Read Sangtam Naga JEREMIA 15 Bible Online

JEREMIA 15 - Sangtam Naga bible

JEREMIA 15

¹Hütsüde ABÜDONGBAnü I te yocho, “Hila Mosa e Samuel nyühnü yapü I te kihchi nye, Ihnü hiri müyurü te yanglilüm müngunung. Arüh tsisohng; arüh I tenü tsisohng.

²Arüh khüilang wünungpü nü te tsingdhengde, Ihnü hita yochoepü arüh te young: Khürü thsaranü sünung chokehcholako— arüh hütsülang wünung! Aparü khata la sünung chokehcholako— arüh hütsülang wünung! Khürü kongseh sünung chokehcholako— arüh hütsülang wünung! Aparü kümtsinung chokehcholako— arüh hütsülang wünung!

³Ih, ABÜDONGBAnü arüh chah adrünung müyü tikehsohnung dhrongchehko: arüh khata la kyüsehnung; arüh me tsü füzanü tphah tsinung; uzatinü hütsü tsunung ko anyingcho tsü rangmü kanglungrünü tsunung.

⁴Hezekia tsurü Manase abi Juda la yangthsade Jerusalem la tu nguchicho hütsü ngang, Ihnü limirü khyang arüh anehsohba kangsohnung.”

⁵ABÜDONGBAnü yore, “Sünü nüh müinung, Jerusalemrü, ko sünü nührü nengdang longrinung? Nüh khüta liropü tsingdhengnung mii sünü yingchehnung?

⁶Nührünü Ih mükhyücho; nührünü I lahpi nührü khang piko. Hütsünü I kheh müyungcho nührü nyehnahre, tunüo I rihlong ranglichonü Ih kyahko.

⁷Alih la yangdi mükhu la, mayü kyo nyübong la Ihnü nührü shuh müthehcho. Ihnü nührü changjücho, müyurüti, Ihnü nührü tsuzarüti kyüsehcho, tunüo nührünü nührü amünyi lang lanü müzacho.

⁸Kihdi la lihpi tenü nührü lih la chomilarü adrongu kangko. Alongdenü nührü dhrezarüti kyüsehcho ko arüh atpati chongchasohcho. Dhrongyengnü alongri ko adrübanü Ihnü arüh chah chihsohcho.

⁹Dhünyeh atpa tsü sütünung ko sah chikanung. Abükyü avisa tsü amarürah kangnung; alasih la shahnung ko longrinung. Ihnü nührü rorüh khyang nührü akang nying lirüti kyüsehsohnung. Ih, ABÜDONGBAnü choko.”

¹⁰Ih khüta amükünyang nyitsarü khüdu! Tuepü I tpanü Ih limih la hirocho? Alih la lirü nyitsarü müipi te yübütanung ko rehtasohnung. Sü khyangsü Ihnü thsi münyajü mahkhang Ihnüsü münya; ta atümungnü Ih chokehcholare.

¹¹ABÜDONGBA, Ihnü Nüh tsa müdikeh likhang, arüh chokehchola apüm tikehsohng.

¹²(Sünüsü idhse mükhyahnahcheh, alathsa kihku lahpinü hiroba imüyeng yohrütaba idhse.)

¹³ABÜDONGBAnü I te yocho, “I müyurünü yanglih apümlang shitpahcho münyi khingchinung nengdang, Ihnü I müyurü kuthsi ko kohro hitsisohnung arorüh müthehnung.

¹⁴Arühnü tusü mümüdheba lih khüdu la arüh khyang arüh rorüh dikehsohnung, tunüo I rihlong tsü michang kyo lile, ko hütsünü achangka müli tahnung.”

¹⁵Hütsüde Ihnü yocho, “ABÜDONGBA, Nühnü nyichehle. Ih lümchehng ko Ih troung. I khyang I dhsümthserü rühyangsohng. Arühnü Ih kyüsehsohnung tüying. Nü khyanglangnü Ih müthsamünyücho lümchehng.

¹⁶Nühnü I te chotacho ko Ihnü Nü yu apüm nyiko. Ih nüyo lile O ABÜDONGBA, Akohba Tsingrang, hütsünü akünyang ko alongphi Nü yunü I lasih jengko.

¹⁷Ihnü aparü nyitsarü yola künyangküshi bekhyah mübeh. Nü yu nyi Ihnü I müleng licho ko rihlong chüro licho.

¹⁸Tuepü Ih chongcha liro? Tuepü I mathsa hi mükyangro? Tuepü mükyangchehro? Müyüde kungpehba yongkhi kyo Nühnü Ih wahsohnyürü mah-o?”

¹⁹Hi nengdang ABÜDONGBAnü lalingcho, “Nühnü thali rokhang, Ihnü nüh thali khyünung, ko nüh I dikehrü kangnung. Amükhyu chonung tenü nühnü akhyüba sobhokhang, nüh thali I azikehrü kangnung. Müyurünü thali nü yanglang ronung ko nühnü arüh yang wünung müdhsütahnung.

²⁰Ko hiri nyitsarü nengdang Ihnü nüh imüyeng amüthsinü tbücho kyosohnung. Arühnü nüh nyüm khatanung, ta arühnü nüh mükohnung. Nüh tsungtinung ko khümchonung Ih nü te linung.

²¹Akhürahrü ko shühkhatohrü kheh lanü Ihnü nüh khümchonung. Ih, ABÜDONGBAnü choko.”