Read Sangtam Naga Isa 51 Bible Online

Isa 51 - Sangtam Naga bible

Isa 51

¹ABÜDONGBAnü yore, “I yu nyieng, nührü khümchonyürüti, nührü Ih yang arüku chingnung rorüti. Nührü chüroba lung tsü lümdheng, nührü juchehba lungsüh nengdang.

²Nührü jümürü, nührü trahchoba Abraham, ko Sara lümdheng. Ihnü Abraham dside, abi azarü mülicho, ta Ihnü abi müwajücho ko abi khyang azarü jücho; Ihnü abi chahnü mükhilong trahchosohcho.”

³“Ihnü Jerusalem ko achangcho hütsüla lirü apüm te chomangnung. Abükyü lih tsü lipilih thsanye, Hütsü tbü khüdu kangsohnung Ihnü Eden la külüpba tbü kyo. Hütsüla akünyang ko alongphi linung, ko I khyang anengse ko akünyang khi thsaba linung.”

⁴“I yu nyieng, I müyurüti, Ihnü yocho yu hi nyieng: Ihnü yuchoti khyang I adoba jüre; I yuzengnü atsingse jünung.

⁵Ih zah ronung ko arüh khümchonung; Ih akoh nyümong shündhün lile. Ipunü yuchoti michah yangthsanung. Kihjüp liba yuchotinü Ih ronung yingre; Ihnü arüh khümchosohnung longdi yingre.

⁶Ning chah kehchü dheng; alimih chah dheng! Ningti mikhu kyo changpehnung; alimih tsü shüthreh kyo kangnung, ko nyitsarüti apüm sümüza kyo sükhangnung. Ta Ihnü hiroba akhümcho tsü achangka mülinung; I akoh tsü achangka thsanung.”

⁷“I yu nyieng, nührü athsalang müdherüti, nührü I adoba lasih la tahkeh lirüti. Nyitsarünü nührü drüsohde ko müthsamünyüde tüdrü;

⁸arüh tsü tsangsohnü tsucho shü kyo changpehnung. Ta Ihnü hiroba akhümcho tsü müchangka linung; I akoh shang apüm la linung.”

⁹Surung, ABÜDONGBA, ko ihrü rükung! Nü tase bichieng ko ihrü khümchoung; papade kyo hütsü bichieng. Kih kangdi Rahab zangzang khanahba tsü Nühnü.

¹⁰Nühnü kihdi kungsohcho ko kihdi khu lang pihcho, akhümchorü tsehsohnung.

¹¹Nühnü khümchorüti akünyangnü khithsa ro Jerusalem chihnung. Arüh akang ayung künyang linung, alongri ko awah lanü lede nengdang zanü.

¹²ABÜDONGBAnü yore, “Nühnü rezehsohba tsü Ih. Za kyo süba nyitsarü tu drünung licho?

¹³Nü külüpbong ABÜDONGBA, ning lehcheh müthehba ko alimih akhengdi khengba; nührünü nbüchücho do? Tuepü nührü nyümrü ko nührü changsohnung dhrongrü dro du dro liro? Adelü arüh rihlongnü nührü chah müthahpünung.

¹⁴Arangyoh la lirüti tunyah mülipü lehchehnung; arüh kutsüp linung ko arüh tsunyücho apüm tsu linung.”

¹⁵“I nührü Tsingrang ABÜDONGBA; Ihnü kihdi ruvachehre ko kiloh rengsohre. I neng Akohba ABÜDONGBA!

¹⁶Ihnü ning lehmüthehcho ko alih akhengdi yohcho; Ihnü Jerusalem te yore, ‘Nüh I müyurü! Ihnü adoba nü khyang jüko, ko Ihnü I khehnü nüh tsungtire.’ ”

¹⁷Jerusalem, surung! Nü jangjang jesung ko surung! ABÜDONGBAnü zichüro nü khyang ayongnung jüba akhingchi shing tsü nühnü yongko; nühnü hütsü müdricho yongko ko hütsünü nüh khüluchire.

¹⁸Nüh nünung süsü müle, nü khehnü shürinung nü nyitsarü yola süsü müle.

¹⁹Nü chah achangba anyüh tikehko: Chita khu nü lih thsangnyangko, ko nü müyurü kongko. Nü te amüi ngusohnung süsü müle.

²⁰Yanglong jongnah apümlang, nü müyurü tase müzeh khu jamtsure; arüh zeng chah shümüshü hohkehcho kyole. Arühnü Tsingrang rihlong müdheko.

²¹Nührü chongchaba Jerusalemrü, nührü müchacho kyo khüluchire.

²²ABÜDONGBA nührü Tsingrangnü nührü khümre ko yore, “Ihnü zichüro jüba shing tsü hitsire. nührü khüluchisohba yongkha tsü adelü nührünü müyongnung.

²³Ihnü hütsü nührü sehchirü, nührü yanglong la yüpsohbarü ko sehnyeh kyo nührü dhrümchirü khyang jünung.”