Read Sangtam Naga JEREMIA 18 Bible Online

JEREMIA 18 - Sangtam Naga bible

JEREMIA 18

¹ABÜDONGBAnü I te yocho,

²“Fühtangrü kuh lang tsü jowüng ko Ihnü hütsüla nü khyang I yusi jünung.”

³Achotsü Ihnü hütsülang wücho ko abi fühtangji chah nguchiya ngucho.

⁴Khodederü füh tsü tsa mütangchehnang, abinü lihshe tsü khyo apa lango külüpcho.

⁵Hütsüde ABÜDONGBAnü I te yocho,

⁶“Fühtangbanü lihshe te alümcho nguchicho kyo Israel te nguchinung Ih athsalang müle ang? Fühtangrü khehla lihshe kyo nührü I khehla lile.

⁷Ihnü masü te yucho khüdu mahkhang yanglih khüdu rohchehnung, thsangnyangjünung mahkhang changjünung yonung,

⁸ta arühnü amünyi lanü ximülakhang, Ihnü nguchinung yoba tsü münguchinung.

⁹Ta apa bekhyah khüdu la, Ihnü yucho mahkhang yanglih khüdu külüpnung yonung,

¹⁰ta hütsüba yucho ko yanglih tsünü I yocho münyi amünyi nguchikhang, Ihnü yoba tsü münguchinung.

¹¹Hütsüeko ade, Judarü ko Jerusalemrü te Ihnü arüh nyüm lümchung chungle ko arüh khingchinung rungnümlepü young. Arüh amünyi akang liba zahnung, arüh akang mülichinung ko arühnü nguchiba tsü tünguchi pü arüh te young.

¹²Arühnü lalingnung, ‘Imoh, tuepü? Ihrü atümung ihrü thsanyücho thsa hongzi amünyi nguchi du linung.’ ”

¹³ABÜDONGBAnü yore, “Hi kyo mütikehdhengnang yucho mükhu te tsingdheng. Israelrünü adrünung nguchiko!

¹⁴Lebanon lungrah la tsü mürang mübhümpü lidhengcho do? Arühsahkünang azong yongkhi tsü kungchehdhengcho do?

¹⁵Ta I müyurünü Ih nbüchüko; arühnü kyothri khyang müchiji trüpre. Arüh wünung lang la müthikehko; arühnü adelü lang hii la mütsehre; arühnü arü mülicho la tsehre.

¹⁶Arühnü hiba lih hi adrünung kangsohko, lede müchümükehnungthsa. Alahkhurü atümungnü hütsü ngu nehnung; arühnü nyeka arüh thah ngahchinung.

¹⁷Ihnü arüh rorüh bete I müyurü shupishuzasohnung, nyüchüro nyübongnü fotsiba lihwü kyo. Ihnü arüh lahpi I khang pinung; achangba rode Ihnü arüh mütronung.”

¹⁸Hütsüde müyurünü yocho, “Ihsanü Jeremia nengdang lango nguchinung. Ihsa te donung bebürü, lümlong jünung amüdherü ko Tsingrangba yusi sobhonung azikehrü lede linung. Ihsanü abi mülangjüba hironung ko abi yu münyinung.”

¹⁹Achotsü Ihnü dangkhidangnangcho, “ABÜDONGBA, Ihnü yoba hi nyieng ko I rorünü I nengdang chocho nyieng.

²⁰Amütsa tsü atsa mülih mah-o? Ta arühnü Ih longyohsohnung shukuh jure. Nühnü arüh te rihlong chüro mübichisohnung Ih Nü yanglang ro arüh nengla chocho Nühnü lümchehng.

²¹Ta ade, ABÜDONGBA, arüh tsuzarü kongseh süsohng; arüh khata la kyüsehsohng. Khingkurüti tsü arüh niirü ko tsuzarüti changsohng; azirü thsaranü süsohng ko dhrezarüti khata la kyüsehsohng.

²²Dhrongyengnü arüh kuh kengchonung amülung müthehng; arüh adrüchonü trasohng. Arühnü Ih longyohsohnung shukuh juko ko Ih xohnung zeng thsapüjüle.

²³Ta, ABÜDONGBA, Ih kyüsehnung arüh rah apüm Nühnü müdhele. Arüh amütsa ko amünyi mülang tüpehjü. Arüh khülusohng ko Nü rihlong chüro lide arüh te chotaang.”