Read Sangtam Naga Isa 52 Bible Online

Isa 52 - Sangtam Naga bible

Isa 52

¹Jerusalem, rezehng ko mülahching! Amüsa Tsingrangba yangdi, ahechinü nü jangjang jengkeing! Adelü müyudsirünü nührü tbükhüm la müzüronung.

²Nü jangjang mühachi lehchehng, Jerusalem. Asongsong la tsünü shemüsung ko Yangthsaba pümji la püm! Nüh rahba ixilih tsü lehchehng, Zionrü akümtsirüti.

³Akohbong ABÜDONGBAnü hita yore, “Nührü amükang ngang icho ko thsi müjüpü lihchehnung.

⁴Nührü Ijip lang shuparü kang linung jowüde, hütsü nührü lümchonü nguchicho; ta Assyriarünü tusü müjüpü nührü khing notsicho.

⁵Ko ade hütsü akyokyo tsü Babylon la tikehcho: Nührü akümyohrü ko nührü ngang tusü müjü. Nührü michah Yangthsarütinü tüzümükhümre ko lede mükhimüngure.

⁶Aronung la nührünü Ih tsü Tsingrangba ko nührü te chotachoepü müdhenung.”

⁷Azong lahsah yusi hirü rocho ngunung tsü khüta akünyangnung, yusi atsa, yangtsa yusi hipü. Abinü akoh züdere ko Zion te yore, “Nü Tsingrang tsü Yangthsaba.”

⁸Yangdi nyahrünü khong züdere, akünyangnü müjang züdere. ABÜDONGBA Zion lang thaliba tsü arühbürü nahtsenü ngunung.

⁹Akünyangnü züdeing, nührü trümtsu liba Jerusalem! ABÜDONGBAnü apu yangdi khümchonung ko müyurü tbachijünung.

¹⁰ABÜDONGBAnü Abi Amüsa zii bichinung; Abinü amüyurü khümchonung, ko hütsü liküprünü ngunung.

¹¹Nührünü Babylon zah pehjüng, amübükuh lanü kohro hirüti. Amamoh kohro chah tüthahpü; nührü jangjang müsa yohpüng ko tsieng.

¹²Adelü dhsüthsa tsinung müdhsüdah; nührü rang tsinung mümüküpnung. ABÜDONGBA nührü Tsingrangnü nührü nünung ko apümlang nührü tsungtinung.

¹³ABÜDONGBAnü yore, “I dikehbanü abi nguchi la kohnung; abi dee hechinung.

¹⁴Abi ngude, nyitsarü adrongnü nehcho; Atsah dira thsangnyangchonü nyitsarü mükyocho.

¹⁵Ta ade yucho adrongnü abi ngu nyekanung, ko anyemüyangchonü yangthsarüti yu müchochehnung. Arühnü ngunung ko khodesü mümüdhecho lango nyichehnung.”