Read Sangtam Naga JEREMIA 27 Bible Online

JEREMIA 27 - Sangtam Naga bible

JEREMIA 27

¹Juda la Josia tsurü Zedekia Yangthsaba kangyeng,

²ABÜDONGBAnü I te shuküp amütbah ko singnü hongzih külüp-pü I hong la lahnung yocho.

³Hütsüpü Jerusalem lang Yangthsaba Zedekia te shirütanung rorüh arüh langbürüti khu Edom, Moab, Amon, Tyre ko Sidon yangthsarüti yang yusi jünung yocho.

⁴Akohba ABÜDONGBA, Israel Tsingrangnü arüh yangthsarüti te yuzeng hiroh-i jünung I te yocho:

⁵“I zii ko tase amülah la Ihnü limih, amüi tsurü ko limih chah liba kanglungrü apüm thricho; ko hütsü Ihnü jünyürü masü khyang jüre.

⁶I dikehrü, Babylon Yangthsaba Nebukadnezar pohki yucho hidoi yohpüjüba tsü Ih lile ko Ihnü rangmü kanglungrünü mii abi dikehsohcho.

⁷Yuchoti apümnü abi dikehnung ko apu yucho khülunung akyang khüdu müchide, arühnü abi tsurü ko abi shümtsurü mii dikehnung. Hütsüpü abi yuchonü rezeh yuchoti ko yangthsarüti dikehnung.

⁸“Ta yucho mahkhang yanglih khürünü abi pohki müzüdukhang, hütsüba yucho tsü Ihnü chita, yangkong ko thsaranü khingchinung Nebukadnezar khyang hütsüri riri changsohnung.

⁹Azikehrü yu tünyi mahkhang melang mahkhang asülang würü mahkhang azi-among nguchinü nye, atikehnung libati yochehrü yu tünyi. Babylon Yangthsaba pohki tüzüdu pü arüh atümungnü yonung.

¹⁰Arühnü nüh kihyochüre ko hütsü khu nührü lih lanü ashu notsisohnung. Ihnü nührü iipehnung ko nührü changnung.

¹¹Ta tu yuchonü Babylon Yangthsaba pohki züdu abi dikehnang, arüh Ihnü arühbürü lih la yuthsah-bhahi lisohnung. Ih, ABÜDONGBAnü choko.”

¹²Ihnü Juda Yangthsaba Zedekia tesü hütsü du yoko, “Babylon Yangthsaba chah hapm. Abi ko abi nyitsarü dikehng ko nührü akang linung.

¹³Tuepü nüh ko nührü nyitsarü chita la mahkhang yangkongnü mahkhang thsaranü sünung? Tunüo tu yuchonü Babylon Yangthsaba chah mühapnang, hütsüta tikehnungepü ABÜDONGBAnü yoko.

¹⁴Abi chah tühap-pü yoba azikehrüti yu tünyi. Arühnü nührü kihyochüre.

¹⁵Abinü arüh mümütheh ko abi nengla arühnü arahkheh chorepü ABÜDONGBA apunü yoko. Hütsünü abinü nührü iipehnung ko nührü ko nührü te arahkeh chorü azikehrü tsü kyüsehnung.”

¹⁶Hütsüta Ihnü bebürü ko müyurüti te ABÜDONGBAnü yocho yu tsü yocho: “Babylon lanü Amübükuh kuthsi tunyah mülipü thali hironungepü yoba azikehrü yu tünyi. Arühnü nührü te arahkheh chore.

¹⁷Arüh yu tünyi! Babylon Yangthsaba chah hapm ko nührü akang linung. Tuepü hiba yangdi hi athsangnyangcho bhüm kangnung?

¹⁸Arüh yuje azikehrü thsakhang ko I yusi hirü thsakhang, Amübükuh ko Yangthsaba kuhla liba kuthsi tsü Babylon lang mühitsinung. Ih, ABÜDONGBA te tsingdhengsohng.”

¹⁹(Yangthsaba Nebukadnezarnü Babylon lang Juda Yangthsaba, Jehoiakim tsurü Jehoiakhin ko Juda ko Jerusalem la akuthsengti no tside, abinü dongditi, imüyeng kihbong, misü kariti ko amübükuh la kohro khürülü pehjücho.)

²¹“Jerusalem la amübükuh ko Yangthsaba kuhla pehjüba kuthsi nengdang Ih, Akohba ABÜDONGBA, Israel Tsingrangnü tu yoro nyieng:

²²Hütsüri Babylon lang hitsinung ko Ihnü hütsüri mülümchehde arüh hütsüla linung. Hütsüpü Ihnü thali hironung ko hiba müdüm la yohpünung. Ih, ABÜDONGBAnü choko.”