Read Sangtam Naga LEVIRÜ 25 Bible Online

LEVIRÜ 25 - Sangtam Naga bible

LEVIRÜ 25

¹ABÜDONGBAnü Mosa te Sinai khang chah yocho,

²Israelrü te yuzeng hiri young. ABÜDONGBAnü jüba lih la khode nührü züronang, dhünyeh-u kang müipi nührünü luh müthsapü abi dhichinung.

³Nührünü kang dhüroh luh thsanung, shükusih yo thsanung ko yangyonung.

⁴Ta dhünyeh-uba kang tsülü alih nengdang akyahshang kang ko ABÜDONGBA khyang müsacheh jüba kang linung. Luh tüthsa mahkhang shükusih yo tüthsa.

⁵Ajangjangnü surocho ko mükhyümcho lanü mii tüxa, ko atsoh lanü sihcho shüsisü tülaa; alih nengdang akyahshang kang lile.

⁶Hütsü kang luh müthsanye, alihnü nührü, nührü yurüti, shehsherüti, nührü yola liba shuparüti,

⁷nührü kuh kanglungrü ko rangmü kanglungrü khyang tsuyongnung jünung. Hütsü lanü chürocho lüpcho nührünü tsunung kohle.

⁸Kang dhünyeh tsü dhünyehpinü hikhang, kang yürepü düku chürore.

⁹Hütsüpü choo dhünyeh la adhüreu nyümong ritsa nyümong tsü, yanglih apüm la rühti mehnung nyüh khüdu müthehng.

¹⁰Hütsüta dhünyangu kang tsü müsachehng ko alih la lirü atümung te nyüje suro sobhoung. Hi nührü nengdang Jubilee linung. Hiba kang kuthsi alicho apüm aiba abüdongrü khyang thali jüng ko ayurüthsa licho arüh hung yang wüsohng.

¹¹Adhünyangu kang tsü nührü nengdang Jubilee linung; tüchisi mahkhang atsoh tüyangyo.

¹²Tunüo hiba hi Jubilee ko hi nührü nengdang Amüsa linung; luh lanü chürocho du tsung.

¹³Hiba jubilee kang alicho apüm aiba abüdongrü khyang thali jüng.

¹⁴Hütsüeko nührünü ajünirü Israelrü te alih ide mahkhang abi chahnü lihde nyümta tübichi.

¹⁵Angang tsü aronung jubilee müchihde alih tsünü kang khüdoi chisi tsunung hütsü müchehpü khasahng.

¹⁶Kang adrong likhang angang tsü adrong thsanung, ta kang akhikyah du nying likhang angang tsü kyühchonung, tunüo iba tsü alih tsünü khüdoi chürojünung hütsü nengdang du lile.

¹⁷Ajünirü tükiyohchü, ta nü Tsingrang ABÜDONGBA drüng.

¹⁸ABÜDONGBA yuzeng ko amülaba apüm bichieng, ko alih la nüh khümcho linung.

¹⁹Alihnü tsahma chürojünung, ko nührü tsunyücho tsu ko khümcho linung.

²⁰Ta khürünü luh la tu müchisikhang ko müyangyokhang, adhünyeh-u kang tsü tu tsunung pü yonung kohle.

²¹Kang adhüroh-u tsü kang anyüh kükyünungthsa ABÜDONGBAnü alih tsü müwajünung.

²²Khode nührünü akeh-u kang ma chinang, kang adhüroh la xacho tsang tsuyanung, ko hütsü kang ma müxade tsuxahnungthsa kükyo linung.

²³Nührünü alih tsü arühtoh ngang tüi, tunüo hütsü Tsingrangba yo lile; ko nührü tsü shirü khyang bichisohcho kyo bichisohrü du lile.

²⁴Alih müthsühde, alih abüdongrünü thali lihchehnung tsüp-pü du ieng.

²⁵Ajünirü khüdu iilüm kangpü alih müthsühkhang, tsutpurünü hütsü lihchobae.

²⁶Hütsü lihchonung tsutpurü mülikhanglü nyitsarüba tsü akhanglang alirü kangkhang, apunü lihchonung.

²⁷Hütsütakhang alihba khyang tsü abi nying liba kang tsü hümpü thali jübae, hütsüpü du abinü alih tsü khyünung.

²⁸Ta abinü alih tsü thali lihchehnung mükohkhang jubilee yingcheh alihba khehla linung. Jubilee kang du alih abüdongba khyang thali jünung.

