Read Sangtam Naga JEREMIA 14 Bible Online

JEREMIA 14 - Sangtam Naga bible

JEREMIA 14

¹ABÜDONGBAnü I te trüpsehnyü nengdang yocho,

²“Juda meshü lile; yangditi sole, müyurü alih la longri jole, ko Jerusalemnü arüku ching züdere.

³Alirünü kih khanung kulirü müthehre; arühnü kihkong lang würe, ta kih müzeh; arüh füh adeng bipü thalire. Suhzah ko lümdhama, arüh romih rangre.

⁴Tsing mürochonü ko alih kungpehchonü, luthsarü lasih mükyahshangre; arüh romih rangre.

⁵Rangmüla shümüshü atpanü abükyü za mütrüyeng pehjüre, tunüo rangnu müle.

⁶Rangmü gadu akhang chah yare ko shirung kyo sah chichire; arüh nah mükoh trahre tunüo arüh atsunung müle.

⁷I müyurünü hita züdere, ‘Ihrü münyinü ihrü mülangjü nye, ABÜDONGBA, Nühnü nyengchocho kyo ihrü troung. Adrongpi ihrünü Nüh peh tsiko; ihrünü Nüh nyüm amünyi shitpahko.

⁸Israel alongdi tsü Nüh du; achangba lanü Nühnü ihrü khümchocho. Tuepü ihrü lih la nüh shirü khüdu kyo liro? romang khüdu du yüpba shitsehrü kyo liro?

⁹Tuepü thohdhünü rangcho khüdu kyo, mütrochehba rothsarü kyo liro? Yuje, ABÜDONGBA, Nüh ihrü te lile. Ihrü Nü müyurü; ihrü tüthrüchahchübeh.’ ”

¹⁰Hiri nyitsarü nengdang ABÜDONGBAnü yore, “Arühnü I tenü rang tsinyüre, ko arüh jangjangthsa mürahsehnung. Hütsünü Ihnü arüh te mükünyangre. Ihnü arüh mülangti lümchehnung ko arüh münyi ngang arüh khingchinung.”

¹¹ABÜDONGBAnü I te yocho, “Hiri nyitsarü tronung I te tütsingdheng.

¹²Arühnü kong nye, Ihnü arüh akihchiba yuva münyinung; ko arühnü I khyang trüp mübü ko tsang mübü mübü nye, Ihnü arüh te mükünyangnung. Hütsü mülih, Ihnü arüh khata la; akongba ko thsaranü süsohnung.”

¹³Hütsüde Ihnü yocho, “Amichahba ABÜDONGBA, azikehrütinü khata mahkhang akongba mülinungepü müyurü te yocho Nühnü müdhele, tunüo Nühnü nyengchoko, arühnü yore, Ihsa lih la yangtsa du linung.”

¹⁴Ta ABÜDONGBAnü lalingcho, “Azikehrünü I nengla arahkeh chore; Ihnü arüh müwüsoh, mahkhang arüh khyang yuzeng müjü mahkhang arüh te yu khüdu mii müyo. Arühnü choba müngucheh tsü I chahnü rocho mah; arühnü choyohba tsü arühnü lümcho ko hütsü amii müle.

¹⁵Ihnü müwüsohpü I nengla hiba lih la akongba ko khata mülinungepü choba azikehrüti chah Ihnü tu nguchinung hütsü Ih, ABÜDONGBAnü nührü te yore. Ihnü arüh khata la ko akongbanü mapsehnung.

¹⁶Sürünü sürü te hiri yocho, arühbürüsü hütsüta kyüsehnung. Arüh me tsü Jerusalem yanglong la dhiyohchüpehnung ko hütsüri dhrürangnung süsü mülinung. Hi arüh nitpürü, tsurü ko tsularüti apüm chah tikehnung. Arüh mütsacho ngang Ihnü arüh chah küdusohnung.”

¹⁷Müyurü te I chongcha nengdang hita yonung ABÜDONGBAnü I te yuzeng jücho: “Ama atsingse I nah lanü nahshükih shosohng, I traba khodesü tütrazahsoh, tunüo I müyurü dee soh thsakehko ko khee lerohpehko.

¹⁸Khode Ih rangmülang tsü chüdunang, khata la kyüsehcho me tsü Ihnü ngure; khode Ih yangdilang wonang, Ihnü nyitsarü kongsehcho ngure. bebürü ko azikehrütinü arüh nguchi nguchire, ta arühnü tu nguchiro hütsü arühbürünü mümüdhe.”

¹⁹ABÜDONGBA, Nühnü Juda khüdupinü thrüchahchüpehko ang? Nühnü Zionrü thrünyire ang? Tuepü ihrü mükyangnungthsa hidoi mütsa thsakehjücho? Ihrünü yangtsa yangchicho, ta tu atsa mütikeh; ihrünü akyangnung longdicho, ta adrüba du rocho.

²⁰Ihrünü Nüh nyüm amünyi shitpahko, ABÜDONGBA; Ihrünü ihrübürü münyi ko ihrü jümürü münyi nyengchore.

²¹Nü anyengchochoti lümchehng ko ihrü tüpehjü; Jerusalem, nü ahechi Yangthsaba pümji müdüm chah ashah tühirojü. Nühnü ihrü te külüpba azengtacho tüthsangnyang.

²²Yucho pa kyothri khüdunüsü tsing rosohnung mükohre; ning ajangjangnü tsing mürochehsoh. Ihrünü ihrü alongdi Nü chah yohpücho, O ABÜDONGBA, ihrü Tsingrang, tunüo nühnü hiri nguchire.