Read Sangtam Naga Isa 8 Bible Online

Isa 8 - Sangtam Naga bible

Isa 8

¹ABÜDONGBAnü I te yocho, “Lungtpah amülah khüdu hirung ko hütsü chah amülülahnü thrahng: ‘Maher-Shalal-Hash-Baz, adüzü Zah zühng, dhsüthsa kengchoung.’

²Longlangba nyitsarü anyüh yuzi thsasohnung, bebüba Uria ko Jeberekia tsurü Zekaria nüng.”

³Azachah lipü I nitpü fü müdeng kangcho. Khode akhunga tsü surocho, ABÜDONGBAnü I te yocho, “Aneng, Maher-Shalal-Has-Baz dsing (adüzü zah zühng, dhsüthsa kengchoung.)

⁴Akhunga tsünü ‘Itpa Uwa,’ pü dsinung mümüdhe denü Damaskas kuthsi apüm ko Samaria lanü kengchocho apüm Assyria Yangthsabanü hitsikhangnung.”

⁵ABÜDONGBAnü I te thali chotacho.

⁶Abinü yocho, “Hiri nyitsarünü Shiloa kihnatung lanü kih alonglüm mükhyüpü ko yangthsarü Rezin e Peka nyüh jingte dhridhrichonü,

⁷Ih, ABÜDONGBAnü Juda mahsohnung Assyria Yangthsaba ko abi rothsarüti noronung. Arüh tsü Eufrates Yongkhi mülümthoh pohcho kyo ronung.

⁸Hütsünü ahong chii küronung, ko lüpcho tingti Juda khu mülümpha alih apüm woh pohtpah tsinung.” Tsingrangba Ihsa te lile! Aqonü limih kyiti nyahyehnung.

⁹Yuchoti, dhridhri müjang shibülung! Nyieng, nührü ashu la liba yuchoti. Khatanung rungnüm, ta drüng! Rungnüm, ta drüng!

¹⁰Nührü lümchung külüpm! Ta arühnü khodesü mükohnung. Nührünü kohcho choung! Ta hütsü apüm adeng, tunüo Tsingrangba Ihsa te lile.

¹¹ABÜDONGBA zii arangcheh la, müyurü tsehba lang la mütsehnung Abinü Ih müzahsohcho.

¹²Abinü yocho, “Müyurü lümchung la tüzeh ko arühnü drüba nührünü tüdrü.

¹³Ih, Amichahba ABÜDONGBA, Amüsa epü lümchehng; nührünü Ih drüng.

¹⁴I Amüsaba tsü adrünung kehchonü, Ih nyitsarü jing müthiba lung khüdu kyo lile; Ih Juda, Israel ko Jerusalem yanglihti nyitsarü xohsohba zeng khüdu kyo lile.

¹⁵Adrong müthikehnung; arüh khülunung ko dhrümnahnung. Arüh zeng la xohnung.”

¹⁶Nührü, I monotinü I khyang Tsingrangbanü jüba yusiti tsü nyahng ko rikieng.

¹⁷ABÜDONGBAnü apu müyurü tenü apu jangjang rangko, ta Ihnü Abi chah longlangre ko I alongdi Abi chah yohpüre.

¹⁸Ih hila ABÜDONGBAnü jüba tsuzarü te lile. Zion khang chah Abi pümji liba Akohbong ABÜDONGBAnü, Israelrü yang Ihsa akang yusi müthehko.

¹⁹Ta müyurünü nü te ajümjümrü ko abolorü, asülang würü ko amongrü te yusi tsü tsingdheng pü yonung. Arühnü yonung, “Müyurünü akang lirü nengdang anbüti ko asürü te mücheh yusi khyünungbae.”

²⁰Nührünü hütsüri laling, “ABÜDONGBAnü nührü te tu yoro hütsü nyieng! Asülang würü yu tünyi, arühnü yoba tsü nü nengdang tu ajingcho mülinung.”

²¹Müyurüti suzah ko yangseh, alih la tsü rümchi rachinung. Arühnü yangseh ko rihlong chüronü arüh Yangthsaba ko arüh Tsingrangba chokehcholanung.

²²Arühnü ning chah kehchü dhengnung mahkhang alih la dhengnung, ta arüh küm wüba adrünung amarürah, chongcha ko ama chah khu apa tusü müngunung.