Read Sangtam Naga Isa 41 Bible Online

Isa 41 - Sangtam Naga bible

Isa 41

¹Tsingrangbanü yore, “Sahmüthsapü I yu nyieng, Nührü mütroti! Yukhachah nü khiyu hironung rungnüm, Nü chonung bekhyah ngunung. Sü yujenang müdhenung Ihsanü yukhachah müjang shibülungnung.”

²“Nyüchüro langnü akohrü noroba Ko abi iiwücho apümlang kohsohba tsü süo? Sünü abi khyang Yangthsarü ko yuchoti michah akoh ngusohcho? Abi nohshengnü arüh tsü lihwü kyo khülusohre. Abi tbüdengnü arüh tsü nyübong bete mayü roh-i shupishuzare.”

³Abinü alih la ajing mii müjükehcho roh-i arüh iiwüre.

⁴Hütsü tikehsohba tsü sünüo? Sünü yukheh tsü chürosohcho? Ih, ABÜDONGBA adikeh la licho, ko achangka lasü linung.

⁵“Mütro la lirütinü Ih ngucho; arüh neh adrüchonü dhridhricho. Achotsü arüh atümung shimükhong rocho.

⁶Sihthrirünü trotare ko thsüchitare.

⁷Sing mistrinü hon kengrü te yore, ‘Tsa nguchiko!’ Sünü kyothri nana kyühro abinü ahamkehtarü te thsüchire. Arühnü yore, ‘Atahkehtaba tsü tsale’ ko kyothri tsü ayohpüji la hamkehpüre.”

⁸“Ta nüh, I dikehrü Israel, Ihnü throchehba nyitsarü tsü nührü, I shangrü Abraham chahnü trahchocho.

⁹Ihnü nührü alih changka lanü norocho; Ihnü nührü ashu-uba jongnah lanü dsicho ko nührü te yocho, ‘Nührü I dikehrü.’ Ihnü nührü müpeh, ta throchehcho.”

¹⁰Tüdrü Ih nührü te lile! Ih, nührü Tsingrang, tunüsü nührü münehsohnung! Ihnü nührü rezehsohnung ko tronung; Ihnü nührü tsungtinung ko khümchonung.

¹¹“Nührü te zichürorü amükoh ngu ashah khyünung. Nührü te khatarü sünung

¹²ko limih lanü changpehnung.

¹³Ih nührü Tsingrang ABÜDONGBA; Ihnü nührü rezehsohre ko yore, ‘Tüdrü; Ihnü nührü tronung.’ ”

¹⁴ABÜDONGBAnü yore, “Nüh azikyah ko remüzeh, Israel, tüdrü; Ihnü nüh tronung. Ih, Israel Amüsa Tsingrang, sünü nührü khümchoro.

¹⁵Ihnü nüh aha asi ko akoh kehba fürü nyehji kangsohnung. Nühnü azongti nyehnah thsangnyangjünung; akhangti tsü lihwü kang trümnahnung.

¹⁶Nühnü arüh nyübong la shu pehnung; ko nyübongnü arüh fo tsinung, ko tsingxinyübongnü arüh shupishuzanung. Hütsüde Ih nührü Tsingrang thsacho ngang; nührünü künyangnung, Nührünü I Amüsa Israel Tsingrang neng senung.”

¹⁷“Khode I müyurünü kih thsütah yangchinang, axochonü arüh linga kungde, Ih, ABÜDONGBAnü arüh kihchicho lalingnung. Ih, Israel Tsingrangnü arüh khodesü müpehjünung.

¹⁸Ihnü akung akhang chah kih pohsohnung, ko angah la kihna pohsohnung. Ihnü lipilih tsü changtphü ko akung lih tsü yongna kangsohnung.

¹⁹Ihnü lipilih la cedar sing, akacia sing, mertel sing ko olive sing chürosohnung. Alih kung la mürong kangsohnung, kee sing, Juniper sing ko cypres sing mürong.

²⁰Nyitsarünü hi ngunung, ko Ih, ABÜDONGBAnü hi nguchicho arühnü müdhenung. Hi Israel Amüsa Tsingrangnü tikehsohchoepü arühnü müdhenung.”

²¹ABÜDONGBA, Israel Yangthsabanü hi yore: “Nührü yucho tsingrangti, nührü khiyu hirung. Nührü yuzi atsauba hirung.

²²Hütsü tikehde ihrünü müdhenungthsa, Hila rung ko tu tikehnung choyohng. Yukha chah atikehchoti young, ko hütsü adüzü ihrü te young.

²³Atikehnung licho ihrü te young, khang nührü tsingrangrüepü ihrünü müdhenung! Atsa khürü nguching mahkhang achangba hirung; ihrü adrünü jengsohng!

²⁴Nührü ko nührünü nguchiba hi apüm arahkheh; ko sürünü nührü mübüro arüh athrünyinung!”

²⁵“Ihnü nyüchürolang lirü nyüh khüdu throchehko; Kihku lahpinü mah ronung Ihnü abi noronung. Füh tangrünü lihshe dhrümcho kyo, abinü yangthsarü dhrümnahnung.

²⁶Nüh yuje-epü ihrünü yonungthsa, hi tikehnung sünü choyohnung? Nührü sünüsü hi nengdang yu khüdusü müyo, nührünü tusü yo müyuchi!

²⁷Zionrü te yusi tsü yonung, Ih, ABÜDONGBA akhu thsacho; Jerusalem lang yusi hi yonung Ihnü müthehcho, ‘Nührü nyitsarüti tsehle. Arüh kuh lang thali tsehle!’

²⁸Ihnü tsingrangti yola tsü dhengde, lango dusü yonung süsü müzehcho; Ihnü tsingdhengba tsü sünüsü mülalingchehcho.

²⁹Hiri tsingrang apüm arahkheh; arühnü tusü münguchicheh kyothri hiri tase ko zii müle.”