Read Sangtam Naga Isa 40 Bible Online

Isa 40 - Sangtam Naga bible

Isa 40

¹“I Müyurü tbachijüng,” Tsingrangbanü yore. “Arüh tbachijüng!

²Jerusalemrü thsüching. Arüh te young: arüh kükyo chongchako; Ade arüh mülang pehjüko. Arüh münyi ngang Ihnü arüh ajeng khingchiko.”

³Yuva khüdunü züdere, “Akungase lih la ABÜDONGBA nengdang lang khüdu rungnüm! Ihsa Tsingrang khyang lihpi lih la lang tsü pihjüng.

⁴Ayongkoh apüm sühngahng; azong apüm jungahng. Akhang tsü angah kangnung, ko lungrah tsü müjangnung.

⁵Hütsüde ABÜDONGBA ahechi mishanung, ko amüi tsurünü hütsü ngunung. ABÜDONGBA apunü hi nyengchoko.”

⁶yuva khüdunü züdere, “Yusi khüdu sobhoung!” “Tu yusi sobhonung?” Ihnü yocho. “Amüi tsurü tsü za kyolepü sobhoung; Arüh rangmü yungpi tenü anyahliu mülire.

⁷Za talüpre ko yungpi trülohre, ABÜDONGBAnü arüh chah nyübong mütheh fükehde. Nyitsarü tsü za tenü anyahliu mülire.

⁸Ho, za talüpre ko yungpi mükure, ta Tsingrangba yu lede lire.”

⁹Jerusalem, azong chah tsü küdung ko yusi atsa tsü sobhoung! yuva athsengnü dsieng, Zion; yusi atsa tsü müdhesohng! Chochehchüng ko dro tüli. Juda yangditi te young; arüh Tsingrang tsehle!

¹⁰Amichahba ABÜDONGBA zii la yangthsanung rore, Abi yola Abinü ruhchocho nyitsarüti norore.

¹¹San-nyahrü kyo Abinü Abi santi xükümnung; Abinü sanzati nübülungnung ko apakyarü chah dhinung; ko Abinü atpati tsü khainü nünung.

¹²Khürünü müyo-onü kihjü ho-dhengchehnung do? Mahkhang akhehnü ning tsü kiidhengchehnung do? Shing khüdu la limih hi phechehnung do? mahkhang ahosing la akhang azong hi ho-dhengchehnung do?

¹³Khürünü ABÜDONGBA te tu nguchinung yochehnung do? Sünü Abi te donung mahkhang Abi te thülanung?

¹⁴Müdhenung ko nyichonung ko tu nguchinung ABÜDONGBAnü khürü te kihtarü mah-o?

¹⁵ABÜDONGBA telü yuchoti tsü tu mah, kih müdri-o tenü alaa mah; ashula mütro khüdu tsü asongsong roh-i ayingya.

¹⁶Lebanon mürong la liba kanglungrü apüm tsü, Ihsa Tsingrang khyang kangmübü jünung mükükyü, Ko hütsüla sing tsü atahnung mii zarale

¹⁷Abi jingte yuchoti tsü tu mah.

¹⁸Tsingrangba süte kihtachehnung? Abi tu kyorünang nühnü khüta yochehnung?

¹⁹Abi khehnü külüpcho kyothri, ikengrünü hon ko taripinü münohti külüpcho kyothri mükyo.

²⁰Hon ko taripi mükoh lihrünü, amüsühba sing throchehre. Kyothri tsü mükhülusohnung abinü sihthrirü khyang külüpsohre.

²¹Nührünü mümüdhe ang? Papadenü nührü te müyo ang? Limih khüta thricho nührünü müyuchi ang?

²²Hütsü Yangthsaba pümji la pümbanü külüpcho, alih munglang ko ning khupü; apohki lirü tsü tsangsüh tütoh ngure. Abinü ning tsü akitising shü kyo lehmüthehcho, aliji shükuh kyo.

²³Abinü yangthsarü nüchore, ko arüh adeng kangsohre.

²⁴Arüh sing anu kyole, ade du ara ra zii yaba. ABÜDONGBAnü nyübong müthehde, arüh kungpehre ko mayü kyo fotsire.

²⁵Amüsa Tsingrang süte kihtachehnung? Abi kyo khürü lirü do?

²⁶Ning chah tsü dheng! Nührünü nguba chenghi sünü thricho? Rothsarü kyo arüh nüchehba tsünü; Abinü arüh khüdoinang müdhele, ko arüh müipi anengnü dsire. Abi zii dirale- arüh khüdusü müchahre!

²⁷Israel, khang tuepü longmüsüro? ABÜDONGBAnü nührü thsangthsi mümüdherepü; mahkang amüthsalang la chongchade nührü müdhengrepü

²⁸Nührünü mümüdheo? Nührünü müyuchio? ABÜDONGBA tsü achangka müliba Tsingrang; Abinü limih apüm thricho. Abi khodesü mükyahre mahkhang mükhere. Sünüsü Alümlong münyicheh.

²⁹Abinü re müzehrü ko kyahsehrü re zehsohre.

³⁰Azarü mii remüzeh kangre; Dhrezarü kyahseh khülure.

³¹Ta sürünü ABÜDONGBA chah longlangro, arüh rezehchi kangnung. Arühnü müdi kyo mongnung; arühnü shangnung ko mükyahnung; arühnü tsehnung ta mükhenung.