Read Sangtam Naga Isa 63 Bible Online

Isa 63 - Sangtam Naga bible

Isa 63

¹“Edom la Bozra yangdi lanü roba hi süo? Hidoi hechi moh jengkipü zii ko tase la roba hi süo? Hiba hi ABÜDONGBA, khümchonung tase azeh, abi akoh züdenung rore.”

²“Cikih kangsohnung shükusih dhrümcho mohba kyo, tuepü abi jengki hidoi mohro?”

³ABÜDONGBAnü lalingre, “Ihnü shükusih kyo yuchoti dhrümchiko ko Ih tronung süsü müro. I zichüro arüh dhrümnahcho, ko arüh shühnü I jengki apüm la münyiko.

⁴I müyurü khümchonung becho chihkopü Ihnü dhrongchehko; arüh rorüh khingchinung akyang chihko.

⁵I trorü süsü mülicho ngu Ih nyemüyangcho. Ta I rihlongnü I rezehsohcho, ko Ipunü akoh tsü ngucho.

⁶I zichüro Ihnü yuchoti apüm dhrümnahcho ko arüh shühchicho. Ko Ihnü arüh akang shüh alih la tungpehcho.”

⁷Ihnü ABÜDONGBA amüthreba amüi nengdang yonung; Abi nguchi apüm nengdang Ihnü Abi sere. Abinü Israelrü khütang müwajücho, hütsü Abi yanglilüm ko Abi amüthreba amüinü.

⁸ABÜDONGBAnü yocho, “Arüh I müyurü; arühnü Ih mükiyohchünung.”

⁹Hütsüta Abinü arüh chongcha apüm lanü arüh khümchocho. Hütsü ninglang riwürünü mah, ta ABÜDONGBA apunü arüh khümchocho. Abi amüi ko thsa lümba khu Abinü arüh khümchocho. Abinü atsicho la lede arüh xüküm rocho.

¹⁰Ta arühnü Abi nyüm yacho ko Abi Anbü Amüsa mükünyangsohcho. Hütsüta ABÜDONGBA tsü arüh rorüh kangcho ko arüh nyüm khatacho.

¹¹Ta hütsüpü arühnü atsicho la ABÜDONGBA dikehrü Mosa chichah lümchehcho, ko arühnü tsingdhengcho, “Kihdi lanü langnürüti khümchoba ABÜDONGBA sü khülo? Mosa khyang Abi Anbü jüba ABÜDONGBA sü khülo?

¹²Mosa khu Abi ziinü nguchi amülah nguchiba, kihdi changnah ko kih asoh khu Abi müyurü nücheh, apu nengdang müchangkaba nengse nguba ABÜDONGBA tsü khülo?” ABÜDONGBAnü no arüh rangmü kuri kyo khodesü mümüthikehcho.

¹⁴Misüti alihsu ngah lang nowücho kyo, ABÜDONGBAnü Abi müyurü khyang akyahshang jücho. Abinü Abi müyurü nücho ko Abi neng nengdang adhichi hirocho.

¹⁵ABÜDONGBA, ninglang Nü liba Amüsa ko ahechi la tsünü ihrü chah dheng. Ihrü nengdang lümba khüde liro? Nü zii khülo? Nü amüi ko thsa lümba khüde liro? Ihrü mükhimücho tüpehjü.

¹⁶Nüh ihrü au. Ihrü jümürü Abraham ko Jakobrünü ihrü müdhengcheh, ta Nüh ABÜDONGBA, ihrü au, Nühnü lede ihrü khümchore.

¹⁷Tuepü ihrü Nü lang lanü thrümehsohcho? Tuepü ihrü hidoi hongzi Nü tenü za tsisohcho? Nü dikehrü khyanglangnü, lede Nü nyitsarüti khyanglangnü, thali rung.

¹⁸Ihrü Nü Amüsa müyurü, azachah nengdang ihrü rorünü ihrü iipehko: arühnü Nü Amüsa kuh dhrümchiko.

¹⁹Khodesü Nüh ihrü yangthsarü müthsacho roh-i, khodesü Nü nyitsarü müthsacho kyo, Nühnü ihrü bichicho.