Read Sangtam Naga LEVIRÜ 15 Bible Online

LEVIRÜ 15 - Sangtam Naga bible

LEVIRÜ 15

¹ABÜDONGBAnü Mosa ko Aron nyüh khyang Israel nengdang yuzeng hiri jücho.

²Khode adhrerü khüdu abi fü lanü shonang hütsü amümüsa linung,

³hütsü mütozah shonye mahkhang zahnye amümüsa linung.

⁴Abi pümba mahkhang yüpba chongnong tsü amümüsa linung.

⁵Sünü abi chongnong chah mahkhang

⁶abi pümcho chah thahpünang abi jengki thsübae, mahkhang tsehkhu pehbae ko abi nyüzeh mümüsa linung.

⁷Sünü nyitsarüba chah tsü thahpünang abinü ajengki thsübae, ko tsehkhu pehbae ko abi nyüzeh mümüsa linung.

⁸Ashoba nyitsarünü müsa liba nyüh khüdu chah müchohkehkhang, hütsüba nyitsarünü ajengki thsübae ko tsehkhu pehbae ko abi nyüzeh mümüsa linung.

⁹Abi pümcho pümji mahkhang kuri chah pümji tsü amümüsa linung.

¹⁰Sünü abi pümcho chah thahpünang abi nyüzeh mümüsa linung. Abi pümcho pohki lanü khürünü lango hikhang, abi shü thsübae ko tsehkhu pehbae ko abi nyüzeh mümüsa linung.

¹¹Abinü akhu akheh mümütsahpü khürü chah thahpükhang, hütsüba nyitsarünü ajengki thsübae ko tsehkhu pehbae ko abi nyüzeh mümüsa linung.

¹²Abinü thahpücho alih fühlü mapnah pehng, ko singtbhü thsakhang thsüthoh pehng.

¹³Abi shoba lanü kyangpü, abinü nyümong dhünye yingnung ko ajengki thsonü kih amüthseng la tsehkhu pehnung ko abi amüsa linung.

¹⁴Akeh-u nyümong abinü mümüdhrü anyüh mahkhang kuh-mümüdhrü anyüh hiwü ABÜDONGBA liba trahtri la bebürü khyang jünung.

¹⁵Bebübanü khüdu münyi mübü ko khüdu trüp mübü mübünung. Hütsüta abinü nyitsarüba nengdang müsachehba nguchi nguchinung.

¹⁶Khode adhrerü khüdu aji chüronang, abinü afü apüm mütsahbae ko abi nyüzeh mümüsa linung.

¹⁷Shü mahkhang shuküp tu chah aji tsü shokehnang hütsü thsübae ko nyüzeh hütsü mümüsa linung.

¹⁸Mükhongpü khanglang adhreba ko khingkutpü anyüding mütsahbae, ko nyüzeh anyüh mümüsa linung.

¹⁹Khode khingkurü khüdu ayah ronang, nyümong dhünyeh abükyü mümüsa linung. Sünü abükyü thahpünang nyüzeh abi mümüsa linung.

²⁰Ayah roba bekhyah abükyü pümba ko yüpba tsü mümüsa linung.

²¹Sünü abükyü chongnong mahkhang pümji thahpünang abi jengki thsübae, ko tsehkhu pehbae ko nyüzeh mümüsa linung.

²⁴Ayah rode adhrerü khüdunü abükyü te mükhongkhang, abükyü amümüsa tsünü abi münyijüre ko abi nyümong dhünyeh mümüsa linung, ko abi tu chah pümro hütsüsü mümüsa linung.

²⁵Khingkurü ayah roba bekhyah tenü nyümong alaa rokhang mahkhang lede tenü alaa rokhang, ayah tsü mürokade lede roh-i mümüsa linung.

²⁶Hiba shikhe abükyü yüpba ko pümba kohro apüm tsü amümüsa linung.

²⁷Sünü hütsüri thahpüro abinü ashü thsübae ko tsehkhu pehbae; abi nyüzeh mümüsa linung.

²⁸Abükyü ayah roba tsü zahko khanglang, nyümong dhünye lipü abükyü müsa kangnung.

²⁹Akeh-u nyümong abükyünü mümüdhrü anyüh mahkhang kuh-mümüdhrü anyüh hiro bebürü khyang ABÜDONGBA liba Shükuh trahtri la jübae.

³⁰Bebürünü khüdu münyi mübü ko khüdu trüp mübü nengdang amübü jünung ko hütsüta abükyü müsachehba nguchi tsü nguchinung.

³¹ABÜDONGBAnü Mosa te, arüh ali chah along la liba Shükuh tsü arüh mümüsacho khu mümünyisohnung nengdang Israelrü müzahsohnung yocho. Arühnü münyijükhang arüh sünung.

³²Yuzeng hiri tsü adhrerü khüdu ayo lanü shode,

³³ko khingkurü khüdu ayah rode, mahkhang adhrerü khüdunü khingkurü khüdu mümüsa shikhe mükhongde nengdang yuzeng lile.