Read Sangtam Naga Isa 50 Bible Online

Isa 50 - Sangtam Naga bible

Isa 50

¹ABÜDONGBAnü hita yore, “Adhrerünü anitpü za müthehcho kyo, Ihnü I nyitsarüti tsisohchoepü nührünü lümre ang? Khang tsisohba athrahcho yuzi khülo? Aunü atsurü ayurü thsanung icho kyo, arangyoh lang Ihnü nührü ichoepü nührünü lümrü mah-o? Mah, nührü, nührü münyi ngang yangtsilang tsicho; Nührü thsamehcho ngang nührü iipehcho.

²Ih arüh yang arüh khümchonung wüde, tuepü I nyitsarünü I te mülalingcho? Ihnü dside tuepü arühnü mülalingcho? Ihnü arüh khümchonung mükohcho mah-o? Ihnü yu khüdunü kihdi kungsohnung kohle, ko hütsüla zehba nguh, kih mülichonü sükhangnungthsa, yongkhiti tsü lipilih kangsohnung.

³Ihnü ning tsü amarürah kangsohnung kohle, asürü meshücho kyo.”

⁴Ihnü tu cho akyahrü rezehsohnung, hütsü Akohbong ABÜDONGBAnü I te doko. Abinü I te donung liba yuchisohnung, I khyang nyangnyü mükhu longphisohre.

⁵ABÜDONGBAnü I khyang anyichehba jüko, ko Ihnü Abi münyüm mahkhang Abi tenü ximüla mütsi.

⁶I chah xüprü khyang Ihnü I khang pijücho Ih müthsamünyüde Ihnü arüh müyati, arühnü I benbüh zümcho I romih chah müchohkehjüde Ihnü arüh müyati.

⁷Ta arüh müthsamünyübanü Ih müdhsakeh, tunüo Akohba ABÜDONGBAnü Ih trocho. Hütsüri rangchonung I jangjang müküpcho. Ashah mükhyünung Ihnü müdhere,

⁸tunüo Tsingrangba I shündhün lile, ko Abinü Ih achomükehcho yuzi jünung. Ih nyüm khürünü yu lirü mah-o? Ihsanü müjang yukha chah wonung! Mülangjüba yu tsü abi khyang hirosohng.

⁹Akohba ABÜDONGBA apunü Ih khümre, khang sünü Ih mülang jünung? I mülang jürü apüm changpehnung; tsangsohnü tsucho shü kyo arüh changpehnung.

¹⁰Nührü ABÜDONGBA tsurü apüm, ko Abi dikehrü yu nyirü apüm, nührü lang tsü amarürah thsanung kohle, ta ABÜDONGBA chah longlang, Tsingrangba chah dümpieng.

¹¹Bürü changsohnung rah külüprü apüm arühbürü rah la changnung. ABÜDONGBA apunü hi tikehsohnung; nührü suro amütsa la chongchanung.