Read Sangtam Naga JEREMIA 28 Bible Online

JEREMIA 28 - Sangtam Naga bible

JEREMIA 28

¹Hütsüba kang, Zedekia yangthsapü kang müyüu choo amüngau la, Gibeon yangdi lanü azikehrü khüdu, Azzur tsurü Hananianü I te Amübükuh la chotacho.

²Akohba ABÜDONGBA, Israel Tsingrangnü hita yorepü bebürü ko müyurü bete Abinü I te yocho: “Ihnü Babylon Yangthsaba tase thsangnyangjüko.

³Yangthsaba Nebukadnezarnü Amübükuh kuthsi Babylon lang hitsiba tsü Ihnü kang anyüh kahla thali hiba müdüm la hironung.

⁴Ihnü Juda Yangthsaba Jehoiakim tsurü Jehoiakhin ko abi yola Babylon lang yangtsirü kang notsiba müyurütisü thali noronung. Ho, Ihnü Babylon Yangthsaba tase thsangnyangjünung. Ih, ABÜDONGBAnü choko.”

⁵Achotsü Amübükuh la yarü bebürü ko müyurü apüm betenü Ihnü Hanania te yocho:

⁶“Anyemüyangnung! ABÜDONGBAnü hütsüta nguchinung Ihnü longdire. Nü choyohcho yuje tikehsohnung ko Babylon lanü amübükuh kuthsi ko akümtsirü apüm nüli ronung Ihnü longdire.

⁷Ta Ihnü nü te ko müyurü te tu yoro hi nyieng.

⁸Ihjü mah-ede, papade azikehrünü chita, yangkong ko dhsara yucho adrong ko rezeh yanglihti michah ronung choyohko.

⁹Ta yangtsa choyohba azikehrü tsü, abinü choyohba tsü tikehpü du abi yuje ABÜDONGBAnü müthehcho azikehrüepü khichinung.”

¹⁰Hütsüde Hananianü I hong lanü hongzih tsü phungcheh hütsü zangzang khyahnahjücho

¹¹ko müyurü apüm betenü I te hita yocho: “Yangthsaba Nebukadnezarnü yucho apüm hong la yohjüba hongzih tsü hi kyo thsangnyangjünung ABÜDONGBAnü yore; ko abinü hi kang anyüh kahla nguchinung.” Hütsüpü Ih tsipehcho.

¹²Khü lipü, ABÜDONGBAnü I te

¹³wü Hanania te hiroh-i yonung yocho: “Nühnü sing hongzih thsangnyangnung kohle, ta abinü idhse hongzihnü hütsü mülijünung ABÜDONGBAnü yore.

¹⁴Yucho apüm chah idhse hongzih yohjünung ko arühnü Babylon Yangthsaba Nebukadnezar dikehnungepü Akohba ABÜDONGBA, Israel Tsingrangnü yore. Rangmü kanglungrünü mii Nebukadnezar dikehnungepü ABÜDONGBAnü yore.”

¹⁵Hütsüpü Ihnü Hanania te hisü lahkeh yocho, “Nyieng, Hanania! Nüh ABÜDONGBAnü mümütheh ko nyitsarü hiri khyang arahkheh yudsisohre.

¹⁶Hütsüeko ABÜDONGBAnü pehnungepü apunü yore. Kang hi müricheh-e nüh sünung, tunüo nühnü nyitsarü hiri te ABÜDONGBA nyümnung yocho.”

¹⁷Ko Hanania hütsüba kang choo dhünyeh-u chah sücho.