Read Sangtam Naga LEVIRÜ 13 Bible Online

LEVIRÜ 13 - Sangtam Naga bible

LEVIRÜ 13

¹ABÜDONGBAnü Mosa ko Aron nyüh khyang yuzeng hiri jücho.

²Nyüh khüdu aküp la mübhira kyo mathsa amütsa mahkhang kii mahkhang kyükyü chürokhang, abi tsü bebürü Aron trah yang norung.

³Bebüba tsünü mathsa tsü dhengnung ko hütsüla anbüh tsü thru kangkhang ko mathsa tsü aküp tenü asoh-u züdukhang, hütsü tsukhangra lile, ko bebübanü abi tsü amümüsaepü mishanung.

⁴Ta mathsa tsü athru ko aküp tenü asoh-u züducho mürangchehkhang ko anbüh tsü thru mükangkhang, bebübanü abi tsü nyümong dhünyeh pathsa khangtipünung.

⁵Ko dhünyeh nyümong bebübanü thali dhengnung ko mathsa tsü müsühmüyapü asusuh du ngukhang, abinü adesü nyümong dhünyeh thali khangtipünung.

⁶Adesü dhünyeh nyümong bebübanü dhengnung ko mathsa tsü müsühmüyapü kungkehkhang abi tsü amüsa, hütsü mathsa duepü mishanung. Nyitsarüba tsü ajengki thsüthohnung ko abi tsü amüsa linung.

⁷Ta bebübanü abi tsü amüsaepü mishapü khanglang, mathsa tsü alaa tsikhang, bebürü te thali ngusohnung.

⁸Bebübanü abi tsü thali dhengnung ko alaa sühmüya tsicho ngukhang, abi tsü amümüsa; hütsü tsukhangraepü mishanung.

⁹Nyüh khüdu mübhira chürokhang, abi bebürü khyang dhengsohnung norobae.

¹⁰Aküp chah mathsa tsü athru thsakhang ko hütsü khu anbüh mii thrusohkhang ko mamükih tingkhang, hütsü tsukhangra lile.

¹¹Bebübanü abi tsü amümüsaepü mishanung; abi pathsa müyohpodhengnung, tunüo abi tsü mümüsajung lile.

¹²Mathsa tsünü ajing lanü athah chii tsütikhang, bebübanü thali dhengnung.

¹³Mathsa tsünü afü apüm tsütikhang, abinü hütsü amüsaepü mishanung. Aküp apüm tsü thru kangkhang, abi tsü ayahnü müsa lile.

¹⁴Ta adikehlanü mathsa tsü tingchehkhang, abi tsü amümüsa lile.

¹⁵Bebübanü abi thali dhengnung rode mathsa tsü tingthoh chürokhang, abi tsü amümüsaepü mishanung. Mathsa tingthoh chüroba adüzü tsukhangra ko nyitsarüba tsü amümüsa.

¹⁶Ta khode mathsa tsü kyangnü aküp tsü thru kangnang, abinü bebürü yanglang wünung ko abi thali dhengnung.

¹⁷Mathsa tsü thru kangkhang, abi müsa lile, ko bebübanü hütsü amüsaepü mishanung.

¹⁸Nyüh khüdu kii chüropü kyangpü

¹⁹akhanglang kii-kiiba müdüm la tsü athru tingkhang mahkhang mohmüru chürokhang, abinü bebürü yang wüng.

²⁰Bebübanü hütsü dhengnung ko aküp tenü arah tsü züdukhang ko hütsüla anbüh tsü thru kangkhang, abinü hütsü amümüsaepü mishanung. Hütsü kii la tsünü tsukhangra chürochoba lile.

²¹Ta bebübanü hütsü dhengdhengpü hütsüla anbüh tsü thru mükang ko aküp tenü mathsa tsü züducho müngukhang, ta hütsü jengpa ngukhang, abi tsü nyümong dhünyeh nengdang pathsa khangti yohpünung.

²²Abemi tsü adiu kangkhang, bebübanü hütsü amümüsaepü mishanung. Hütsü tsukhangra amüdhethsa lile.

²³Ta hütsü mümülichi ko müza mükangkhang, hütsü kii lanü arah due, bebübanü abi amüsaepü mishanung.

²⁴Nyüh khüdu tahcho thsakhang ko shutsa tsü athru mahkhang mohmüru kangkhang, bebübanü abi dhengnung.

²⁵Hütsüba müdüm la anbüh tsü thru kangkhang ko aküp tenü asoh-u züdukhang, hütsü tahcho lanü dikehcho tsukhangra lile ko bebübanü abi tsü amümüsaepü mishanung.

²⁶Ta hütsüla anbüh tsü thru mükangkhang ko aküp lanü asoh-u müzüdukhang, ko jengpa kangkhang, bebübanü abi nyümong dhünyeh nengdang pathsa yohpünung.

²⁷Bebübanü nyümong dhünyeh-u la dhengnung ko hütsü adiu kangkhang, hütsü tsukhangra lile ko abinü hütsü amümüsaepü mishanung.

