Read Sangtam Naga JEREMIA 24 Bible Online

JEREMIA 24 - Sangtam Naga bible

JEREMIA 24

¹ABÜDONGBAnü ngurüsih loh anyüh Amübükuh bete yohpo I te ngusohcho. (Hi Babylon Yangthsaba Nebukadnezarnü Jehoiakim tsurü Yangthsaba Jehoiakhin Jerusalem lanü Babylon lang Judarü zirü, shihthrirü ko nguchi müdherü yola arangyohrü kang nowüko khanglang tikehcho.)

²Akhudiba loh la akhu nyicho ngurüsih atsa; akhüuba loh la tsü atsu mütsa ngurüsih asühcho zehcho.

³Hütsüde ABÜDONGBAnü I te yocho, “Jeremia, nühnü tu nguro?” Ihnü lalingcho, “Ngurüsih. Ngurüsih atsati tsü dee atsa, ko amütsati tsü atsu mütsa sühko.”

⁴Hütsüde ABÜDONGBAnü I te yocho,

⁵“Ih, ABÜDONGBA, Israel Tsingrangnü, Babylon lang notsiba müyurü tsü hiri ngurüsih atsa kyo khichire, ko Ihnü arüh tsa bichinung.

⁶Ihnü arüh dhengyehnung ko hiba lih lang thali noronung. Ihnü arüh dhimüsunung ko mütphünahnung; Ihnü arüh khyümnung ko mürohchehnung.

⁷Ih ABÜDONGBAepü müdhesohnung Ihnü arüh khyang lümlong jünung. Hütsüde arüh I müyurü ko Ih arüh Tsingrang kangnung, tunüo arühnü Ih yang arüh lasih apümnü thali ronung.

⁸“Juda Yangthsaba Zedekia, abi te yangthsarüti ko Jerusalem la nyehli liba ko Ijip lang notsiba müyurüti; Ih, ABÜDONGBAnü arüh apüm tsü atsu mütsaba ngurüsih kyo bichinung.

⁹Liküp la yuchotinü nehnungthsa arüh michah Ihnü hütsütari achangba hirojünung. Nyitsarünü arüh münyodhengnung, arüh nengdang tülatüshinung, arüh mütsa chonung ko arüh wücho apümlang arüh neng dangchinung.

¹⁰Ihnü arüh chah khata, yangkong ko dhsara, ko arüh jümürü khyang jüba lih la nyüh khüdusü münyingnungthsa hirojünung.”