Read Sangtam Naga Isa 65 Bible Online

Isa 65 - Sangtam Naga bible

Isa 65

¹ABÜDONGBAnü yocho, “I muyurü dangkhidangnang lalingnung Ih rungnüm du licho, ta arühnü müdangkhidangnang. Ih arüh khyang ngusohnyücho, ta arühnü ayangchi mii müyangchidheng. ‘Ih hila lile; Ihnü nührü rükunung’ pü lalingnung rungnüm linye, yuchotinü Ih yang müdangkhidangnang.

²I müyurünü arüh thsanyücho thsa amüthsalang nguchi nye, Ihnü arüh khyüchonung lede rungnüm du licho.

³Arühnü ashahmükehnü I zichürosohre. Arühnü Amüsa tbü la müyudsirü kangmübü mübüre ko arüh bholu chah müchiji trüpre.

⁴Ama la arühnü asürü nbü te müchehnung lungkoh ko kong lang würe. Arühnü müyudsirü kangmübü mübücho lanü külüpcho hikih yongre ko shükashu tsure.

⁵Hütsüpü bürü telü, ‘Ihrü tenü shehkhung; ihrü chah tüthahbü, tunüo ihrü amüsa lile pü yore.’ Ihnü hütsü mürangchore, hütsüri nyüm I rihlong tsü mümehba michang kyo lile.

⁶“Arüh khingchinung Ihnü dhrongchehpehko, ko hütsü thrahpehko. Arühnü nguchiba tsü Ihnü müpehcheh, ta arüh jümürü ko arüh münyi ngang arüh chah küdunung.

⁷Arühnü müyudsirü amüsa müdüm akhang chah müchiji trüpko ko Ih nyüm choko. Hütsünü arüh nguchi aleng Ihnü arüh khingchinung.”

⁸ABÜDONGBAnü yore, “Sünüsü shükusih atsa müpehre, ta hütsürinü cikih külüpre. Hütsü kyo, Ihnüsü I müyurü müpehnung, sünü Ih dikehnang Ihnü abi khümchonung.

⁹Ihnü Juda tsutpu Israelrü müwajünung, ko arüh trahnü I yo azong lih khyünung. Ihnü throchehrü, ko I dikehrüti, hütsüla linung.

¹⁰Arühnü Ih mübünung ko arüh san ko misü nyüzüdulang Sharon Ngah ko nyüchürolang Akhor Ngah, zanuyo lang nowünung.

¹¹“Ta Ih thrüchahchüpehrü, ko I yo Amüsa Khang Zion, pehjürüti, müngu ko suro tsingrang Gad ko Mani mübürüti nengdang pathsa linung.

¹²Shüh khatoh sünung tsü nührü müngu linung, tunüo Ihnü dside nührünü mülaling ko Ihnü chode münyi. I yocho münyinung ko amünyi nguchinung nührünü throchehcho.

¹³Hütsünü Ihnü nührü te yore, sünü Ih mübonang ko I yocho nyinang tsuyongnung thangchi ngunung, ta nührülü kongnung ko xosehnung. Arüh künyangnung ta nührü wahnung.

¹⁴Arüh akünyangnü khi thsanung, ta nührü lasih thsangnyang tranung.

¹⁵I athrochehcho müyurünü nührü neng tsü chokehchola la bichinung. Ih, Akohba ABÜDONGBAnü nührü süsohnung. Ta I yu nyirüti khyanglü Ihnü aneng asi khüdu jünung.

¹⁶Hütsüba lih la lirü sünü amüwa chingro abinü Yuje choba Tsingrang khyang müwajüsohnyünung. Sünü yuchümro abinü yuje choba Tsingrang nengla yuchümnung. Atsicho chongcha khunung ko nbüchopehnung.”

¹⁷ABÜDONGBAnü yore, “Ihnü limih asi ko ning asi thrire. Atsicho la atikehcho apüm nbüchopehnung.

¹⁸Ihnü thricho la achangka müli künyangtaang. Ihnü külüpba asi Jerusalem tsü akünyangnü jengnung, ko hütsüla liba müyurünü künyangnung.

¹⁹Jerusalem ko abükyü müyurü nengdang Ipusü akünyangnü jengnung. Hütsüla metraba ko arüku chingba mülinung.

²⁰Adelü akhungade süba mülinung, ko apüm kutsüp linung. Kang thsih khüdu lirü tsü azarüepü khichinung. Hütsü müchie sürü tsü Ihnü khingchicho amüdhethsa linung.

²¹Müyurünü arüh kuh thsanung ko hütsürila linung, arüh aparünü müsehchinung. Arühnü shükusih khyümnung ko hütsüri asih tsunung, hütsü bürünü müyongjünung. Singdongti kyo, I müyurü kutsüp linung. Arühnü nguchiba tsü arühbürünü longnyüp tsuyongnung.

²³Arühnü nguchicho la akoh ngunung, ko arüh tsuzarünü achangba mümütohnung. Ihnü abi ko atrah lede müwajünung.

²⁴Arüh müdangkhidangnangkae, Ihnü arüh te lalingnung.

²⁵Rangfü ko sanza aroh tsuyongnung; misü kyo kihkhünyingnü manying tsunung, ko adelü mürü tsü dhsürü müthsanung. I Amüsa Khang Zion chah, dhsürü mahkhang amütsa tu mülinung.”