Read Sangtam Naga Isa 36 Bible Online

Isa 36 - Sangtam Naga bible

Isa 36

¹Juda la Hezekia Yangthsapü kang dhüre-müyüu la, Assyria Yangthsaba Senacheribnü atbüticho Juda yangditi be arüh mahchehcho.

²Hütsüpü abinü abi pohki anüchiba te rothsarü adrong nüpü Yangthsaba Hezekia yang Lakish lanü Jerusalem lang wünung yuzeng jücho. Adirü tsünü athahlangba kihting lanü roba kihrü müshüm shükyahrü nguchichah lang la müdongcho.

³Abi shirünung Judearü arüh asang rocho: Arüh tsü Yangthsaba kuh xükümba Hilkia tsurü Eliakim; yukhachah athrahba Shebna, ko khiyu thrahyohrü Asaf tsurü Joah.

⁴Assyriarü adiba tsünü arüh te tunü Yangthsaba Hezekia müsi mülahrünang Yangthsabanü müdhenyürepü yocho.

⁵Abinü yocho, “Rothsarü asithsa ko tase tsü yu amüthsinü kohnung do? Sünü nüh tronung nengdang Assyria nyüm yanungepü nühnü lümro?

⁶Ijipnü tronung nührünü longdire, ta hütsü thoh ja kyole, hütsü khyahsah nü kheh tsehnung. Ijip Yangthsaba chah dümpiba tsü hütsü kyonung.”

⁷Assyria adibanü yocho, “Mahkhang ABÜDONGBA nü Tsingrang chah dümpirü mah-o? Hezekianü Judarü ko Jerusalemrü te bholu khüdu chah du mübübaepü yo thsangnyangjüba mübü müdüm apüm tsü ABÜDONGBA yo du thsacho.

⁸Ihnü Yangthsaba nengla nührü te zengtanung. Nührü nyitsarü dusü kükyo likhang, Ihnü nührü khyang kuri hajar anyüh jünung.

⁹Nüh Assyriarü anüchirü apohkiba khüdu mii müleng, ko nührünü Ijiprü chahnü kuri kari ko kuri rothsarü ngunung longdire.

¹⁰ABÜDONGBA arüku müzehpü Ihnü nührü lih mah changjüchoepü nührünü lümrü mah-o? ABÜDONGBA apunü hütsü mahnung ko changjünung I te yocho.”

¹¹Hütsüde Eliakim, Shebna, ko Joahrünü adiba te tsü yocho, “Ihrü te Aramaik yu la chotang. Ihrünü hütsü nyichehle. Ibri yu la tücho; tbü müshüm lirü apümnü hütsü nyiyale.”

¹²Abinü lalingcho, “Yangthsabanü yu hiri nührü ko Yangthsaba te du yosohnung Ih rosohchoepü nührünü lümre ang? Mah! Ta nührü kyo tbü müshüm lirü sürünü palu pehyahcho tsunung, ko yongnung liro arüh tesü Ihnü chotare.”

¹³Hütsüde adiba tsünü tsohmüsu Ibri yu la züdecho, “Assyria Yangthsabanü nührü te tu yoro hütsü nyieng.

¹⁴Nührü Hezekia khyang tükiyohchüsoh. Hezekianü nührü mükhümchochehnung.

¹⁵Ko ABÜDONGBA chah dümpinung abi khyang tükiyohchüsoh. ABÜDONGBAnü ihrü Assyriarü rothsarü yati nührü yangdi mükhyünung ko abinü nührü khümchonungepü tülüm.

¹⁶Hezekia yu tünyi. Assyria Yangthsabanü yangdi la tsünü chüro nührü jangjang abi chah hapm-pü yuzeng jüre. Abinü nührü khyang nührübürü shükusih ko ngurüsih chahnü tsusohnung, ko nührübürü kihkong lanü yongsohnung,

¹⁷hütsüpü Yangthsabanü nührübürü lih kyo yongkha nengdang shükusih, ko tsang nengdang fürü chüroba lih khüdu la nührü lisohnung.

¹⁸ABÜDONGBAnü nührü khümsohnungepü lümsohba Hezekia khyang nührü tünümülasoh. Tu yucho tsingrangnü Assyria Yangthsaba kheh lanü arüh khümchodhengcho?

¹⁹Ade Hamath ko Arpad tsingrangti khüde liro? Sefarvaim tsingrangti khüde liro? Khürünü Samaria khümchochehcho mah-o?

²⁰Khode hiri yuchoti tsingrang khüdu dunüsü ihrü Yangthsaba kheh lanü arüh yucho khümchodhengcho? Khang, ABÜDONGBAnü Jerusalem khümchonungepü khüta nührünü lümro?”

²¹Ta Yangthsaba Hezekianü arüh te yocho kyo, müyurünü sahmüthsacho; ko yu khüdusü müchürocho.

²²Hütsüde Eliakim, Shebna, ko Joahrünü awahchonü arüh jengki rehnahpü wünü Assyria adibanü yocho yu apüm Yangthsaba te yocho.