Read Sangtam Naga LEVIRÜ 24 Bible Online

LEVIRÜ 24 - Sangtam Naga bible

LEVIRÜ 24

¹ABÜDONGBAnü Mosa te yocho,

²Israelrü khyang yuzeng hiri jüng: Mütozah Shükuh la dsi tsü tahkeh yohpünung shulüm olive tuji atsauba tsü hirosohng.

³Khütang Amüsa Müdüm la Yuzeng Singdi bete Aron-nü romang mükhu hütsüri tsü tahkehnung ko nyangnyü khüu yingcheh yohpünung. Hiba yuzeng hi aronung shang apüm la yohpünung.

⁴ABÜDONGBA kuhla hon amüthsengnü külüpcho dsimüdongsing chah dsi tsü Aron-nü mümehsohpü xükümnung.

⁵Hüm süreh dhüre-anyüh hiro hümthse dhüre-anyüh külüpm.

⁶Hon amüthsengnü külüpcho tsingthsang chah ABÜDONGBA bete hümthse tsü dhürürohnü chung anyüh kang chung.

⁷ABÜDONGBA khyang tsang mübü thsanung hümthse mülih achung Anyüdinglang müchiji atsauba yohpüng.

⁸Aronung shang apüm la Sabath nyümong müipi ABÜDONGBA bete hümthse tsü yohpüjüng. Hi lede nengdang Israelrü anguchinung.

⁹Hümthse tsü Aron ko abi trah yo thsanung ko arühnü hütsü Amüsa müdüm khüdu lanü tsunung, tunüo hiba hi bebürü nengdang ABÜDONGBA khyang tsang mübü jücho la khütang Amüsa nohlüm khüdu lile.

¹⁰Nyüh khüdu au Ijiprü ko atpa Dan tsutpu lanü Dibri tsularü Shelomit chahnü licho. Arüh lichah hiba nyitsarü tsünü Israelrü khüdu te yübütacho.

¹²Yübütaba te tsü abinü Tsingrangba chokehcholacho, achotsü arühnü abi Mosa yanglang nowücho ko khangti yohpüpü abi chah tu nguchinung ABÜDONGBA te tsingdhengcho.

¹³ABÜDONGBAnü Mosa te yocho,

¹⁴“Hütsüba nyitsarü tsü ali chahnü dongkhu no chüdung. Abinü chokehcholacho yuchirü atümungnü abi thah chah nyümkeh abi amülanglangepü yuzi jüsohng ko amülung apümnü abi lungnü kengseh süsohng.

¹⁵Hütsüpü Israelrü te Tsingrangba chokehcholarülü hütsü ngang khingchinung ko süsohnungepü young.

¹⁶Israelrü nye ko hütsüla liba shuparü thsanye, sünü Tsingrangba chokehcholanang, abi kengseh süsohnung.

¹⁷“Sünü müpsehro abi süsohnung,

¹⁸ko sünü bürü yo kanglungrü kyüsehnang abinü amülih jünung. Hütsü akang mülih akang.

¹⁹“Sünü bürü lerohpehjüro, abinü tu nguchicho abi chah hütsü akyokyo nguchinung.

²⁰Abinü arüh khyahsahjükhang, abi rüh khüdu khyahsahjünung; nahtse mülih nahtse, aha mülih aha. Abinü khüta thsakehjüro, hütsüta abi chah thsakehjünung.

²¹Sünü kanglungrü khüdu kyüsehnang abinü hütsü mülihjünung, ta sünü nyitsarü müpsehnang abi süsohnung.

²²Hiba yuzeng hi Israelrü ko nührü yola liba shuparü atümung nengdang linung, tunüo Ih nührü Tsingrang, ABÜDONGBA lile.”

²³Khode Israelrü te Mosanü hi yocho, arühnü nyitsarüba tsü dongkhu no chüdu kengseh süsohcho. Hütsüta ABÜDONGBAnü Mosa te yocho kyo Israelrünü nguchicho.