Read Sangtam Naga LEVIRÜ 27 Bible Online

LEVIRÜ 27 - Sangtam Naga bible

LEVIRÜ 27

¹ABÜDONGBAnü Mosa khyang Israelrü nengdang yuzeng hiri jücho.

²Khode nyüh khüdu ABÜDONGBA khyang pathsa nyengchocho khüdu nengdang jünang, hütsüba nyitsarü tsü yuzengnü mülacho aichi

³akhasahcho thsi hidoi jüpü lehchehnung kohle: — Kang mükyü lanü rohre azirü: taripi shekel 50, — Azilarü taripi: shekel 30 — Dhrezarü kang münga lanü mükyü: taripi shekel 20 — lazarü: taripi shekel 10 — akhungarü adhrerü kang münga pohki: taripi shekel 5 — akhungarü khingkurü: taripi shekel 3 — Azirü kang rohre milang: taripi shekel 15 — Ashilarü kang rohre milang: taripi shekel 10

⁸Yuchümcho nengdang nyitsarüba tsünü akhasahcho angang tsü ajünung mülikhang, abinü nyitsarüba tsü bebürü yanglang noronung ko bebübanü nyitsarüba tsünü khüdoi jüchehnung hütsü phipü khasahnung.

⁹Yuchüm tsü ABÜDONGBAnü khyüchochehba kanglungrü khüdu nengdang thsakhang amübü khüdu roh-i khyüchochehle ko ABÜDONGBA khyang jüba jiyü apüm tsü Amüsa lile,

¹⁰ko sünü hütsü yuchümcho abinü hütsü mülih apa müjünung. Abinü mülihkhang kanglungrü anyüding tsü ABÜDONGBA yo kangnung.

¹¹Ta yuchümba tsü ABÜDONGBA te amükhyüchochehba kanglungrü thsakhang, nyitsarüba tsünü kanglungrü tsü bebürü yanglang hiwünung.

¹²Bebürünü kanglungrü tsü atsa amütsa dhengnü angang khasahnung ko hütsü achangka thsanung.

¹³Nyitsarüba tsünü hütsü lihchehnyükhang, abinü angang chah tsü lahkeh thsih la mükyü jüpü khyünung.

¹⁴Khode khürünü abi kuh ABÜDONGBA khyang müsacheh jünang, bebürünü angang tsü atsa amütsa dhengnü khasahnung ko hütsü achangka thsanung.

¹⁵Ajüba abüdongba tsünü lihchehnyükhang, abinü angang chah tsü thsih la mükyü lahkehjüpü khyünung.

¹⁶Nyüh khüdunü abi lih lanü changsho ABÜDONGBA khyang jükhang, angang tsü majüh khüdoi pehnungnang hütsü aichi, lüdi süreh mükyü pehnungla taripi shekel dhüre jünung khasahbae.

¹⁷Abinü alih tsü jubilee khanglang kang khüdu kahla jükhang, angang ajeng khyünung.

¹⁸Hütsü khanglang thsakhang, bebürünü angang tsü aronung jubilee müchide kang khüdoi nying liro hütsü phipü kyüchopü khasahnung.

¹⁹Ajüba tsünü lihchehnyükhang, abinü angang chah tsü thsih la mükyü lahkehjüpü khyünung.

²⁰Abinü mülihchehpü bürü te ikhang, hütsü akhanglang lihchehnung mükoh.

²¹Aronung jubilee lalü hütsü arühtoh ABÜDONGBA yo kangnung; hütsü bebürü yo kangnung.

²²Nyüh khüdunü abinü lihchocho luh khüdu ABÜDONGBA khyang jükhang,

²³bebürünü aronung jubilee müchide kang khüdoi nying liro hütsü phipü angang khasahnung ko hütsü nyümongnü nyitsarüba tsünü angang tsü jübae; thsi tsü ABÜDONGBA yo thsanung.

²⁴Jubilee kang luh tsü abüdongba mahkhang abi tsuzaniza yanglang thalinung.

²⁵Angang apüm tsü akhasahcho roh-i linung.

²⁶Akhudiba mütrücho kanglungrü tsü ABÜDONGBA yo, hütsünü sünüsü hütsütarilü amüküp mübü tüjü. Misüza, sanza mahkhang mizaza tsü ABÜDONGBA yo lile,

²⁷ta amümüsa kanglungrü chahnü akhu mütrücho tsülü angang chah thsih la mükyü alaa lahkehjüpü lihchehnung kohle. Hütsü mülihchehkhang, aparü khürü khyang akhasahcho angangnü inung kohle.

²⁸Nyitsarü thsanye, kanglungrü mahkhang alih thsanye, ABÜDONGBA khyang khakhuchüjücholü inung mahkhang lihchehnung mükoh. Hütsü arühtoh ABÜDONGBA yo lile.

²⁹Nyitsarü mii ABÜDONGBA khyang khakhuchüjücholü lihchehlinung mükoh; abi süsohbae.

³⁰Alih lanü chürocho führü nye, singsih nye, dhüre la nohlüm khüdu tsülü ABÜDONGBA yo lile.

³¹Nyüh khüdunü hütsüri lango lihchonyühkhang, abinü angang chah tsü thsih la mükyü lahkehjüpü lihbae.

³²Kuh kanglungrü yolasü dhüre la khüdu tsü ABÜDONGBA yo. Khode kanglungrü tsü khidhengnang, adhüreuba tsü ABÜDONGBA yo.

³³Abüdongrünü atsa lanü amütsa müthrochehbae. Abinü mülihtakhang, kanglungrü anyüding tsü ABÜDONGBA yo kangnung ko lihchehnung mükohnung.

³⁴Yuzeng hiri Israelrü shulüm Sinai khang chah ABÜDONGBAnü Mosa khyang jücho.