Read Sangtam Naga LEVIRÜ 23 Bible Online

LEVIRÜ 23 - Sangtam Naga bible

LEVIRÜ 23

¹ABÜDONGBAnü Mosa khyang

²mübü yangthsa nengdang yuzeng hiri Israelrü mübünung shibülungde bichinung jücho.

³Nührü nguchi nguchinung nyümong dhüroh lile, ta dhünyeh nyümong, Sabath tsü akyahshang nyümongepü lümkehng. Hütsü nyümong tünguchi, ta mübünung shibülung. Nüh khüde khüde linye Sabath nyümong tsü ABÜDONGBA yo lile.

⁴Thsüti hiri bekhyah akihchehcho la sobhoung.

⁵ABÜDONGBA dhichinung Phungkhu Thsüti tsü, akhudiba choo nyümong dhüre-müyüu nyümong nyü züdupü dikehre.

⁶Dhüre müngau nyümong Bhüpza müyohba Hümthse Thsüti tsü dikehnung ko hütsü tinü nyümong dhünyeh bhüpza yohcho hümthse nührünü tütsu.

⁷Akhudiba nyümong tsü nührünü mübünung shibülung ko nührünü tu tünguchi.

⁸Nührünü ABÜDONGBA khyang nyümong dhünyeh tsang mübü mübüng. Adhünyeh nyümong tsü nührünü mübünung thali shibülung, ta nührünü nguchi tu tünguchi.

⁹ABÜDONGBAnü nührü khyang jüba lih la tsü nührünü khode ronang ko maxanang, akhudiba mabhong tsü bebürü yang hirung.

¹¹Nührü khyüchonung nengdang abinü hütsü ABÜDONGBA khyang jiyü pathsa mübünung. Bebübanü hütsü Sabath nyümong khüu tsü jünung.

¹²Nührünü fürü amübü jüh nyümong tsü, kang khüdu za tu achomükeh sanza khüdu trüp mübüng.

¹³Hütsü yola tsang mübü tuji la yohrütacho hüm süreh anyüh jüng. Hiba amübü axümlichi tsünü ABÜDONGBA künyangsohre. Nührünü hütsü yola yongkha liter khüdu mübüng.

¹⁴Nührünü Tsingrangba khyang amübü müjüde, fürü asi la tsünü ruhpü thsanye mahkhang hümthse külüp-pü thsanye tu tütsu. Hiba yuzeng hi nührü shümtsurü chii aronung shang apüm la bichieng.

¹⁵Nührünü ABÜDONGBA khyang mabhong amübü hiroba Sabath nyümong khüu tinü nyükhih dhünyeh ajeng khieng.

¹⁶Adhünyeh-u amünyümong khangte adhünyang nyümong tsü, ABÜDONGBA khyang apa fürü asi amübü jüng.

¹⁷Kukhi müipi ABÜDONGBA khyang pathsa amübü nengdang hümthse anyüh-nyüh hironung. Hümthse müipi tsü hüm süreh anyüh khyo bhüpza yohpü külüpnung ko maxacho lanü akhudiba amübü mübüng.

¹⁸Ko hümthse te tsü arühnü san kang khüdu za dhünyeh, misüpung khüdu ko sanpung anyüh, tu achomükeh amübü jüng. Arühnü ABÜDONGBA khyang trüp mübü tsü tsang mübü ko yongkha mübü yola jüng. Hiba amübü axümlichi tsünü ABÜDONGBA künyangsohre.

¹⁹Adesü münyi mübü nengdang mizapung khüdu ko akehta mübü nengdang kang khüdu za san anyüh amübü jüng.

²⁰Bebübanü hümthse te kang khüdu za san anyüh tsü bebürü nengdang mübüng. Hiri amübü Amüsa lile.

²¹Hütsü nyümong nührünü tu tünguchi, ta mübünung shibülung. Nü trahnü arüh khüde khüdesü linye, hiri yuzeng aronung shang apüm la bichinung.

²²Khode maxanang, nührünü sahyoh chii tüxa ko mamütrü thronung thali tüwü; ta ailümrü ko atsichirü nengdang hütsü pehjüng. ABÜDONGBA tsü nührü Tsingrang.

²³Choo dhünyeh la akhudiba nyümong tsü pathsa kyahshang nyümong mung, ko khode rühti mehnang, mübünung shibülung.

²⁵Ko ABÜDONGBA khyang tsang mübü jüng ko nührünü tu nguchi tünguchi.

²⁶Choo dhünyeh la adhüre nyümong tsü müyurü münyi pehnung nengdang ritsa nyümong lile. Hütsü nyümong tusü tütsu; ko mübünung shibülung ko ABÜDONGBA khyang tsang mübü jüng.

²⁸Hütsü nyümong tu tünguchi, tunüo hütsü münyi pehnung nengdang ritsa nyümong lile.

²⁹Sünü hütsü nyümong lango dusü tsunang abi Tsingrangba tsurü yola mükhiyohnung.

³⁰Ko khürünü hütsü nyümong lango dusü nguchikhang, ABÜDONGBA apunü nührü süsohnung.

³¹Nührü trah khüde khüdesü linye hiba yuzeng hi bichinung.

³²Hiba nyümong hi pathsa akyahshang nyümong, nührünü tusü mütsupü choo dhüre la adüku-u nyümong nyü züdu tinü adhüre nyümong nyü züdu chii mung.

³³Tsikeh Thsüti tsü choo dhünyeh la dhüre-müngau nyümong dikehre ko nyümong dhünyeh mütozah linung.

³⁵Akhudiba nyümong tsü mübünung shibülungnung ko nührünü nguchi tusü münguchinung.

³⁶Nyümong dhünyeh nyümong müthe nührünü tsang mübü jünung. Akeh-u nyümong mübünung shibülungnung ko tsang mübü jünung. Hi nyümong nührünü tu tünguchi.

³⁷(Hiri hi yudsi yangthsa Thsüti la nyümong mükhu thsütah tsang mübü, trüp mübü, fürü mübü, kangmübü ko yongkha mübü bipü nührünü ABÜDONGBA dhichinung shibülung.

³⁸Thsüti hiri hi lede Sabath nyümong chah lahkeh ko hiri amübü hi nührü anyengchocho ko amüküp mübü tenü alaa ABÜDONGBA khyang nührü amübü jiyü lile.)

³⁹Khode nührünü maxa thümnang, choo dhünyeh la nyümong dhüre-münga lanü dikeh dhünyeh nyümong hiba thsüti hi müzeh mung. Akhudiba nyümong tsü pathsa akyahshang nyümong linung.

⁴⁰Hütsü nyümong singsih atsauba hirung, se jengza ko Singva adhülüm khürü hirung ko nührü Tsingrang ABÜDONGBA dhichinung thsüti tsü dikehng.

⁴¹Hütsü nyümong dhünyeh müzeh mung. Hiba yuzeng hi aronung shang apüm la nührü trahnü bichinung.

⁴²ABÜDONGBAnü Israelrü Ijip lanü nüchehde mütpahvi khüdu la lisohchoepü nührü shümtsurütinü müdhenung shulüm,

⁴³Israelrü atümungnü nyümong dhünyeh mütpahvi la lieng. Abi tsü nührü Tsingrang ABÜDONGBA.

⁴⁴Hütsüta Israelrünü ABÜDONGBA dhichinung yudsi yangthsa thsüti mungnung yuzeng tsü Mosanü arüh khyang jücho.