Read Sangtam Naga LEVIRÜ 22 Bible Online

LEVIRÜ 22 - Sangtam Naga bible

LEVIRÜ 22

¹ABÜDONGBAnü Mosa te yocho, Aron te hita young,

²“Nührünü I Amüsa neng tümünyijü ko Israelrünü I khyang müsachehjüba Amüsa amübü tsü jengreng jo bichieng. Ih ABÜDONGBA.

³Nü trah la khürünü abi mümüsa lide Israelrünü I khyang müsacheh jücho Amüsa amübü shündhün rokhang, abi khyang bholu chah khodesü müdikehsohnung. Hi aronung shang apüm nengdang linung. Ih ABÜDONGBA.

⁴“Aron trah, sü tsukhangra kehro mahkhang abi yo lanü shoba mümüsachehde Amüsa amübü mütsunung. Bebürü sünü meshüla wonang mahkhang aji shonang,

⁵mahkhang amümüsa kanglungrü mahkhang nyitsarü chah thahpünang abi amümüsa kangnung.

⁶Bebürü sü mümüsa kangnang abi nyüzeh mümüsa linung ko hütsüpü mii mütsehkhude Amüsa amübü tusü mütsunung.

⁷Nyü züdupü du abi müsa kangnung ko Amüsa amübü ko abi tsuyongba tsunung.

⁸Abinü amükangnü sücho mahkhang rangmü kanglungrünü mükahsehcho tu shuh mütsunung; hütsünü abi mümüsa kangsohnung. Ih ABÜDONGBA.

⁹“Bebürü atümungnü Ihnü jücho yuzengti tsü bichinung. Mahkhang arüh mülangnung ko sünung, tunüo arühnü Amüsa yuzeng mübichi. Ih ABÜDONGBA ko Ihnü arüh Müsa kangsohre.

¹⁰“Bebürü tsutpu dunü Amüsa amübü tsü tsunung kohle; bebürü te lirü mahkhang abinü mülihcho aparü sünüsü hütsü tsunung mükoh.

¹¹Ta bebürü khyang jüba tsuyongba tsü bebürü apu thsinü lihcho mahkhang apu kuh lanü nümüsucho ayurütinü hütsü tsunung kohle.

¹²Bebürü tsularü khüdu bebürü müthsaba kuhla xengkhang, abinü Amüsa amübü tsü tsunung mükoh.

¹³Ta chomilarü mahkhang azacho bebüba tsularü, sü tsuzarü mülipü thali ro au kuhla liro abükyünü hütsü tsunung kohle. Hütsü bebürü tsutpu dunü tsunung kohle.

¹⁴“Bebürü kukhi khiyoh la müzehrü khüdunü mümüdhepü Amüsa amübü lanü lango tsukhang, abinü angang ajeng chah thsih la mükyü yohphehpü bebürü khyang thali jüng.

¹⁵Bebürünü aparü nyitsarü khyang

¹⁶Amüsa amübü tsusoh tümünyisoh; hütsünü nyitsarü chah akhingchi ko mülang hirore. Ih ABÜDONGBA ko Ihnü amübü tsü Müsa kangsohre.”

¹⁷ABÜDONGBAnü Mosa te yocho,

¹⁸Yuzeng hiri Aron ko atsurüti ko Israelrü atümung ko arüh yola lirü shuparü khürünü anyengchocho mahkhang amüküp mübü jüde, kanglungrü tsü tu achomükeh thsanungbae.

¹⁹Khyüchonung nengdang hütsü apung ko tu achomükeh thsabae.

²⁰Nührünü achokeh kanglungrü amübü jükhang, ABÜDONGBAnü hütsü mükhyüchonung.

²¹Nyüh khüdunü anyengchocho mahkhang amüküp mübü akehta mübü ABÜDONGBA khyang jüde khyüchosohnyükhang, kanglungrü tsü tu achomükeh thsanungbae.

²²ABÜDONGBA khyang anahtoh, ajingjah, lerohpehcho mahkhang mathsa kehcho mahkhang aküp zengnah-phohcho hitari kanglungrü amübü tüjü. Hitari kanglungrü bholu chah tsang mübü tüjü.

²³Amüküp mübülü achokeh nye jüng, ta anyengchocho mübülü hitari mükhyüchonung.

²⁴ABÜDONGBA khyang kanglungrü atse nyehrüpcho, kyühcho, xüpnahcho mahkhang rehnahcho hitari tümübü. Nührü lih la hitari mümülare.

²⁵Tsang mübü shuparü kheh lanü ngucho kanglungrü tümübü. Hitari kanglungrü tsü achokehcho roh-i khichire ko mükhyüchore.

²⁶Misü, san mahkhang miza aza mütrüde, nyümong dhünyeh atpa tenü türangsho, ta hütsüpü khanglang tsang mübü la khyüchonung.

²⁸Nyümong khüdunü misü ko aza, san ko aza mahkhang miza ko aza anyüdingnü tümübü.

²⁹Khode nührünü ABÜDONGBA khyang anengsejüba kangmübü jünang, hütsü khyüchochehnungthsa yuzeng tsü bichieng;

³⁰hütsü nyümongnü tsukhang, ko nyangnyü khüu yingcheh tusü tünying.

³¹ABÜDONGBAnü yocho, “I yuzeng bichieng, Ih ABÜDONGBA.

³²I neng tümünyijü; Israel atümungnü Ih Amüsaepü müdheing. Ih ABÜDONGBA ko Ihnü nührü Müsa kangsohre;

³³ko Ih nührü Tsingrang thsanung Ihnü nührü Ijip lanü nüchehcho. Ih ABÜDONGBA.”