Read Sangtam Naga Isa 7 Bible Online

Isa 7 - Sangtam Naga bible

Isa 7

¹Uzia shümtsurü ko Jotham tsurü Yangthsaba Ahaznü Juda la yangthsade, chita suhwücho. Syria Yangthsaba Rezin, ko Israel Yangthsaba Remalia tsurü Peka nyühnü Jerusalem mahcho, ta hütsü mükohchehcho.

²Khode Juda Yangthsaba yang Syriarü rothsarü ro Israel lih chipehcho yusi ro chihcho, abi ko abi müyurü apüm nyübongnü singdong füchicho kyo dhridhricho.

³ABÜDONGBAnü Isaya te yocho, “Nü tsurü Shear Jashub nüng ko Yangthsaba Ahaz shirünung wüng. Nühnü abi shüthsührü shüthsüh chah, athahlangba changtphü la kih münyehchehba yongroh achangka lang la shirünung.

⁴Abi te kukeing, tbachi ko müdrüpü linung young. Yangthsaba Rezin ko abi rothsarüti ko Yangthsaba Peka nyüh rihlong chüroba tsü mikhu tsibong anyüh lanü chüroba mikhu tenü alaa dhsürü mah.

⁵Syria, ko Israel ko yangthsarü zeh arah külüpcho.

⁶Arühnü Juda mah, müyurü tsü drüsoh arüh yola lüpsohnung, ko Tabel tsurü tsü Yangthsaba kangsohnung lümre.

⁷“Ta, Ih, ABÜDONGBAnü hütsüta khodesü mütikehsohnung mishare.

⁸Tunüo Syria tsü abi yangdiba Damaskas tenü re azehba mah, ko Damaskas tsü Yangthsaba Rezin tenü re azehba mah. Israel-lü, kang rohrepü münga kahla yucho khüdu kang mülichehnungthsa shühnyangnung.

⁹Israel tsü abi yangdiba Samaria tenü re azehba mah, ko Samaria tsü Yangthsaba Peka tenü re azehba mah. “Nü yudsinü mürangchokhang, nühnü mürangchonung.”

¹⁰ABÜDONGBAnü Ahaz yang yusi apa khüdu müthehcho:

¹¹“ABÜDONGBA nü Tsingrang te amüdhethsa khüdu ching. Hütsü asü lih asoh lanü mahkhang ninglanglih amunglangnü ronung.”

¹²Ahaznü lalingcho, “Ihnü amüdhethsa khüdu müchingnung. Ihnü ABÜDONGBA müthsatsünung.”

¹³Isayanü yocho, “Nyieng, ade David trah. Nyitsarü arangcho thsatsücho du mahpü nührünü Tsingrangba arangcho mii thsatsünung do?

¹⁴Tsale, khang, ABÜDONGBA apunü nührü khyang amüdhethsa khüdu jünung: Dheng, lazarü khüdu fü müdeng kangnung ko azarü khüdu suronung ko abi neng ‘Immanuel’ dsinung.

¹⁵Apunü atsa amütsa müdhe lümjing kangde, müyurünü nyikih yongnung ko thsakukih tsunung.

¹⁶Hütsüba shikhe müchidenü nührü drüsohba yangthsarü anyüh lih tsü thrüchahchü pehjünung.

¹⁷“ABÜDONGBAnü nührü chah, nührü müyurü chah, ko yangthsarü kukhi chah, Israel yanglih Juda tenü zako tinü mütikehcho amütsauba achangka nyümongti hironung. Abinü Assyria Yangthsaba noronung.

¹⁸“Hütsüba nyümong rode, Nile yongkhi anatung apümlangnü Ijiprü sümüza roh-i ko Assyriarü arüh lih lanü thsah kyo rosohnung ABÜDONGBAnü amüdhethsa mehnung.

¹⁹Arüh rüm ro angah la ko lungrah la kehnung, ko arühnü zengtrung ko rangva apüm lüptpah pümnung.

²⁰“Hütsüba nyümong rode, ABÜDONGBAnü Eufrates khüulang, Assyria Yangthsaba chahnü thah hehrü müli noronung ko abinü nührü benbüh, kuva ko nührü fü la kehcho apüm hehpehjünung.

²¹“Hütsüba nyümong rode, luthsarü khüdunü misüza khüdu ko miza anyüh du kang nye,

²²abinü müyongkhang nyikih jünung. Alih la amütrüh azikyah tsü ayongnung nyikih ko atsunung thsakukih thangchi ngunung.

²³“Hütsüba nyümong rode, shükusiluh atsati khüdu la shükusih hajar zehba ko khüdu la angang taripi hajar lengba, rangtrung ko zengnü chitisohnung.

²⁴Nyitsarünü hütsüla thsalu ko tbüdeng bipü shuh iiwünung. Alih apüm zeng ko rangnü chitinung.

²⁵Tsahma chisiba akhang lih apüm la zengdong dunü chitinung ko sünüsü hütsüla müwünung. Hütsü kanglungrü mungchah du kangnung.”