Read Sangtam Naga JEREMIA 22 Bible Online

JEREMIA 22 - Sangtam Naga bible

JEREMIA 22

¹ABÜDONGBAnü David trah Juda Yangthsaba kukhi te wünü,

²hütsüla Yangthsaba, abi adirüti ko Jerusalemrü te ABÜDONGBAnü yocho yu nyinung I te yocho:

³“Tu yuje ko athsalang hütsü nguchinung Ih, ABÜDONGBAnü yuzeng jüre. Athsüyohchürünü kihyocho liba nyüh khüdu tsungtieng. Shuparü, mürürü ko chomilarü tüsehchi mahkhang mütsa tübichi; ko Amüsa müdüm hila achomükeh nyitsarü tükyüseh.

⁴Ihnü mülacho roh-i nührünü yuje nguchikhang, David trah lanü mütozah yangthsanung. Ko arüh, arüh adirüti ko müyurü yola mütozah hiba Yangthsaba kuh tbükhüm khu kuri kari ko kuri chahnü lahkhunung.

⁵Ta nühnü I yuzeng münyikhang, Yangthsaba kuh hi khülu changnung Ihnü yuchümre. Ih, ABÜDONGBAnü choko.”

⁶“I nengdang, Juda Yangthsaba kuh tsü Gilead lih ko Lebanon Azong kyo atsah atsa lile, ta hütsü apehlih kyo kangsohnung.

⁷Ihnü hütsü changsohnung nyitsarü müthehre. Arüh apümnü arüh püh hironung ko atsah atsa cedar dongditi retsunung ko michang la dhiyohchünung.

⁸“Akhanglang shuparü adrong lahkhunung ko hiba yangdi arangcheh chah Ih, ABÜDONGBAnü tu nguchicho pü tsingdhengnung.

⁹Hütsüde arühnü hütsü nührünü nührü Tsingrang I te azengtacho pehjüpü aparü tsingrang mübo dikehchonüepü arühnü yonung.”

¹⁰Judarü, Yangthsaba Josia nengdang tütra; abi sücho me tüshü. Ta abi tsurü Joahaz nengdang dee traang; arühnü abi notsire, khodesü müthalinung, abi suro lih khodesü müngunung.

¹¹ABÜDONGBAnü au mülih Juda la Yangthsasohba Josia tsurü Joahaz nengdang hita yore, “Abi hilanü khodesü müthalinung tsipehko.

¹²Abi khüde notsicho hütsüla abi sünung, ko abinü khodesü thali hiba lih hi müngunung.”

¹³Sünü yuje müchonü akuh thsaro ko thsakehro; Sünü apu nyitsarü amükangnü nguchisohro ko arüh nyükhehshi müjüro, abi ahohah!

¹⁴Sünü hita choro abi ahohah, “Ihnü Ipu kuh arangcheh amunglang ahechi chongsah yohpü thsanung.” Hütsüta abinü nyübongkhi yoh, cedar singnü abekhüm ko amohnü münohre.

¹⁵Cedar singnü nü kuh thsachonü, aparü tenü atsauba külüpnü, nüh atsauba yangthsarü kangrü mah-o? Nüu akang dekheng liko. Abi lede yuje ko atsa licho, ko lüpcho la abi müwacho.

¹⁶Abinü ailümrü yu tsa khacho, ko abi te apüm tsa licho. Hütsü ABÜDONGBA müdheba tsü lile.

¹⁷Ta nühnü nüpu nengdang du nguchire; nühnü achomükehrü kyüsehre ko nü nyitsarü mütsa sehchire. ABÜDONGBAnü choko.

¹⁸Hütsünü ade, ABÜDONGBAnü Juda Yangthsaba Josia tsurü Jehoiakim nengdang hita yore, Sünüsü abi me müshünung, mahkhang, “Müi o pü müyonung. Sünüsü abi nengdang ‘I Büdongba, Yangthsaba!’ pü mütranung.

¹⁹Gadu khüdu dhrürangcho kyo, abi tphah hichüdu Jerusalem tbükhüm mihlang pehnung.”

²⁰Jerusalemrü, Lebanon lang wüng ko züdeing, Beshan lih lang wüng ko traang; Moab zong lanü züdeing, tunüo nührü tsungphung thsarü apüm kohchehko.

²¹Nührü tsa lide ABÜDONGBAnü nührü te chotacho, ta nührünü münyicho; Nührünü ABÜDONGBA yu khodesü münyi.

²²Nührü langnürüti nyübongnü fo tsinung, nührü tsungphungthsarü arangyohrü kang notsiko, nührünü nguchicho amütsa apüm ngang nührü yangdi wahseh ashah khyüsohko.

²³Lebanon lanü hiroba cedar sing chah nührünü longlangre; ta khingkurü mi khungde kyo, adhsanü nührü chah chihde, nührü khüta amüinung thsanung.

²⁴ABÜDONGBAnü Juda Yangthsaba Jehoiakim tsurü Yangthsaba Jehoiakhin te yocho, “Ih akang liba Tsingrang lide, nüh I kheh tsalang imüshi thsanye,

²⁵Ihnü nüh tphahcheh nühnü dro liba nyitsarü, nüh kyüsehnung yangchibarü khyang jünung. Ihnü nüh Babylon Yangthsaba Nebukadnezar ko abi rothsarüti khehla jünung.

²⁶Ihnü nüh ko nü tpa yangtsilang khing wüsohnung. Nühjü müsuroba limih khüdu lang nühjü wünung ko nühjüding hütsüla sünung.

²⁷Nühjünü hiba lih longminung, ta khodesü thali müronung.”

²⁸Ihnü yocho, “Yangthsaba Jehoiakhin amapnahcho apehcho ko sünüsü müdhsütahba alih füh kyo kangcho mah-o? Hütsü khu abi ko abi tsuzarüti arühnü mümüdheba lih khüdu lang yangtsilang notsicho mah-o?”

²⁹O alih, alih, alih! ABÜDONGBAnü yoba yu tsü nyieng:

³⁰“Hiba nyitsarü hi atsurü mii changnungthsa mülangjüko. Khodesü akoh münguba nyüh khüdu kangnung. Abi chahnü David mülih Juda la yangthsa thsanung tsuzarü mülinung. Ih, ABÜDONGBAnü choko.”