²⁹Nyüh khüdunü yangdi tbü pohki kuh khüdu ikhang, aicho nyümong lanü akhudiba kang khüdu kahla lihchehnung kohle.

³⁰Ta abinü hütsüba kang la tsünü mülihchehkhang, akhanglang thali lihnung mükoh, ko kuh tsü lede nengdang alihba ko abi tsurüti yo kangnung; hütsülü Jubilee kang mii thali müjünung.

³¹Ta mütbüticho yangdong la kuhlü alih lihtacho roh-i du bichinung; thali lihchehnung ko jubilee kang jülinung athsalang.

³²Ta, Levirülü arüh khyang jo liba yangdi la masü te lihchehnung kohle.

³³Hitari yangdi la Levirü khüdunü kuh khüdu ipü thali mülihchehkhang, hütsü jubilee kang thali jünung, tunüo yangdi la liba Levirü kuthsi tsü Israelrü yola arühtoh arüh yo lile.

³⁴Ta Levirü yangdi mükang alihlü khodesü mü-inung; hütsü lede nengdang arüh kuthsi linung.

³⁵Nührü shündhün lirü ajünirü khürü iilüm kangpü apu jangjang mülihchehkhang, abi mütozah nührü shündhün lisohnungthsa nührünü shehsherü trocho kyo, arüh troung.

³⁶Abi chahnü ajehyoh tükhyü, ta Tsingrangba drüng ko arüh nü shündhün lisohng.

³⁷Nühnü nyajüba la tsü ajehyoh tükhyü, ko nühnü tsuyongba abi te ide alaa tüching.

³⁸Hiba hi nührü Tsingrang thsanung ko Kanan lih nührü khyang jünung Ijip lih lanü nüchehba nührü Tsingrang ABÜDONGBA yuzeng lile.

³⁹Nü shündhün lirü ajünirü khüdu khura iilümcho khu nü yurü thsanung ikhang, nühnü abi ayurü nguchi tünguchisoh.

⁴⁰Abi nü yola shehsherü khüdu roh-i lisohng ko aronung Jubilee müchide nüh dikehsohng.

⁴¹Hütsütade abi ko abi tsurütinü nüh pehjüpü arüh kukhi ko arüh jümürü kuthsi yang wüsohng.

⁴²Israelrü tsü ABÜDONGBA yurü ko abinü arüh Ijip lanü nüchehcho; arüh ayurü kang mü-inung.

⁴³Arüh sehchi tübichi, ta Tsingrangba drüng.

⁴⁴Nührü ayurü thsütahkhang, nührü mükangmüshü yuchoti lanü lihng.

⁴⁵Nührünü nührü yola liba shuparü tsurüsü lihnung kohle. Nührü lih la suroba hütsürilü nührü yo kangnung kohle,

⁴⁶ko nührünü nührü tsuzarüti khyang thsiking kang yohpüjünung kohle, arühnü arüh akangli ayung dikehnung. Ta nührünü nührü ajünirü Israelrülü sehchi tübichi.

⁴⁷Adüzünü nührü yola lirü shuparü khüdu alirü kangpü, Israelrü khüdu iilüm kangpü shuparü te mahkhang abi tsutpurü te ayurü thsa iko.

⁴⁸Abi ipü khanglang, abi adesü thali lihchehnung kohle.

⁴⁹Amung ani khüdunü mahkhang au azaba, mahkhang aku mahkhang tsutpurü khüdunü abi lihchehnung kohle; mahkhang kükyo kangkhang, apunü apu nyüje kang lihnung kohle.

⁵⁰Abinü abi lihbarü te chotanung ko arühnü abi iba kang tinü aronung jubilee kang chii hümnung ko shehsherü nyühkheh ngang jüba hümpü abi lihchehnung angang tsü khasahnung.

⁵¹Abinü nying liba kang tsü hümpü alihcho angang la tsünü thali jüng,

⁵²

⁵³abi tsü kang mükhu mülihcho roh-i abüdongrünü abi sehchilü tübichi.

⁵⁴Hiri lang khüdunüsü abi mülehchehkhang, abi ko atsurüti aronung jubilee la tsü lehchehnung.

⁵⁵Israelrü khüdu arühtoh ayurü kangnung mükoh, tunüo Israelrü tsü ABÜDONGBA yurü. Ihnü arüh Ijip lanü nüchehcho; Ih ABÜDONGBA, nührü Tsingrang