Read Sangtam Naga Isa 34 Bible Online

Isa 34 - Sangtam Naga bible

Isa 34

¹Rung, Yucho apüm! Shimükhong ko nyieng. Limih apüm ko hütsüla lirü atümung hila rung ko nyieng.

²Yucho apüm ko arüh rothsarü apüm te ABÜDONGBA rihlong chürore. Abinü arüh changsohnung mülangjüko.

³Arüh me müdhrürangnung, ta hütsüla asühxüm jonung; ko azong tsü ashühnü müyütpah linung.

⁴Nyü, chonu, ko chenghiti asongsong kangnung. Ning tsü thrahloh kyo loh changkapehnung, ko chenghiti tsü shükusih mahkhang ngurüsih va kyo trülohnung.

⁵ABÜDONGBAnü ninglang yanglih la Abi nohsheng rungnümko, ko ade Abinü changsohnung mülangjücho Edom nyitsarüti chah kyünung.

⁶Kangmübü jücho san ko miza shüh ko asu kyo, Abi nohsheng tsü ashüh ko asunü müyütinung. ABÜDONGBAnü hiba kangmübü hi Bozra yangdi la jünung; Abinü Edom lih la hiba hi akingthrümba arangcheh thsasohnung.

⁷Nyitsarü tsü misüpung ko bongtho kyo khülunung, ko limih tsü ashühnü moh kangnung ko asunü müyütinung.

⁸Hiba shikhe la ABÜDONGBAnü Zion khümchonung ko abükyü rorüti chah rühyangnung.

⁹Edom yongkhi tsü alküdüra kangnung, ko alih su tsü miphoh kangnung. Limih apüm alküdüra kang trüpnung.

¹⁰Hi ama atsingse trüp du linung, ko hütsü lanü mikhu lede chüro du linung. Alih tsü shangnü shang apehlih kangnung, ko sünüsü hütsü lahkhu müshitsehnung.

¹¹Alih tsü phohphu ko khüyahlanü jengnung. Ko ABÜDONGBAnü alih tsü hütsü müthriede licho kyo akung lisohnung.

¹²Alih la yangthsarü süsü mülinung ko langnürüti apüm changkanung.

¹³Atbüticho yangditi ko yangthsarü kuhla tsü zeng ko zengdong chinung, ko hütsürila shirung ko phohphu du linung.

¹⁴Rangmü kanglungrünü hütsüla mungnung ko motsingnü arüh dsita rachinung. Kyahshangnung yangchi ama tsingranglarü ronung.

¹⁵Phohphunü hütsürila arüh süp shünung, akyü kyünung, khuchehnung ko nüchehnung. Hogon khüdu-khüdu tsübülungnung.

¹⁶ABÜDONGBA akang vakha la yangching ko tu yorünang khidheng. Athrichoti khüdusü müchahnung, ko dhrela müpisacho khüdusü müngunung. ABÜDONGBAnü hütsütanung mülacho; apunü arüh müjang nübülungnung.

¹⁷Arüh khyang alih tsü ABÜDONGBAnü chang jünung ko arüh palu nohlüm khyünung. Arühnü hütsüba lih la tsü shangnü shang linung, ko hütsü lede nengdang arüh yo thsanung.