Read Sangtam Naga Isa 49 Bible Online

Isa 49 - Sangtam Naga bible

Isa 49

¹I yu nyieng, mütro la liba yuchoti, nührü ashu la lirüti! I müsurodenü, ABÜDONGBAnü Abi dikehrü thsanung Ih throchehcho.

²Abinü I yu tsü nohsheng kyo kohsohcho. Apu khehnü Abinü Ih tsungticho. Abi Ih arungnümcho ko akoh tbüdeng kyo külüpcho.

³Abinü I te yocho, “Israel, nüh I dikehrü; nührü nengdangnü, müyurünü Ih senung.”

⁴Ihnü yocho, “Ihnü nguchiko, ta hütsü alongdi müle. Ihnü suhre kingka bichiko, ta tu mükang.” Ta Ih khümsohnung Ihnü ABÜDONGBA chah longlangre; I nguchi ngang abinü jiyünung.

⁵Ih müsurodenü, ABÜDONGBAnü Ih throchehcho: Abi nyitsarüti nüli rosohnung, shupishuza liba Israelrü nüli rosohnung, Abinü Ih Abi dikehrü kangsohcho. ABÜDONGBAnü I khyang adhichi jüre; Abi I suhre ara.

⁶ABÜDONGBAnü I te yocho, “Nü nengdang nguchi adiu lile, I dikehrü. Nühnü amütrüh Israelrü tsü dikehsohnung du mah, ta liküprü khümchonung, Ihnü nüh yuchoti yanglang atsingse khüdu külüpnung.”

⁷Dee mükhimüngupü liba, yuchotinü thrünyiba ko yangthsarüti dikehba te, Israel Amüsa Tsingrang ko khümchobongnü yore: “Nührü lehchehcho yangthsarünü ngunung; ko jengreng jünung yamüsunung; yangthsarü tsurütinüsü hütsü ngunung, ko nührü jingte mükhukehnung.” Hi tikehnung, tunüo ABÜDONGBAnü Abi dikehrü throchehko; Israel Amüsa Tsingrangnü Abi anyengchocho yohpüre.

⁸ABÜDONGBAnü hita yore, “Nührü khümchonung bekhyah rode, Ihnü nührü te yanglilüm ngusohnung ko nührü züdecho lalingnung. Ihnü nührü nyahnung ko tsungtinung ko yucho apüm te nührü khu azengchotaba külüpnung. Ade peh liba nührü lih la Ihnü nührü thali lisohnung.

⁹Ihnü arangyohrü te yonung, ‘Chürung!’ ko amarürah la lirü te yonung, ‘Atsingse yang chürung!’ Arüh azong la lamungba san kyonung,

¹⁰arüh khodesü müyangnung ko müxonung. Nyü ko lipilih adhsanü arüh mütahnung, tunüo arüh müirü nyü khüdunü arüh nünung. Abinü arüh kihnatung yang nünung.”

¹¹“Ihnü azongti lahsah lang tungte külüpnung, ko I müyurüti tsehsohnung lang pihjünung.

¹²Ashu lanü I müyurüti ronung, kihkulangnü ko nyüzüdu langnü ko kihjinglangnü Aswan lanü.”

¹³Khi thsaang, ningti! Künyang züdeing, alimih! Azongtinü khong khi thsasohng. ABÜDONGBAnü Abi müyurü tbachijünung; thsa liba müyurü Abinü müinung.

¹⁴Ta Jerusalemrünü yocho, “ABÜDONGBAnü ihrü thrüchahchüpehko! Abinü ihrü nbüchüko.”

¹⁵Achotsü ABÜDONGBAnü lalingcho, “Atpa khüdunü atsurü nbüchüchehnung do? ko abükyünü nümüsucho mümüinung do? Atpa khüdunü atsurü nbüchü nye, Ihnü khodesü nührü münbüchünung.

¹⁶Jerusalem, khodesü nü münbüchücheh! Nü neng I müyotpah la thrahko.”

¹⁷“Nüh thsachilinung nyitsarü tsü zah role, ko nü changsohrü tsü tsinung.

¹⁸Dhengmükang ko tu tikehrünang dheng! Nü nyitsarü shimükhongle- arüh kuh lang role! Ih akang liba Tsingrang lichonü, kukangtpünü athsidi lung nengdang künyangcho kyo, nü nyitsarü nengdang nüh künyangnung.”

¹⁹“Nü yanglih changpehpü licho, ta ade hütsüla linung rorüh nengdang hütsü zaranung. Ko nü changsohrü nü tenü ashula khyümüinung.

²⁰Yangtsilangnü surorü nü nyitsarünü nyümong khüdu nü te yonung, ‘Alih hi zarale- Ihrü nengdang alichah amüzau thsütahle!’

²¹Hütsüde nühnü nüpu te yonung, ‘I khyang sünü azarü hidoi nümüsujücho? I tsurü changko ko mülinung thsacho. Ih yangtsilang iipehcho- azarü hiri sünü nümüsucho? Ih I müleng tsatsa pehjücho- azarü hiri khüdenü rocho?’ ”

²²Amichahba ABÜDONGBAnü hita yore: “Ihnü yuchoti te müdhesohnung, ko arühnü nü tsurü kuh lang noronung.

²³Yangthsarü tsü nührü au kyo linung; Yangthsalarü tsü atpa kyo linung. Arühnü nü jingte mükhukeh nüh dhichinung; arühnü longlüm kang nü jengreng drünung. Hütsüde nühnü Ih ABÜDONGBAepü müdhenung; I arüku yingrü süsü suh müzahnung.”

²⁴Rothsarü kheh lanü ruhchochehnung do? Aführü kheh lanü arangyohrü ruhchochehnung do?

²⁵ABÜDONGBAnü hita yore, “Hütsüta tikehnung. Rothsarü kheh lanü arangyohrü rohcho tsinung, ko aführü kheh lanü kohro kengcho khyünung. Nührü te khatarü nyüm Ihnü khatanung, ko Ihnü nührü tsuzarü khümchonung.

²⁶Ihnü nührü sehchirü arüh-e arührü kyüsehtasohnung; arüh rihlong chüro mapsehtachonü müchanung. Hütsüde amüi tsurü atümungnü Ih ABÜDONGBA, nührü khümchorü ko lehcheh müthehbongepü müdhenung. Ih Israel rezeh Tsingrangepü arühnü müdhenung.”