Read Sangtam Naga Isa 44 Bible Online

Isa 44 - Sangtam Naga bible

Isa 44

¹ABÜDONGBAnü yore, “Ade nyieng, Israel, I dikehrü, athrochehcho müyurü, Jakob trah.

²Nührü thriba ABÜDONGBA tsü Ih; nührü nümüsu du rükucheh rore. Tüdrü; nührü I dikehrü, Ihnü müiba athrochehcho müyurü.”

³“Xoseh liba lih khyang Ihnü kih jünung ko akung lanü yongkhi pohsohnung. Ihnü nührü tsuzarü michah I nbü mükhakehjünung ko nü trah chah amüwa mükhakehjünung.

⁴Arüh tsü kih la surocho za kyo zinung, yongkhi shündhün willow sing kyo.”

⁵“Müyurü müipinü yonung, ‘Ih ABÜDONGBA yo.’ Arühnü Israelrü yola zehnung ronung. Nyitsarü mükhunü pükyang chah ABÜDONGBA neng thrahkehnung, ko apu jangjang Tsingrangba müyurüepü dsinung.”

⁶ABÜDONGBA, Israel Yangthsaba ko khümchoba, Akohbanü hita yore: “Ih adikeh, ko achangka Tsingrang; I chah khu apa Tsingrang müle.

⁷Ihnü kyo nguchichehnung khürü licho mah-o? Adikeh lanü achangka chii atikehnung apüm tsü sünü choyohcho?

⁸I müyurüti, tüdrü! Papadenü ade yingcheh atikehnung licho apüm Ihnü choyohcho nührünü müdhele, ko nührü I yuzi lile. Apa tsingrang khürü lirü do? Ihnü müyuchidhengcho tase azeh tsingrang khürü lirü mah-o?”

⁹Kyothri külüprü atümung amii müle, ko dee khichiba tsingrang tsü akhyüchah müle. Sürünü tsingrang hiri mübüro arüh tsü anahtohrü ko amümüdherü ko arüh ashah khyünung.

¹⁰Tsingrangba kyo khichi mübünung idhsenü kyothri külüpba tsü atsa mah.

¹¹Hütsü mübürü atümung mükhimüngunung. Kyothri külüprü tsüsü nyitsarü du. Arüh tsü ro yukha la yasohnung ko arüh drümüyangnung ko ashah khyüsohnung.

¹²Iikengrünü idhse aikyah hiro michang la hütsü tahnü kengre. Bipüm amüküp tsünü idhse tsü kengnü atsah chürosohre. Abinü nguchide yangxore, ko kyahre.

¹³Sing mistrinü sing tsü kihre. Abinü atsah tsü threhre, ko xangchehnü nyükheh atsa nyitsarü trüp thrinü kuhla yohpüre.

¹⁴Abinü cedar sing rere, mahkhang mürong lanü langsing mahkhang cypres sing khyüre. Mahkhang abinü kee sing khyümpü hütsü zisohnung tsing yingre.

¹⁵Nyitsarünü sing khüdu lanü changsho tahre ko changshonü kyothri külüpre. Changsho apu henung ko hümthse külüpnung tahre; ko changshonü tsingrang külüp hütsü mübüre.

¹⁶Sing khürünü michang thsare; shuh chongre, ko hütsü tsu longnyüpre. Abinü langchi henü yore, “Dee langchile! Michang hi tsarale!”

¹⁷Anyingcho sing tsünü abinü kyothri külüp, hütsüte mükhukeh mübüre. Abinü hütsüte dangkhidangnang yore, “Nüh I tsingrang, Ih khümchoung!”

¹⁸Hütsütari nyitsarü tsü arühnü nguchicho mümüdheba tsü adohrü. Yujeba nengdang arüh nah ko lümlong khangtiko.

¹⁹Kyothri külüpba tsünü hiroh-i yonung lüm la müro, “Sing khürü tahnü Ihnü hümthse ruhko, ko shuh chong tsuko. Ko sing changshonü Ihnü kyothri külüpko. Ih hila singnah khüdu te mükhukehre!”

²⁰Hütsü tavi tsucho kyole. Abi amüsithsa lümlong tsünü mütrochehnungthsa nümülako. Abinü arahkheh la hiba kyothri tsü tsingrang mah pü müyochehnung.

²¹ABÜDONGBAnü yore, “Israel, hi lümchehng; nüh I dikehrüepü lümchehng. Ihnü nüh I dikehrü thsanung thricho, Ihnü khodesü nüh münbüchünung.

²²Ihnü nührü münyi nyükhi kyo wohpehko. Ih yang thali rung; Ih nührü khümchoba.”

²³Akünyangnü züdeing, ningti! Züdeing, alih yonglang lirüti. Akünyangnü züdeing, azongti, ko mürong singdongti! ABÜDONGBAnü Abi müyurü Israelrü khümcho Abi dicho ngusohko.

²⁴“Ih ABÜDONGBA, nührü khümchobong; Ih ABÜDONGBA nührü thribong. Ih ABÜDONGBA, lüpcho Thrirü. I mülengnü ning tsü lehmüthehcho; Ihnü alimih thride, sünüsü Ih mütro.

²⁵Ihnü amongrü dohpehsohre, ko ningmüchehrü choyoh mütikehsohcho. Amüdherü yu Ihnü thsonglire ko arüh lümlong tsü amüsithsaepü ngusohre.

²⁶Ta I dikehbanü choyohde, Ihnü I lümchung müdhesohnung yu hiri müdhede, Ihnü I lümchung ko choyohti tsü tikehsohre. Ihnü Jerusalem te, hütsüla thali nyitsarü linungepü yore, ko Juda yangdi tsü külüpchinung: hütsüri yangditi tsü chang licho lanü khamüsunung.

²⁷Yunü yuzeng jüchonü kihjü kungpehre.

²⁸Ihnü Cyrus te yore, ‘I nengdang yangthsanung tsü nüh thsanung; Ihnü lümcho roh-i nühnü nguchinung: nühnü Jerusalem thsachilinung ko amübükuh akhengdi khengnung yuzeng jünung.’ ”