Read Sangtam Naga Isa 6 Bible Online

Isa 6 - Sangtam Naga bible

Isa 6

¹Yangthsaba Uzia süba kang, Ihnü ABÜDONGBA ngucho. Abi yangthsaba pümji athseng ko dhikeh liba chah tsü pümcho ko Abi jengki tsünü Amübükuh apüm jengcho.

²Abi thah te Serafim michang kanglungrüti yacho, ko arüh müipi aqo dhürüroh kehcho. Kanglungrü müipi tsü aqo anyünü aromih, anyünü ajing hapticho, ko anyünü mongchicho.

³Arüh khüdunü khüdu te hita dsita yocho: “Amüsa, Amüsa, Amüsa! Akohbong ABÜDONGBA tsü Amüsa! Abi ahechinü limih jeng lile.”

⁴Arüh yuvanü Amübükuh akhengdi shühchicho ko Amübükuh tsü mikhunü jengcho.

⁵Ihnü yocho, “I nengdang alongdi müle! Ih ahohah, tunüo I be lanü chürocho yu apüm amünyi, ko amünyi du choba nyitsarü yola Ih lire. Ta, Ipu nahnü Akohbong ABÜDONGBA, Yangthsaba tsü nguko.”

⁶Hütsüde bholu chahnü michüh khüdu kamünyüpnü müjüp bipü, Serafim yola khüdu I yanglang mungcho jürocho.

⁷Abinü michüh tsünü I be la thahpüpü yocho, “Hinü nü beküp chah thahpüko, ko ade nü mülang hitsiko, ko nü münyi mülang pehjüko.”

⁸Hütsüde ABÜDONGBAnü yo Ihnü yuchicho, “Ihnü sü müthehnung? Ihrü nengdang sü wünung?” Hütsüde Ihnü yocho, “Ih hila lile! Ih müthehng!”

⁹Hütsünü Abinü I te wü müyurü te yusi hi yonung yocho: “Nührünü nyi du nyi nye münyichehnung. Ko nührünü dheng du dheng nye müdhengchehnung.”

¹⁰Hütsüpü Abinü I te yocho, “Hiri nyitsarünü müngunung, müyuchinung mahkhang münyichehsohnung; hiri thoh lüsohng, arüh nangkhi tbengsohng, ko arüh nah tohsohng. Mahkhang arühnü Ih yang ximülanung ko arüh kyangnung.”

¹¹Ihnü tsingdhengcho, “Hi kyo khüdoi nyahli linung, ABÜDONGBA?” Abinü lalingcho, “Yangditi thsangnyang adeng mükangde, kuh tsü adeng mükangde, ko alih tsü riri müpehjüde.

¹²Ihnü müyurü tsü ashu la tsisohnung ko alih apüm pehsohnung.

¹³Alih la tsü nyüh dhüre la khüdu dusü nying linye, abisü changjünung; abi tsü re-pehcho langsing yahnbüh kyo linung.” (Ayahnbüh tsünü Tsingrangba müyurü asi dikehnung ngusohre.)