Read Sangtam Naga LEVIRÜ 21 Bible Online

LEVIRÜ 21 - Sangtam Naga bible

LEVIRÜ 21

¹ABÜDONGBAnü Mosa te yocho, bebürü Aron hung te young, “Abürü kuhla au, atpa, atsurü, atsularü, amung mahkhang amüxengcho anilarükhung müthsakhang,

²bebürü süsü asürü me la zeh

³abürü jangjang münyi mükangbae.

⁴Abi te dhrelarü lahpinü shükehta licho khunülü apu jangjang amümüsa mükangbae.

⁵“Bebürü sünüsü abi meshü la zehcho nguhsohnung athah mühehbae mahkhang benbüh mühehbae mahkhang afü la mükyünahbae.

⁶Abi müsa libae ko I neng mümünyijübae. Abinü I khyang tsang mübü jüre, ko abi müsa libae.

⁷Bebürü khüdunü nahtranahxenglarü mahkhang amümüthsengcheh mahkhang azacho khingkurü mükhyübae; tunüo abi Amüsa lile.

⁸Müyurünü bebürü tsü Amüsaepü lümbae, tunüo abinü I khyang amübü jüre. Ih ABÜDONGBA Amüsa lile, ko Ihnü I müyurü Amüsa külüpre.

⁹Bebürü tsularü khüdu nahtranahxenglarü kangkhang, abükyünü au khyang ashah hirojüre; abükyü tsü trüpseh pehng.

¹⁰“Amungthriba bebübanü athahchah tuji müyühjo throchehcho ko bebürü jengki khyünung müsachehcho lile, hütsünü abinü akuva müshüpü müpehjübae mahkhang abi longricho nguhsohnung ajengki mürehnahbae.

¹¹Abi I khyang müsachehchoba lile ko abi jangjangthsa amümüsa mükangbae, mahkhang atpa mahkhang au thsanye asürü me licho kuhla I Amüsa Shükuh pehjüpü züdunü Ih mümünyijübae.

¹³Abinü amüthsengcheh lazarü khyübae,

¹⁴ta chomilarü mahkhang azacho khingkurü mahkhang nahtranahxenglarü khüdu mükhyübae. Abinü apu hung lanü amüthsengcheh lazarü khüdu du khyübae.

¹⁵Mahkhang tsuzarü sürü amüsa linung athsalang, arüh amümüsa kangnung. Ih ABÜDONGBA ko Ihnü abi Amungthriba Bebü thsanung pathsa yohpücho.”

¹⁶ABÜDONGBAnü Mosa te yocho,

¹⁷Aron te young, “Nü trah la jingkheh müpisarü sünüsü I khyang amübü jünung mükoh. Hi aronung shang apüm nengdang linung.

¹⁸Jingkheh müpisarü sünüsü I khyang amübü jünung mükoh: anatohrü, ajingjahrü, müpimüsa, athrimüchüh;

¹⁹jingkheh jahrü;

²⁰arungbüm mahkhang amüchüh; nahshehrü mahkhang tsukhangra kehrü; ko axangmicho hitarinü I khyang amübü tüjüsoh.

²¹Bebürü Aron trah jingkheh müpisarü sünüsü I khyang amübü tüjüsoh.

²²Hitari nyitsarünü I khyang mübücho Amüsa tsang mübü ko khütang Amüsa tsang mübü tsunung kohle,

²³ta abi jingkheh mütsarü tsü, abinü Amüsa akitising mahkhang bholu chii müronungbae. Abinü hiri Amüsa mümünyijübae, tunüo Ih ABÜDONGBA ko Ihnü arüh Müsa kangsohre.”

²⁴Hütsüta, hiri tsü Mosanü Aron, Aron tsurüti ko Israelrü atümung te yocho.