Read Sangtam Naga LEVIRÜ 18 Bible Online

LEVIRÜ 18 - Sangtam Naga bible

LEVIRÜ 18

¹ABÜDONGBAnü Mosa te yocho,

²Israelrü te young, “Ih nührü Tsingrang ABÜDONGBA lile.

³Nührü khüdupi liba Ijiprü saying tübichi mahkhang ade Ihnü nührü nowüba Kananrü saying tüithsa.

⁴I yuzeng bichieng ko Ihnü mülacho nguching. Ih nührü Tsingrang ABÜDONGBA lile.

⁵Ihnü jüba yuzeng ko saying bichieng, hütsü nguchichonü nührü akang khümchonung. Ih ABÜDONGBA lile.”

⁶ABÜDONGBAnü yuzeng hiri jücho. Ajünilarü te tümükhong.

⁷Nü tpa te mükhongnü nüu ashah tükhyüsoh, ko nü tpa khung ashah tükhyüsoh.

⁸Nüu ashümtpü tesü mükhong abi ashah tükhyüsoh.

⁹Nührü müjang nümüsunye mahkhang apalangnü nümüsunye, nü ni mahkhang nüu mahkhang nü tpa tsularü sütesü tümükhong.

¹⁰Nü shümtsularü te tümükhong; hütsü nüh ashah thsanung.

¹¹Nü tpa tsularü tesü tümükhong; abükyüsü nüni lile.

¹²Nüu nirü te nye mahkhang nü tpa nirü te nye tümükhong.

¹⁴Nüu azaba nitpü te tümükhong; abükyüsü nü tpa azatpü lile.

¹⁵Nü tsunyahlatpü te

¹⁶mahkhang nü mung nitpü te tümükhong.

¹⁷Nühnü mükhongcho khingkurü khüdu tsularü mahkhang shümtsurü te tümükhong; arüh nü te amünyethsa linung kohle, ko hütsü mabomashi nguchi lile.

¹⁸Nü nitpü akang lii, nü nitpü nirü, nü nitpü thsanung tükhyü.

¹⁹Khingkurü ayah rode abükyü te tümükhong, tunüo abükyü mümüsa.

²⁰Bürü nitpürü te tümükhong, hütsünü nüh münyi kangnung.

²¹Nü tsuzarü süsü Molek tsingrang mübüba la bichinung tüjü, tunüo hütsünü ABÜDONGBA, Tsingrang nengchünung.

²²Sünüsü adhrerü khüdunü khüdu te tümükhong; Tsingrangbanü hütsü thrünyire.

²³Adhrerü mahkhang khingkurü sünüsü kanglungrü te tümükhong; ahsa thsamehba tsünü nührü mümüsa kangsohre.

²⁴Hiri nguchi tunüsü nührü jangjang amümüsa tükang, tunüo hitari nguchiba tsü müyudsirü sürü nührü müngu hiba lih la licho ko nührü lisohnung sürü ABÜDONGBAnü iipehcho, arüh dunü nguchire.

²⁵Arüh nguchinü alih tsü amümüsa kangsohre, ko hütsünü ABÜDONGBAnü alih tsü khingchire ko hütsüla lirüsü mükhyüchore.

²⁶Arühnü nguchi amütsa hiri nguchi alih tsü amümüsa kangsohre, ta nührünülü hütsüta tünguchi. Israelrü thsanye mahkhang nührü yola liba shuparü thsanye, nührü atümungnü ABÜDONGBA yuzeng ko amülaba bichieng,

²⁸hütsükhang nührü müngu hütsüla lirü mükhyüchocho kyo, alihnü nührü mükhyüchopü mülinung.

²⁹Sürünü nguchi amütsa hiri nguchinang Tsingrangba nyitsarü yola mükhiyohnungepü nührünü müdhele.

³⁰Ko ABÜDONGBAnü yocho, “Ihnü jüba yuzengti bichieng ko hiba lih la nührü müngu lirüti saying tüithsa, ko hiri nguchinü nührübürü amümüsa tükang. Ih, nührü Tsingrang ABÜDONGBA lile.”