Read Sangtam Naga JEREMIA 10 Bible Online

JEREMIA 10 - Sangtam Naga bible

JEREMIA 10

¹Israelrü, nührü nengdang ABÜDONGBA yu tsü nyieng.

²Abinü yore, “Aparü yucho tüithsa; ning chah pathsa nguchonü tülümkücha, aparü yuchonü hütsüri drü nye.

³Hiri nyitsarü mübü yangthsa tsü adeng. Mürong lanü singdong khüdu rerü; ko singkyührünü hütsü kyühchehre,

⁴ko hon ko taripinü mükingre. Hütsü mükhülusohnung imühinü hamkehre.

⁵Hütsütari kyothri tsü luh la uza rihba kyole; arühnü yu chonung mükoh; arüh tsü dhire, tunüo arühnü mütsehcheh. Arüh tüdrü: arühnü tu müdhsakehjünung, ko atsasü tu münguchijünung.”

⁶ABÜDONGBA, Nüh kyo sü müle; Nüh akohba, Nü neng arangcheh ko akurah.

⁷Sünülü Nü jengreng müdrünung, yucho apüm yangthsabong. Nü jengreng drünung aleng. Yuchoti la amüdherü yola mahkhang arüh yangthsarüti yola Nüh kyo sü müle.

⁸Arüh atümung adohrü ko amüsithsa. Arühnü sing kyothri chahnü tu nyichonung?

⁹Arüh kyothri tsü Spain lanü taripi ko Ufaz lanü hon-nü müshüticho, apüm khehnü külüpcho du; Axangcheh shükyahrü kyahcho anyahrüm ko mohmüru jengkire.

¹⁰Ta ABÜDONGBA, Nühlü yuje Tsingrang, Nüh akang liba Tsingrang ko achangka müliba Yangthsaba. Nü rihlong chürode, limih dhridhrire; yuchotinü Nü rihlong mürangcho.

¹¹(Ning ko alih müthriba tsingrang tsülü changjünungepü arüh te nührünü young. Arüh limih la khüdesü mülinung.)

¹²ABÜDONGBAnü Abi ziinü limih külüpcho; Abi lümlongnü lihküp thricho ko ning lehmüthehcho.

¹³Abinü yuzeng jüde ning michah kihnü khongcho; Abinü alih achangka lanü nyükhi hirore. Abinü tsing yola tsingchi külüpcho ko azahkehji lanü nyübong müthehre.

¹⁴Hi ngude, nyitsarünü adohrü kang lümlong chahre; kyothri külüprü tsü züchang pehre, tunüo arühnü külüpba tsingrang tsü arahkheh ko akang müle.

¹⁵Arüh tsü amii müle ko pehnungba du; ABÜDONGBA arüh te dhsükehnung rode, arüh changpehnung.

¹⁶Jakob Tsingrang tsü arüh mükyo; lüpcho külüpba tsü Abi, ko Abinü Israel tsü apu yo thsanung throchehcho. Akohba ABÜDONGBA tsü Abi neng.

¹⁷Jerusalemrü, nührü betiko! Nührü kohro zang.

¹⁸ABÜDONGBAnü hiba lih lanü nührü iipehnung; Abinü süsü münying changsohnung. ABÜDONGBAnü choko.

¹⁹Jerusalemrünü züdecho, “Ihrü khura mütsa thsakehko! Ihrü mathsa mükyangnung. Hi ihrünü rangchonung nguchi thsanungepü ihrünü lümcho!

²⁰Ihrü shükuh thsangnyang lile; arüh rahcho düshü tohnahko. Ihrü tsuzarü apüm tsipehko; ihrü shükuh thsachinung süsü müle; akitising kinungsü süsü müle.”

²¹Ihnü lalingcho, “Ihrü langnürüti adohrü du; langnüsohnung arühnü ABÜDONGBA te müching. Hütsü khu arüh amükoh ngucho, ko müyurü shupishuzacho.

²²Nyieng! Yusi roko! Kihku lahpi yucho khüdu la khiyu amülah chüroko; arüh rothsarütinü Juda yangditi lipilih kangsohnung, shirung lamungji khüdu.”

²³ABÜDONGBA, palu nahdhengkeh la palu abüdongrü mah; Sünüsü abürü akang mürahseh pü Ihnü müdhele.

²⁴Nü müyurü müchongchijüng, ABÜDONGBA; ta dee mülingnü mah, mahkhang Nü rihlong chüro lide ihrü tükhingchi; ihrü nengdang hütsü achangka thsanung.

²⁵Nü rihlong tsü Nüh mümübüba yuchoti ko Nüh mükhyüchoba nyitsarüti michah küdusohng. Arühnü Nü nyitsarü mapsehko; arühnü ihrü riri changsohko ko ihrü lih apehlih kangsohko.