Read Sangtam Naga LEVIRÜ 16 Bible Online

LEVIRÜ 16 - Sangtam Naga bible

LEVIRÜ 16

¹Aron tsurü anyünü ABÜDONGBA khyang amümüsa michang mübüde süsohpü khanglang ABÜDONGBAnü Mosa te chotacho.

²Abinü yocho, “Nü mung Aron te Khütang Amüsa Müdüm akitising khanglang tsü akyahchocho shikhe la du züdunung young, tunüo hütsüla Yuzeng Singdi khangtiji chah tsü nyükhi la Ih lire. Abinü münyikhang abi sünung.

³Abinü münyi mübü nengdang misü bongtho khüdu ko trüp mübü nengdang sanpung khüdu hiropü du Khütang Amüsa Müdüm la tsü züdunung kohle.”

⁴Hütsüpü ABÜDONGBAnü athülaba hiri jücho. Aron-nü Khütang Amüsa Müdüm la tsü müzüduede, abinü mütsahpü bebü jengki hiri khyübae: Anana fükhüm ko apohki khyüba, rungrüm ko kuyühsing.

⁵Israel hungnü münyi mübü nengdang mizapung anyüh ko trüp mübü nengdang sanpung khüdu Aron khyang jüng.

⁶Abinü apu ko abi kukhirü münyi pehnung misüpung khüdu kangmübü jünung.

⁷Hütsüpü abinü miza anyüh tsü ABÜDONGBA Shükuh trahtri lang tsü nowünung.

⁸Hütsüla abinü lung anyüh, khüdu “ABÜDONGBA” ko akhüu tsü “Azazel” nengdang zii thsadhengnung.

⁹Aron-nü zii thsacho la throchehcho miza khüdu ABÜDONGBA khyang münyi mübü kangmübü jünung.

¹⁰Azazel nengdang throchehba miza tsü ABÜDONGBA khyang akangnü jünung ko müyurü münyi pehnung shulüm akungaselih la Azazel yang müthehchünung.

¹¹Khode Aron-nü apu ko abi kukhirü nengdang misüpung kangmübü jünang,

¹²abinü michang zehcho michang füh ko müchiji müyo anyüh Khütang Amüsa Müdüm la tsü hironung.

¹³Hütsüla ABÜDONGBA bete michang la müchiji tsü yohnung, ko abinü hütsü ngupü müsünung shulüm müchiji mikhu tsünü Yuzeng Singdi ahüpti tsü phatinung.

¹⁴Abinü misüpung shüh khürü khyo amüyungzanü ahüptising bete xahnung ko Yuzeng Singdi bete dhünyehpili xahnung.

¹⁵Hütsüpü abinü müyurü nengdang münyi mübü shulüm miza tsü müpsehnung, ko ashüh tsü Amüsauba Müdüm lang tsü hironung ko abinü misüpung shühnü nguchicho kyo, ahüpti ko Yuzeng Singdi bete xahnung.

¹⁶Israel Müyurü ko arüh münyi lanü müsachehnung shulüm, hütsüta abinü Khütang Amüsa Müdüm tsü ayah müsa müsachehnung. Hütsü roh-i abinü Shükuh nengdang nguchibae, tunüo hi amüsa aliji long la lile.

¹⁷Aron-nü Khütang Amüsa Müdüm la müsachehba nguchi nengdang züdupü müchürode, Shükuh la tsü süsü linung mükoh. Khode abinü apu, abi kukhi ko ahungshü nengdang nguchikanang,

¹⁸abinü bholu langthring trüp mübü ko müsachehnung shulüm chüdunung. Abinü misüpung ko miza ashüh tsü khürü khyo bholu nangolang ajüh chah tsü tungkehjünung.

¹⁹Amüyungzanü bholu chah tsü ashüh tsü dhünyehpili xahkehjünung. Hütsüta abinü Israelrü münyi lanü hütsü müsacheh amüsa kangsohnung.

²⁰Khode Aron-nü Khütang Amüsa Müdüm, ABÜDONGBA liba Shükuh ko bholu müsachehba nguchi tsü rungnümnang, abinü ABÜDONGBA khyang Azazel nengdang throchehba miza tsü jünung.

²¹Abinü miza thah chah tsü akheh anyüdingnü nyümkehnung ko Israelrü münyi, amütsa ko nyümba nyengchonung ko hütsüta miza thah chah tsü choyohjünung. Hütsüpü miza tsü athrochehcho nyüh khüdunü nüpü lipilih lang dse müthehchünung.

²²Miza tsünü abi te arüh münyi apüm nyitsarü mülicho lih yang hitsinung.

²³Hütsüpü Aron-nü Shükuh la tsü züdunü abi Khütang Amüsa Müdüm la müzüduede khyüba bebü jengki tsü phungcheh hütsüla yohpünung.

²⁴Abinü Amüsa müdüm khüdu la tsehkhupü apu jengki khyünung. Hütsüpü khanglang abinü chüdu apu ko müyurü münyi pehnung shulüm trüp mübü mübünung.

²⁵Abinü bholu chah tsü münyi mübü nengdang kanglungrü su tsü trüpnung.

²⁶Nyitsarü sünü miza tsü rangmülang Azazel yang dse müthehcho, abinü apu jengki thsübae ko tsehkhupü du aliji lang robae.

²⁷Münyi mübü nengdang khyüba misüpung ko miza, khüiba shüh münyi pehnung Khütang Amüsa Müdüm lang hirocho, hütsü dongkhu hichüdu trüp-pehnung. Ashutsa, aküp ko axü hiri apüm trüpbae.

²⁸Sünü hütsü trüpro, abi tsüsü kuh lang müthalide ajengki thsübae ko afü mütsahpehbae.

²⁹Aronung shang apüm la yuzeng hiri bichinung. Choo dhünyeh la adhüreu nyümong tsü Israelrü ko arüh yola liba shuparü atümungnü tu münguchi kongbae.

³⁰Hütsü nyümong, arüh münyi lanü müsa kangnung nengdang müsachehba nguchi nguchinung.

³¹Hütsü nyümong tsü arühnü tusü münguchipü kong mungba, dee Amüsa nyümong khüdu thsanung. Hiri yuzeng hi aronung shang apüm la bichinung.

³²Bebürü, sü amichahba bebü thsanung au mülihnung müyühjo khachehthrocho, abinü ritsa külüpbae. Abinü bebü jengki khyünung

³³ko Khütang Amüsa Müdüm, Shükuh, bholu, bebürü ko yucho la müyurü apüm müsachehnung nguchi tsü nguchinung.

³⁴Hiri yuzeng hi aronung shang apüm la bichinung. Hiba ritsa nguchi hi Israelrü arüh münyi apüm lanü müsachehnung kang la khüdupi nguchinung. Hütsüta ABÜDONGBAnü yuzeng jücho roh-i Mosanü nguchicho.