Read Sangtam Naga LEVIRÜ 19 Bible Online

LEVIRÜ 19 - Sangtam Naga bible

LEVIRÜ 19

¹ABÜDONGBAnü Mosa te yocho,

²Israel hung te young, “Müsa lieng, tunüo ABÜDONGBA nührü Tsingrang Amüsa.

³Nührü nyitsarü müipinü abürü atpa ko au jengreng drüng, ko Ihnü mülacho roh-i Sabath müsacheh yohpüng. Ih, ABÜDONGBA nührü Tsingrang.

⁴“Ih thrüchahchüpehpü kyothri tümübü; idhsenü tsingrang külüp tümübü. Ih, ABÜDONGBA nührü Tsingrang.

⁵“Khode nührünü akehta mübü nengdang kanglungrü müpsehnang, Ihnü jüba yuzeng tsü bichieng, ko Ihnü nührü amübü khyüchonung.

⁶Shuh tsü amüpseh nyümong mahkhang nyümong khüunü tsukhang. Asangu nyümong chii nyingba shutsülü trüp-pehng,

⁷tunüo hütsü amümüsa kangre, ko khürünü hütsü tsukhang, Ihnü amübü tsü mükhyüchonung.

⁸Sünü hütsü tsunang I khyang müsachehjücho lanü zasohre. Tunüo ABÜDONGBA jingte tu Amüsa liro hütsü abinü münyijüko, ko abi I müyurü yolanü khipehnung.

⁹“Khode nührünü maxanang, sahyoh chilü tüxa ko mamütrü thronung thali tüwü.

¹⁰Shükusih luh la amütrüh laanung mahkhang akungcho thronung thali tüwü; ailümrü ko atsichirü khyang hütsüri pehjüng. Ih, nührü Tsingrang ABÜDONGBA.

¹¹“Tüfü mahkhang tükiyohchü, mahkhang arahkheh tücho.

¹²I nengla arahkheh yuchümnü Tsingrang neng tüchü. Ih, nührü Tsingrang ABÜDONGBA.

¹³“Bürü tüsehti mahkhang abi yo tükhyüjü. Shehsherü nyükhehshi romang khüdu dusü zingli müjüpü tüyohbü.

¹⁴Anangtbengrü tüchokehchola mahkhang anahtohrü müthikehnungthsa abi bete tu tüyohpüjü. Ih drüng; Ih nührü Tsingrang ABÜDONGBA lile.

¹⁵“Nührünü yukhade yuje ko athsalangnü khaang; ailümrü te khüpakhüla tüthsa mahkhang alirü tükhüm.

¹⁶Sü nengdangsü arahkheh tsupohyupoh tüthsa. Nü kurümrü akang dhsürü thsanungthsa tu tünguchi. Ih ABÜDONGBA lile.

¹⁷“Nü jünirü nyüm tülüm, ta abi thsacholanü nüh amünyi müshitpahnungthsa abi te khiyu tsü nyichehtaang.

¹⁸Sü chahsü rüh tüyang mahkhang lede thrünyi du tüli, ta nühnü nüpu müicho kyo nü kurümrü müing. Ih ABÜDONGBA lile.

¹⁹“I amülaba bichieng. Kanglungrü ahung papa tümükhongsoh. Luh khüdu la majüh anyüh tüchisi. She lang anyünü kyahcho shü tümüpi.

²⁰“Nyüh khüdunü ayularü khüdu aparü adhrerü khüdu te ashüm thsanung inung nyengchokhang, ta aparüba tsünü abükyü angang müjükhang, anyüh mükhongpü linye abüdongba ko khingkutpü nyüh tsü müsüsohnung, ta akhingchi du jünung. Tunüo abükyü tsü ade yingcheh ayularü khüdu lile.

²¹Nyitsarüba tsünü I Shükuh trahtri la tsü thsamehcho mübü nengdang sanpung khüdu hironung,

²²ko hütsü bebürünü abi münyi pehnung nengdang müsachehba nguchinung, ko Tsingrangbanü abi mülangpehjünung.

²³“Nührünü khode Kanan lih la ronang ko singsilungsi khyümnang, akhudiba ayahnü kang asanglü hütsü amümüsa linung. Hütsü shikhe nührünü hütsü tütsu.

²⁴Amüyüu kang tsü singsih apümnü Ih ABÜDONGBA khyang nührü künyangcho ngusoh müsacheh amübü jüng.

²⁵Ta amüngau kang du nührünü singsih tsü tsung. Nührünü hiri apüm nguchikhang, nührü singsih dong tsünü singsih alaa sihjünung. Ih, nührü Tsingrang ABÜDONGBA.

²⁶“Nührünü shuh ashüh zeh tütsu. Azi-among nguchi tu tünguchi.

²⁷Asürü meshüde nührünü müchüplang kuva tümüjüp-peh,

²⁸mahkhang benbüh tüheh, mahkhang ngayah mütübae mahkhang füla tükyünah. Ih ABÜDONGBA.

²⁹“Nührü tsularüti amübükuh la nahtrahnaxenglarü kang ashah tükhyüsoh; nührünü hütsüta nguchikhang, nührünü aparü tsingrang lahpi ximülanung ko alih tsü mabomashinü jengnung.

³⁰Sabath müsacheh yohpüng ko I mübüji dhiching. Ih ABÜDONGBA.

³¹“Asülang würü te lümlong chingnung tüwü. Nührünü hütsüta nguchikhang, nührü amümüsa kangnung. Ih nührü Tsingrang ABÜDONGBA.

³²“Ashirü te jengreng drüng ko arüh dhiching. Ih drüng; Ih ABÜDONGBA.

³³“Nührü lih la liba shuparü nyüpmüseh tübichi.

³⁴Ajünirü Israelrü te kyo arüh te bichieng ko abürü müicho kyo arüh müing. Ijip la nührüsü khüdupi shuparü thsa licho lümchehng. Ih nührü Tsingrang ABÜDONGBA.

³⁵“Kii-dhengcho la, ho-dhengcho la mahkhang kyah-dhengcho la yuje mücho süsü tükiyohchü.

³⁶Akihba, ahoba ko akyahba yuje cho bichieng. Ih nührü Tsingrang ABÜDONGBA ko Ihnü nührü Ijip lanü nüchehcho.

³⁷I yuzeng ko amülaba apüm bichieng. Ih ABÜDONGBA.”