Read Sangtam Naga Isa 5 Bible Online

Isa 5 - Sangtam Naga bible

Isa 5

¹Nyieng Ihnü khi hi nührü te thsade, I müyang ko abi shüsilu khi; I müyang shüsilu khüdu: Lihji lih akhang khüdu chah.

²Abinü alih tsü junahcho ko lung mütsangcheh pehcho; abinü shükusih atsauba tsü khyümcho. Hütsü nyahnung roshengkuh khüdu thsacho, ko shükusih nyehji jucho. Abinü shükusih tsü nyinung yingcho, ta shükusih apüm tsü cicho.

³Hütsünü ade I müyangnü yore, “Nührü Jerusalem ko Juda la lirüti, I shükusih ihjü yu khajüng.

⁴Ihnü hütsü nengdang khürü münguchipü lirü mah-o? Khang tuepü Ihnü longdicho roh-i mahpü, shükusih aci sihro?

⁵“Ihnü I shükusih te hita nguchinung: Ihnü atbüticho tsü tphünung, ko hütsü tsungtiba züdi tsü lohnahnung, ko rangmü kanglungrünü hütsü dhrümnah tsunung.

⁶Ihnü hütsü michah zanü chitisohnung. Ihnü shükusiluh tsü müyuthsahnung; mahkhang alih tsü müjunahnung, ta hütsüla zeng chisohnung. Ihnü nyükhi te mii tsing mürosohnung yatinung.”

⁷Israel tsü Akohbong ABÜDONGBA shükusiluh; Juda tsü Abinü khyümcho shükusih. Arühnü atsa nguchinung longdicho, ta arühnü mapsehcho. Arüh chahnü yuje longdicho, ta arüh hehnehthsarünü yujeba tsü ching züdecho.

⁸Nührü ahohah! Nührü licho la lahkehnung nührünü kuh ko alih alaa lihkehre. Tunyah mülipü aparü nengdanglü alichah mülinung ko alih la tsü nührü du linung.

⁹Akohbong ABÜDONGBAnü hita yocho Ihnü yuchiko, “Hiri kuh amülah ko atsati hi thsangnyang dengchehnung.

¹⁰Shükusih lutri dhüre lanü cikih liter keh du chüronung. Majüh dsedong dhüre pehcho lanü dsedong khüdu du xanung.”

¹¹Nührü ahohah! Nührü anyangnyü mütoh yongnung dikehre, ko anyüzehlang khütang münu yong müchare.

¹²Nührü thsüti la nührünü, tbenglah ko tambourin ko honglilah ko yongkha bichire.

¹³Ta ABÜDONGBAnü tu nguchiro hütsü nührünü münyicheh; hütsüta nührü arangyohrü kang kümtsinung. Nührü langnürüti kongseh sünung ko müyurü xoseh sünung.

¹⁴Asü lih tsünü mükhyahseh abe kapü yingre. Abinü nyejeng yola Jerusalem la adirüti zeh münyopehnung.

¹⁵Atümung ashah khyünung, ko amüthsehrü apüm longlümsohnung.

¹⁶Ta Akohbong ABÜDONGBA diba tsü athsalang nguchicho khu Abi dicho ngusohng, ko Abi müyurü yukhacho khu Abi Amüsaba mishanung.

¹⁷Achangcho yangditi la tsü sanzati ko mizati lamungji kangnung.

¹⁸Nührü ahohah! Nührü münyi lanü lehcheh nyüje mükangcheh.

¹⁹Nührünü yore, “Ihrünü ngunungthsa, ABÜDONGBAnü chocho kyo zah nguchisohng. Israel Amüsa Tsingrangnü tu lümrünang; Ihsanü dhingdhengnung.”

²⁰Nührü ahohah! Nührünü amütsa te atsa ko atsa te amütsa dsire. Nührünü ama tsü atsingse ko atsingse tsü ama kangsohre. Nührünü akha tsü anyiyah ko anyiyah tsü akha kangsohre.

²¹Nührü ahohah! Nührünü nührü tsü amüdhe ko athsehthsaepü lümre.

²²Nührü ahohah! Nührü yongkha yongnung la akurahrü. Yongkha tungrütanung la athrungrü ko müdrüre.

²³Ta pohsa aikyah khüdu ngang thsamehrü lehcheh tsisohre ko achomükehrü yuje tsü müngusohre.

²⁴Hütsüeko ade, manying ko za akungcho tahkureng trüpcho kyo, nührü ara tsü sühtpah pehnung, ko nührü api tsü kungpehnung, ko fotsinung, tunüo Akohbong ABÜDONGBA, Israel Amüsa Tsingrangnü Ihsa te docho nührünü mübichi.

²⁵ABÜDONGBA Abi müyurü te zichürore ko arüh khingchinung akheh dhimüsuko. Azongtinü shühchinung, ko asücho me tsü yanglong la sehnyeh kyo bhümpünung. Ta ABÜDONGBA rihlong müchangkanung, ko khingchinung akheh dhimüsu du linung.

²⁶Ashula liba yucho khüdu khyang ABÜDONGBAnü adsiba amüdhethsa ngusohre. Abinü arüh alih changka lanü rosohnung yuva jüre. Ko arüh dhsüthsa ko tsaya rore.

²⁷Arüh süsü mükyahre; süsü müngahsehre. Arüh khodesü münyichire mahkhang müyüpre. Rungrüm khüdusü müshüshüpre; jingkhüm yo khüdusü müthsangnyangre.

²⁸Arüh tbüdeng amüxi ko arüh singthsalu kyanung tbengkeh lile. Arüh kuri müpha tsü lung azi roh-i, ko arüh kuri kari jing tsü nyübong fücho kyole.

²⁹Kihkhünyingnü kanglungrü mükahsehpü sünüsü arüh tenü rohcho mühitsisohnung reng hiwücho kyo rothsarütinü rengre.

³⁰Hütsüba nyümong rode, kihdinü khongcho kyo, arühnü Israel michah rengnung. Hiba yucho chah dheng! Amarürah ko awah! Atsingse tsü amarürahnü münyopehko.