhesohnung. Hütsüla mihmüle, ningki shurü ko tsingxinyübong linung.

³¹Assyriarünü ABÜDONGBA yuva yuchide ko Abi akhingchi adhsa müdhede nehnung.

³²ABÜDONGBAnü arüh thali-thali xüpde, Abi müyurünü tbhang tii honglilah bi khi thsanung. Assyriarü nyüm Tsingrangba apunü khatanung.

³³Assyria Yangthsaba trüpsohnung papadenü müdüm khüdu rungnüm lile. Hütsü dee asoh ko amüza, ko singnü müjung zangtipüle. Hütsü tahkehsohnung ABÜDONGBAnü mihmüle mehkehjünung.