²⁸Ta arah tsü mümülichikhang ko adiu mükangkhang ko jengpa kangkhang, hütsü tsukhangra mah. Bebübanü hütsü amüsaepü mishanung, tunüo hütsü atahcho arah du lile.

²⁹Khode khingkurü nye adhrerü nye thah la mahkhang kümjing la mathsa chüronang, bebürünü abi dhengnung.

³⁰Aküp tenü asoh-u züdukhang ko anbüh tsü müyeng ko nümnümkhang, hütsü tsukhangra lile, abi tsü amümüsaepü mishanung.

³¹Bebübanü dhengde, aküp tenü mathsa tsü azüdu-uba müngukhang, ta anbüh tsü münyahrümkhang, abi tsü nyümong dhünyeh nengdang pathsa khangtipünung.

³²Bebübanü dhünyeh nyümong thali dhengnung ko hütsü adiu mükangkhang ko anbüh tsü müyengnü mükangkhang ko aküp tenü asoh-u züdu müngukhang, apunü mathsa mükang tsü hehnung.

³³Bebübanü adesü nyümong dhünyeh thali khangtipünung.

³⁴Adhünyeh nyümong thali mathsa tsü bebübanü dhengnung ko adiu mükangkhang ko asoh-u müzüdukhang, abi tsü amüsaepü mishanung. Nyitsarüba tsünü ajengki thsünung ko abi müsa linung.

³⁵Ta abi amüsaepü mishapü khanglang, mathsa tsü adiu kangkhang, bebübanü hütsü thali dhengnung.

³⁶Mathsa tsü adiu kangkhang, anbüh amüyeng tsülü müdhengnung; abi tsü amümüsa lijungle.

³⁷Ta bebübanü mathsa tsü adiu mükang ko anbüh cheh chicho ngukhang, mathsa tsü kyangko, ko abi amüsaepü mishanung.

³⁸Khingkurü nye adhrerü nye khode aküp la athru chüronang, bebürünü hütsü dhengnung.

³⁹Aküp tsü pha-a thrukhang, hütsü aküp lanü lapha chürocho due; abi tsü amüsa lile.

⁴⁰Nyüh khüdu ahongkoh lang mahkhang akikhang lang kuva longkhang, hütsü khu abi amümüsa kangnung mükoh.

⁴¹

⁴²Ta kuva mükeh la tsü mohmüru mathsa chürokhang, hütsü tsukhangra lile.

⁴³Bebürünü hütsü dhengnung ko hütsü mohmüru mathsa chürokhang,

⁴⁴abinü hütsü amümüsaepü mishanung, tunüo abi thah chah tsukhangra kehle.

⁴⁵Sü tsukhangra kehro, abinü shüthreh khyüpü, kuva müsühpü, aromih ajinglang müshütipü, “Amümüsa, amümüsa” pü züde rachinung.

⁴⁶Hütsü mükyangde abi amümüsa linung ko abi aparü tenü za rangmüla linung.

⁴⁷Khode jengki shunbüh shü mahkhang anana,

⁴⁸mahkhang shünana shunbüh jengki mahkhang shuküp mahkhang shuküpnü külüpcho masü chah mangrang chüronang,

⁴⁹hütsü amüyah mahkhang mohmüru thsakhang hütsü xahtaba mangrang lile, hütsü bebürü te ngusohng.

⁵⁰Bebürünü hütsü dhengnung ko kohro tsü nyümong dhünyeh pathsa yohpünung.

⁵¹Abinü dhünyeh nyümong hütsü dhenglinung ko mangrang tsü ratpah tsikhang hütsü amümüsa.

⁵²Bebürünü hütsü trüp-pehnung, tunüo hütsü xahtaba mangrang, hütsüeko hütsü michangnü trüp-pehng.

⁵³Ta, abinü hütsü dhengde, mangrang tsü kohro chah tsü ratpah tsicho müngukhang,

⁵⁴abinü hütsü thsüpü nyümong dhünyeh adesü pathsa yohpünung.

⁵⁵Hütsüpü abinü hütsü dhengnung ko mangrang tsü müratpah nye müshohkhang, hütsü amümüsa linung; hütsü belang mahkhang khanglang kehnye, nührünü kohro tsü trüp-pehng.

⁵⁶Ta bebübanü dhengde mangrang tsü shohpü ngukhang, abinü shülanü nye shuküplanü nye hütsü rohcheh pehnung.

⁵⁷Hütsüpü, mangrang tsü thali chürokhang, hütsü ratpah tsirübae, hütsü abüdongrü tsünü trüp-pehng.

⁵⁸Abinü kohro tsü thsüde anyah tsü tsikhang, abinü hütsü thali thsünung, ko hütsü müsa linung.

⁵⁹Hütsüla, shunbüh shü nye, anana shü nye, mahkhang anbüh keh anana shü mahkhang shuküp jengki masü chah mangrang küducho nengdang yuzeng linung.